މޯލްޑިިވިއަން ދެކުނުގެ ގުޅާލުމުގެ އާ ވިސްނުން | ނަމްބަރު ދިމާވޭ

މި ސަރަހައްދުގެ އެންމެ މަޝްހޫރު އެއް އެއާލައިން ކަމަށްވާ ސްރީލަންކަން އިން އައްޑޫ ގަމަށް ދަތުރުކުރާތާ ހައެއްކަ އަހަރު ވަނީ ވެފަ އެވެ. މި ދުވަސްތަކުގައި އެއާލައިނުން އެދެމުން ދިޔަ އެއް ކަމަކީ އިތުރު ގޮނޑި ވިއްކަން ބޭނުންނަމަ ދެކުނުގެ ގުޅުމެއް އުފެއްދުން މުހިންމުކަން ބޮޑެވެ. ދެކުނުގެ ހަތަރު އަތޮޅު ގައުމީ އެއާލައިން މޯލްޑިވިއިއަން އިން ގުޅާލަދީފިނަމަ އެ ސަރަހައްދުގެ ޓޫރިޒަމަށް ފައިދާ ތަކެއް ކުރާނެ ކަމަށް ސްރީލަންކަން އިން ދިޔައީ ބުނަމުންނެވެ. އަދި އެހެން އެއާލައިންތަކުގެވެސް މައިގަނޑު ޝަކުވާއަކީ ފުދޭވަރެއްގެ ދަތުރަށް އެކަށީގެންވާ ވަަރަށް އައްޑޫގައި އެނދުނެތުމެވެ. ނަމަވެސް މިވީހާ ދުވަހު އެކަމަށް ހައްލެއް ދޭން ސަރުކާރަކަށް ނޭނގުނެވެ. މިކަމުގައި އެންމެ ފަހުން އެންމެ ގަދަޔަށް ވާހަކަ ދެއްކެވީ އެމްޑީޕީ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލް އެވެ. ފައްޔާޒު ވަނީ އެކަން އެމްޑީޕީ ސަރުކާރުން ކުރާނެ ކަމަށް ކުރިން ވައުދުވެފަ އެވެ. ނަމަވެސް އެކަންނުވެ ތޮޅިއަށް ގޮސް އެ ވެރިކަން ނިމުނީ އެވެ. އޭގެ ފަހުން މި ސަރުކާރުން މިވަނީ ތަފާތު މޮޑެލްއެއްގައި މިކަން ކުރަން ވިސްނާފަ އެވެ. އެއީ ކުރިން ސަރުކާރު ތަކުން ވިސްނާ ގޮތަށް ތަފާތު ވިސްނުމެއް ގެނެސްގެން މިކަން ކުރުމެވެ. ކުރިން ވިސްނީ މޯލްޑިވިއަންގެ އެތެރޭގެ އުދުހުންތަކުން އެއާޕޯޓްތައް ކަނެކްޓްކޮށްލުމެވެ. ނަމަވެސް މިފަހަރު މި ގެނައި ވިސްނުން ތަފާތެވެ. ކުދި ހަރަދު ކުޑަ ބޯޓުތަކެއް ބޭނުންކޮށްގެން އެކަން ކުރުމެވެ. މިފަހަރު ބޭނުން ކުރަނީ މޯލްޑިވިއަން ސީޕްލޭނުގެ ގޮތުގައި ބޭނުން ކުރާ 15 މީހުންގެ ޖާގައިގެ އެއާކޮންޑިޝަން ނެތް ކުދި ބޯޓުތަކުގައި ހަތަރު ފުރޮޅު ހަރުކޮށްގެން "ވީލްބޭސް" އޮޕަރޭޝަނެއް ފެށުމެވެ. މި ފަހަރު ވާނީ ކިހިނެއް ހެއްޔެވެ؟ މި ދަތުރުތައް ދެމެހެއްޓިދާނެ ހެއްޔެވެ؟ 

ގައުމީ އެއާލައިން މޯލްޑިވިއަން އިން މި ދަތުރު ކުރަން ވިސްނާފައިވަނީ  ދެކުނުގެ ހަތަރު އަތޮޅު ކަމަށްވާ ގއ، ގދ، ފުވައްމުލައް އަދި އައްޑޫ ސީޕްލޭންގައި ފޮރޮޅު ހަރުކޮށްގެން ގުޅާލުމެވެ. 

