ގާނޫނާ ހިލާފު ވިޔަފާރިކުރާ ބިދޭސީން ރިޕޯޓް ކުރާނެ ޕޯޓަލްތަކެއް އާއްމުކޮށްފި

ރާއްޖޭގައި ގާނޫނާ ހިލާފަށް ވިޔަފާރި ކުރާ ބިދޭސީން ހުއްޓުވަން ފިޔަވަޅުތަކެއް އަޅަން ފެށުމުގެ ގޮތުން، އެކަމަށް ހާއްސަ ޕޯޓަލް ތަކެއް އިކޮނޮމިކް މިނިސްޓްރީން އާއްމުކޮށްފި އެވެ. 

އިކޮނޮމިކް މިނިސްޓްރީން ނެރުނު ބަޔާނެއްގައި ބުނީ ރާއްޖޭގައި ގަވައިދާ ހިލާފަށް ބިދޭސީން ވިޔަފާރި ކުރާ މައްސަލައިގެ ޝަކުވާ އަބަދުވެސް އެ މިނިިސްޓްރީއަށް ލިބެމުންދާ ކަމަށާ އެގޮތުން ދެ ގޮތަކަށް ވިޔަފާރި ކުރާކަން އެނގިފައިވާ ކަމަށެވެ.

އެ މިނިސްޓްރީން ބުނީ ބިދޭސީން ރާއްޖޭގައި ގަވައިދާ ހިލާފަށް ވިޔަފާރި ކުރާ ދެ ގޮތަކީ ނިވާފަތް ގަނޑަކަށް ދިވެހިން ހަދައިގެން ވިޔަފާރި ހިންގުމާއި ފޮރިން އިންވެސްޓްމަންޓް ގާނޫނުން ބިދޭސީންނަށް ހުއްދަ ނުކުރާ ދާއިރާތަކުގައި ވިޔަފާރި ކުރުމެވެ.

މި މައްސަލަ ހުއްޓުވަން ފިޔަވަޅު އަޅަން ފެށުމާ ބެހޭ ގޮތުން އެކްސްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ
ގަވާއިދާ ޚިލާފަށް ބިދޭަސީން ހިންގާ ވިޔަފާރިތައް ދެނެގަނެ އަވަސް ފިޔަވަޅުތަކެއް އެޅުމަށް ސަރުކާރުންނިންމަވާ، މިފަދަ ވިޔަފާރި ރިޕޯޓްކުރެވޭނެ އިންތިޒާމް ހަމަޖެހިގެން ދިއުމަކީ ރައްޔިތުން ނުހަނު ކަންބޮޑުވާ މި ޒަމާންވީ މައްސަލައަށް ދާއިމީ ހައްލެއް ހޯދުމަށް މި ސަރުކާރުން ފަށާފައިވާ މަސައްކަތަށް ލިބުނު އިތުރު ބާރެއް ލިބިގެންދާނެ ކަމެއް ކަމަށެވެ.

"1979ގައި ހެދިފައި އޮތް ފޮރިންއިންވެސްޓްމަންޓް ޤާނޫނު، 46އަހަރަށްފަހު ނިމުމަކަށްގެނެސް މިޒަމާނަށް ފެތޭ، އަދި މާޒީގައި ކުރެވިފައިވާ އެކި ތަޖުރިބާތަކުގެ އަލީގައި އޭރުއްސުރެ ކުރިމަތިވަމުން އައި މައްސަލަތައް ޙައްލުކުރެވޭނެ ހަރުދަނާ ޤާނޫނެއް މުޅީން އަލަށް އެކުލަވާލައި ފާސްކޮށް ގެޒެޓުކުރެވި އަމަލުކުރަން ފެށިފައިވުމަކީ ބިދޭސީން ނުގަވާއިދުން ރާއްޖޭގައި ހިންގާ ވިޔަފާރިތައް ހުއްޓުވައި، ފުރިހަމަ ބާރުވެރިކަމާއެކު ފިޔަވަޅުތައް ތަންފީޒުކުރުމަށް މި ސަރުކާރުން ފަހިކުރި ފުރުސަތެއް،" ސައީދު ވިދާޅުވި އެވެ.

