އީރާނު ހަނގުރާމައިގައި މަރުވާ ކޮންމެ މުސްލިމަކީ ހިތާމައެއް | ޚާމަނާއީ އަވަހާރަކޮށްލުން ވަކިން ފާހަގައެއް ނުކުރެއްވި

މެދުއިރުމަތީގައި މިހާރު ކުރިއަށްދާ ހަނގުރާމައިގައި މަރުވާ ކޮންމެ މުސްލިމަކީ ރާއްޖެއަށް ލިބޭ ހިތާމައެއް ކަމަށާއި، އަރަބި އިސްލާމީ ގައުމުތަކުން މަސައްކަތް ކުރަމުންދަނީ އެއް 'ޔުނިޓީ'އެއްގެ ގޮތުގައި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމެރިކާއާ ގުޅިގެން އިޒްރޭލުން މިދިޔަ ހޮނިހިރު ދުވަހު އީރާނަށް ދޭން ފެށި ހަމަލާތަކުގައި، އީރާނުގެ ރޫހާނީ ލީޑަރު އާޔަތުﷲ އަލް ޚާމަނާއީ އަވަހާރަ ކޮށްލުމާ ގުޅިގެން ދިވެހި ސަރުކާރުން މިހާތަނަށް ވަކި އެއްޗެއް ބުނެފައެއް ނުވެ އެވެ. ތައުޒިޔާގެ މެސެޖެއްވެސް ފޮނުވާފައެއް ނުވެ އެވެ.

ރައީސް މިއަދު ބޭއްވި ނޫސްވެރިންގެ ބައްދަލުވުމުގައި، ގިނަ ނޫސްވެރިން ވަނީ އެކަމާ ގުޅޭ ގޮތުން އެމަނިކުފާނާ ސުވާލު ކޮށްފަ އެވެ. ނަމަވެސް ޚާމަނާއީ އަވަހާރަވުމާ ގުޅިގެން ވަކިން އެއްޗެއް ވިދާޅެއް ނުވެ އެވެ. އެމަނިކުފާނު އަވަހާރަކޮށްލުން ކުށްވެރިކުރަންތޯ ނޫސްވެރިއަކު ސުވާލު ކުރުމުންވެސް އެކަމަށް ވަކި އެއްޗެއް ރައީސް ވިދާޅެއް ނުވި އެވެ.

ރައީސް ވިދާޅުވީ މި ހަނގުރާމައިގައި ބައިވެރިވާ އެއްވެސް ގައުމެއް ރަނގަޅު ނޫން ކަމަށެވެ. ވިދާޅުވީ، "ވަރަށް ބޮޑު ގޯސްކަމެއް ހަމަލާ ދޭ ހުރިހާ ގައުމަކުންވެސް އެކުރަނީ،" މިހެންނެވެ.

"އަޅުގަނޑު ވަރަށް ސާފުކޮށް މި ދަންނަވަނީ މި ހަމަލާ ދެނީ ތިން ފަރާތަކުން. މިހުރިހާ ފަރާތްތަކުން އެ ކުރާ ކަންކަން އެއީ ސަރުކާރުން ވަރަށް ދެކޮޅު ކަމެއްކަން ބަޔާންކޮށް އެކަން ހުއްޓާލައި، ހަނގުރާމަ ހުއްޓާލަން ސަރުކާރުން ވާނީ ގޮވާލާފައި،" ރައީސް ވިދާޅުވި އެވެ.

ރައީސް ވިދާޅުވީ އީރާނުން އަރަބި އެހެން ގައުމުތަކަށް ދެމުންދާ ހަމަލާތަކުގައި އެގައުމުގެ ތަންތަން ސުންނާފަތިވެ، މީހުންވެސް މަރުވަމުންދާ ކަމަށެވެ. އެގައުމުތަކާއެކު ދިވެހި ރައްޔިތުން ތިބިކަން ހާމަކުރުމުގެ ގޮތުން ޔޫއޭއީގެ ރައީސްއަށް ގުޅުއްވާފައިވާނެ ކަމަށާއި، މިއަދު ސައުދީ އަރަބިއްޔާ، ބަހްރެއިން، އޮމާން އަދި ގަތަރުގެ ވެރިންނަށް ވެސް ގުޅުއްވާނެ ކަމަށް ރައީސް ވިދާޅުވި އެވެ.

އެމަނިކުފާނު ވިދާޅުވީ ސަރުކާރުން މަސައްކަތް ކުރަނީ އަރަބި އިސްލާމީ ގައުމުތަކާ އެކުގައި ކަމަށާއި، މި މުޅި ހަނގުރާމައަކީ ވަރަށް ބޮޑު ހިތާމައެއް ކަމަށެވެ.

"މި ހަނގުރާމައިގައި މަރުވާ ކޮންމެ މުސްލިމަކީ އަޅުގަނޑުމެންނަށް ލިބިގެންދާ ވަރަށް ބޮޑު ހިތާމައެއް،" ޚާމަނާއީގެ ނަން ފާހަގަނުކުރައްވައި ރައީސް ވިދާޅުވެފައިވެ އެވެ.

އިޒްރޭލާއި އެމެރިކާ ގުޅިގެން އީރާނަށް ދޭން ފެށި ހަމަލާތަކާ ގުޅިގެން، މެދުއިރުމަތީގެ އެކި ގައުމުތަކުގައި އެމެރިކާއިން ގާއިމުކޮށްފައިހުރި އަސްކަރީ މަރުކަޒުތަކަށް އަމާޒުކޮށް، އީރާނުން ވެސް ވަނީ ރައްދު ހަމަލާތައް ދެމުންނެވެ.

އީރާނުގެ ދައުލަތުގެ މީޑިއާއިން ބުނި ގޮތުގައި، އެ ހަމަލާތަކުގައި، ޚާމަނާއީގެ އިތުރުން އެމަނިކުފާނުގެ އަންހެން ދަރިފުޅާއި، ދަނބިދަރިފުޅު އަދި ކާފަދަރިފުޅު ވެސް ވަނީ ޝަހީދުވެފަ އެވެ.

ޚާމަނާއީ އަވަހާރަވުމާއެކު، ދައުލަތް ހިންގުމާ އީރާނުގެ ރައީސް، ޖުޑީޝަރީގެ އެންމެ މަތީ ވެރިޔާ އަދި ގާޑިއަން ކައުންސިލްގެ މެމްބަރެއްގެ މައްޗަށް އެކުލެވޭ ކޮމިޓީއަކުން ވަނީ ހަވާލުވެފަ އެވެ.