މޯލްޑިވިއަން އިން މި ދަތުރުތަކުގެ އަގުތައް އިއުލާނުކޮށްފައިވާއިރު އެންމެ އަގު ބޮޑުކޮށް އޮތީ ގަމާއި ކޫއްޑުއާ ދެމެދު ކުރާ ދަތުރުތަކެވެ. މީއީ މި ހަތަރު އަތޮޅުތަކުގައި ކުރާ އެންމެ ދިގު ރާސްތާ ހިމެނޭ ދަތުރެވެ. މިއީ ގާތްގަނޑަކަށް 200 ކިލޯމީޓަރުގެ ރާސްތާ އެވެ. މި ދަތުރުގެ ދިގުމިނަކީ ގާތްގަނޑަކަށް އެއް ގަޑިއިރެވެ. އެހެންވެ ކޮޅަކަށް އިއުލާނުކޮށްފައިވާ 900ރ. އަކީ ހެޔޮ އަގެއްގެ ގޮތުގައި ބުނެވިދާނެ އެވެ. ސަބަބަކީ ސީޕްލޭންގެ ދަތުރުތައް މި ރޭންޖުގައި އާއްމުކޮށް އުޅެނީ 250 ޑޮލަރަށްވުރެ މަތީގެ އަގު ތަކެއްގައި ކަމަށްވުމެވެ. 

މި ދަތުރުތަކަށް މޯލްޑިވިއަން ތައްޔާރުވެފައިވާއިރު މި ދާއިރާގައި މަސައްކަތް ކުރާ ފަރާތްތަކުން ތިބީ އުންމީދުގަ އެވެ. މީގެ އެއް ބޭފުޅަކީ ގަމަށް ސްރީލަންކަން އެއާލައިން އޮޕަރޭޓްކުރާ އޭސް އޭވިއޭޝަންގެ ވެރިޔާ މުހައްމަދު ފިރާގެވެ. 

ފިރާގު ގަބޫލުކުރައްވާ ގޮތުގައި މިކަން މާކުރިން ވެސް ކުރަން ޖެހެ އެވެ. އަދި މި ދަތުރުތައް ވެގެންދާނީ ވަރުގަދަ ރަނގަޅު ފެށުމަކަށެވެ. 

"ބައިނަލްއަގުވާމީ އެއާލައިންތައް ދެމެހެއްޓުމަށާއި، އިތުބާރު ހިފޭ ކަނެކްޝަންތަކެއް މެދުވެރިކޮށް ރާއްޖޭގެ ރޫޓުތަކަކީ އެއާލައިންތަކަށް ފައިދާ ހުރި ރޫޓުތަކަކަށް ހެދުމަށްޓަކައި، މިއަށްވުރެ މާ ކުރިން މި އިސްނެގުން އޮތީ ތަންފީޒުކުރަން ޖެހިފަ.  އެއާޕޯޓްތަކުގެ މެދުގައި އޮންނަ ގުޅުން ރަނގަޅުވުމަކީ ހަމައެކަނި އެއާލައިންތަކުގެ އޮޕަރޭޝަންތައް ވަރުގަދަވާނެ ކަމެއް. އެއީ މުޅި ސަރަހައްދުގެ ތަރައްގީ ހަމަހަމަކަމާއެކު ކުރިއަށްދިއުމަށް ވެސް ލިބޭ ބޮޑު އެހީއެއް،" ފިރާގު ވިދާޅުވި އެވެ. 

މޯލްޑިވިއަން އިން މި ދަތުރުތަކަށް އަރާއިރު ފުރަތަމަ ކަމަކީ މިއީ އެ ކުންފުންޏަށް ހަރަދު ކުޑަކޮށް އެފިޝެންޓްކޮށް ކުރިއަށް ގެންދެވިދާނެ ދަތުރަށް ކަމަށްވާނެ އެވެ. 