މިނިސްޓަރު ވިދާޅުވީ މާތްﷲ އިރާދަކުރެއްވިއްޔާ އަންނަ ހަފުތާއިން ފެށިގެން މިމަސައްކަތް ހަލުއިކޮށް، ރަނގަޅު ނަތީޖާތަކެއް ނެރެމުންދާތަން ފެންނާނެ އެވެ.

އިކޮނޮމިކް މިނިސްޓްރީން ބުނީ މިކަން ހުއްޓުވަން ތަންފީޒީ އިދާރާތަކާއި ވަކީން ޚާއްސަކޮށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކޮނޮލޮޖީއާއި އިކޮނޮމިކް މިނިސްޓްރީ ގުޅިގެން ހާއްސަ މަސައްކަތްތަކެއް ކުރަން ނިންމާފައިވާ ކަމަށެވެ. އެގޮތުން ބިދޭސީން ނުގަވާއިދުން ހިންގާ ވިޔަފާރިތައް ރިޕޯޓުކުރުން ފަސޭހަކޮށް، އެކަމަށް ހާއްސަކުރެވިފައިވާ ލިންކުތަކެއް ވަނީ އާއްމުކޮށްފަ އެވެ.

މިނިސްޓަރު ސައީދު ވިދާޅުވީ މިފަދަ ކޮންމެ ކަންބޮޑުވުމެއް ޙައްލުކުރެވޭނީ ސަރުކާރާއި ރައްޔިތުން ގުޅިގެން ނުގަވާއިދުން ވިޔަފާރިކުރާ އެކަކަށްވެސް ފުރުސަތު ނުދިނުމަށް، އަދި ދިވެއްސެއްގެ ނިވަލުގައި ފިލައިހުރެ އަމިއްލަ ވިޔަފާރި ހިންގާ އެއްވެސް ބިދޭސީއަކަށް ޖާގަ ނުދިނުމަށް އަޅުގަނޑުމެން އެންމެން އެއްރޫޙެއްގައި އެއްބާރުލައިގެން ކަމަށެވެ. 

ބޮޑުވެފައިވާ މި މައްސަލައަށް ހައްލު ހޯދަން ކުރަމުން ގެންދާ މަސައްކަތުގެ ދަށުން ރައްޔިތުން މަޖިލީހުން 22، އޮގަސްޓް 2024 ގައި 3، ސެޕްޓެމްބަރު 2024 ގައި ގެޒެޓުކުރި ފޮރިން އިންވެސްޓްމަންޓް ގާނޫނުގެ ދަށުން ރާއްޖޭގައި ބިދޭސީންނަށް ވިޔަފާރި ކުރެވޭނެ ދާއިރާތަކާއި ވިޔަފާރި ކުރުން މަނާ ދާއިރާތައް 8، އޮގަސްޓް 2025 ގައި ވަނީ ކަނޑައަޅާފަ އެވެ. މި ގަވައިދާ ހިލާފަށް މަސައްކަތް ކުރާ ފަރާތްތައް ރިޕޯޓް ކުރަން ވަނީ އިކޮނޮމިކް މިނިސްޓްރީގެ ޕޯޓެލެއް ވަނީ އާއްމުކޮށްފަ އެވެ. އަދި އެ މިނިސްޓްރީން ވަނީ މިކަމަށް ހާއްސަކޮށް 3331999 އަށް ހެނދުނު 8:00 އިން ރޭގަނޑު 8:00 ގެ ނިޔަލަށް ހޮޓްލަައިނެއް ތައާރަފުކޮށްފަ އެވެ. މީގެ އިތުރުން ރިޕޯޓް ކުރަން އިމިގްރޭޝަން ވޮޗް ޕޯޓަލް ވެސް ވަނީ މިކަމަށް ހާއްސަކޮށްފަ އެވެ.  

އަދި ކިޔާލަން - ދިވެހިންނަށް ފުރުސަތު ދޭން ބަދަލެއް | ބިދޭސީންނަށް ނޫޅެވޭ އެފްޑީއައި ލިސްޓެއް