މި ބޯޓްތަކަކީ ޑީ ހެވިލަންޑް ކެނެޑާ ޑީއެޗްސީ 300 މަރުކާގެ ޓްވިން އޮޓާ ކުދި ބޯޓުތަކެވެ. މިއީ މިހާރު ސަރުކާރުން ގެންގުޅޭ ވިސްނުމެއްކަން ރައީސް ޑރ. މުހައްމަދު މުއިއްޒުވެސް ވަނީ ވިދާޅުވެފަ އެވެ. މިއީ ހަރަދުގެ ގޮތުން ވެސް ތަފާތު ބޯޓުތަކެވެ. މި ބޯޓުތަކާއި ގައުމީ އެއާލައިން އިން އެތެރޭގައި ބޭނުންކުރާ އެންމެ ކުދި ޑޯނިއާ ބޯޓުތަކާ އޮޕަރޭޝަނަށް ހަރަދުތައް އަޅާކިޔާލި ނަމަވެސް މި ތަފާތު އެނގެ އެވެ. 

މި ދަތުރުތަކުގައި ބޭނުންކުރާ DHC-6-300 ޓްވިން އޮޓާ ބޯޓުތަކަކީ ތެޔޮ ހަރަދު ކުޑަ ބޯޓުތަކެވެ. މީގެ ބޯޓުތަކަށް ގަޑިއިރަކު އަޅަން ޖެހޭނީ ގާތްގަނޑަކަށް 300-350 ލީޓަރުގެ "އެފްވަން" ނުވަތަ ޖެޓް ފިއުލް އެވެ. އަދި ތެލާއި މެއިންޓެނަންސް އާއި ކްރޫ ހަރަދު ހިމެނޭހެން ޖުލްމަ ގަޑިއަކު ހިނގާނެ ހަރަދު ހުންނާނީ 1،200 -1،600 ޑޮލަރާ ދެމެދުގަ އެވެ. މީގެ ބަދަލުގައި މޯލްޑިވިއަން އިން އާއްމުކޮށް އެތެރޭގައި އުދުހެން ބޭނުންކުރާ ބޯޓުތަކަށް ގަޑިއިއަކު ގާތްގަނޑަކަށް 400-500 ލީޓަރު ބޭނުންވެ އެވެ. އަދި ތެލާއި މެއިންޓެނަންސް، އަދި ކްރޫ ހަރަދު ހިމެނޭހެން ޖުލްމަ ގަޑިއަކު ހިނގާނެ ހަރަދު 2،300 ޑޮލަރަށްވުރެ މަތިވާނެ އެވެ. މި ދެކަމަށް އެކަނި ބަލައިލިނަމަވެސް މޯލްޑިވިއަން އަށް ހަރަދު ކުޑަކޮށް މި ދަތުރު ކާމިޔާބު ކުރެވިދާނެ ކަމަށް ބެލެވެ އެވެ. 

ދެކުނުގެ ހަތަރު އަތޮޅަކީ މިކްސް ޕްޕޮޕަޓީސް ގިނަ ހިސާބެކެވެ. އަދި މީގެތެރޭގައި މަތީ ފަންތީގެ ރިސޯޓްތަކާއި ގެސްޓްހައުސްތައް އަދި ހޯމްސްޓޭ ކޮޓަރިތައް ވެސް ހިމެނެ އެވެ. ގއ. އަދި ގދ. އަތޮޅުގައި ޖުމްލަ 2,159 އެނދު އެބަހުއްޓެވެ. އަދި އައްޑޫ ސިޓީގައި މިވަގުތު ޖުމްލަ 1,258 އެނދު ހުރިއިރު، ފުވައްމުލަކުގައި ޖުމްލަ 408 އެނދު ހުރި ކަމަށް ދައްކަ އެވެ. މިއާއެކު ހުރި ޖުމްލަ އެނދުގެ އަދަދު 3,825 އަށް އަރަ އެވެ. އެހެންވެ މިއީ ހަރަދު ކުޑަ އޮޕަރޭޝަނެއް ފަށައިފިން ޓޫރިސްޓުނާއެކު މި ބޯޓުތައް އުދުއްސަން ބެލިނަމަވެސް ރަނގަޅު އަދަދެކެވެ. 

މި ސަރަހައްދަކީ ގުދުރަތީ ގޮތުން އަޖައިބުރުވަނިވި ސިފަތަކެއް ހުރި އަތޮޅުތަކެވެ. އެހެންވެ ސީޕްލޭން ފަދަ ދަތުރުތަކެއް ފަަށައިފިނަމަ ޓޫރިސްޓުންނަށްވެސް ތަފާތު އެކްސްޕީރިއަންސެއް ލިބިގެންދާނެ އެވެ. ސަބަބަކީ މި ބޯޓުތަކަކީ ތިރިން އުދުހޭ ރާއްޖޭގެ ރީތި މަންޒަރުތައް ޓޫރިސްޓުންނަށް ދައްކާލަން ބޭނުން ކުރެވިދާނެ އުޅަނދުތަކަށްވުމެވެ. ރާއްޖޭގެ ރަށްތަކާއި، ފަޅުތަކާއި، އަދި އަތޮޅުތައް މަތިންދާބޯޓެއްގައި ތިބެގެން ބަލާލުމަކީ ދުނިޔޭގެ އެހެން އެއްވެސް ތަނަކުން ނުލިބޭނެ ފަދަ ރީތި މަންޒަރެކެވެ. މިއީ ޓޫރިސްޓުންގެ "ބަކެޓް ލިސްޓް" ގައި ހިމެނޭ މުހިންމު ކަމެކެވެ. 

މި ދަތުރުތަކުގެ ސަބަބުން ހަމައެކަނި ކުރިއެރުން އޮތީ ގެސްޓްހައުސް އޯނަރުންނާއި ރިސޯޓްވެރިންނަށް އެކަންޏެއް ނޫނެވެ. 

މޯލްޑިވިއަންއިން ގަބޫލުކުރާ ގޮތުގައި މި އާ ހިދުމަތުގެ ސަބަބުން އައްޑޫ ގަން، ދެކުނުގެ ދަތުރުފަތުރުގެ މައި މަރުކަޒެއްގެ ގޮތުގައި ތަރައްގީވެ، އެހެން ސަރަހައްދުތަކާ ގުޅުވައިދޭނެ އެވެ. އަދި މިއާއެކު ވަޒީފާއަށާއި ތައުލީމަށް އަދި ޒަރޫރީ ބޭނުންތަކަށް އެ ހިސާބުގެ ރަށްރަށުގެ މެދުގައި ދަތުރުކުރާ މީހުންނަށް ބޮޑު ލުޔެއް ލިބޭނެ އެވެ. އަދި  ބަލި މީހުން އުފުލުމާއި ސިއްހީ ބޭނުންތަކަށް ކުރާ ދަތުރުތަކުގައި ކަނޑުދަތުރުފަތުރަށް ބަރޯސާވާން ޖެހޭ މިންވަރު ކުޑަވެ، މޫސުން ގޯސްވުމުގެ ސަބަބުން ދިމާވާ ދަތިތަކަށް ހައްލެއް ލިބޭނެ އެވެ. 

ގައުމީ އެއާލައިން އާ ވިސްނުމެއްގައި ދެކުނުގެ ހަތަރު އަތޮޅު ގުޅާލަން ނުކުންނައިރު، ސުވާލަކީ މި ދަތުރުތައް މެދުނުކެނޑި ކުރިއަށް ގެންދެވިދާނެ ހެއްޔެވެ؟ ނޫނީ މި ދަތުރުތައްވެސް ވާނީ އާއްމުކޮށް ސަރުކާރުތަކުން ކެމްޕޭނަށް ޖަހާ މުޑިއަކަށް ހެއްޔެވެ؟ މިހާރު ބޭނުންވަނީ އެ ވިސްނުމެއް ނޫނެވެ. ބޭނުންވަނީ ވިޔަފާރީގެ ގޮތުން ދެކޮޅު ޖެހޭ ވިސްނުމެކެވެ. ގައުމީ އެއާލައިންނަށް ސަރުކާރުންދޭ "ޕްރިވިލެޖް"ތަކުގެ އެންމެ ރަނގަޅު ފައިދާ ރައްޔިތުންނާ ހަމައަށް ގެނެސް ދިނުމެވެ. 

ނޯޓް : މި އާޓިކަލް ފުރަތަމަ ލިޔުނުއިރު ޓޫރިސްޓު އެނދުގެ އަދަދު 5،000 ކަމަށް ޖެހިފައިވަނީ އޮޅުމަކުންނެވެ. ރަނގަޅު ގޮތަކީ ޖުމްލަ އެނދުގެ އަދަދަކީ 3,825 އެވެ. ވީމާ ކިޔުންތެރިންގެ ކިބައިން މިކަމަށް މައާފަށް އެދެމެވެ. 

ކިޔާލަން - ރާއްޖެއަށް އާ ތަޖުރިބާއެއް | ގައުމީ އެއާލައިންގެ ސީޕްލޭން، ފުރޮޅު ދަތުރަށް