ނޫސްވެރިންގެ އިހުތިޖާޖުގެ ތެރެއިން މީޑިޔާ "ކޮންޓްރޯލް"ކުރާ ބިލު މަޖިލީހަށް ބަލައިގެންފި

މީޑިޔާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ވައްދާފައިވާ ބިލު ބޭރުކޮށްލުމަށް ގޮވާލައި، ނޫސްވެރިން އިހުތިޖާޖު ކުރަމުންދަނިކޮށް، މަޖިލީހަށް އެ ބިލު ބަލައިގެންފި އެވެ.

ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، އެ ބިލު މަޖިލީހަށް މިފަހަރު ވެސް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.

ރާއްޖޭގެ ޑިމޮކްރެޓިކް ނިޒާމެއް ފެށުމުގެ ކުރިން އޮތް ހާލަތަށް ނޫސްވެރިކަން ސޮއްސައިލިޔަ ނުދޭން، އެ ބިލު އިސްލާހުކުރަން ނޫޅެ، އެ ބިލު މަޖިލީހުން ބޭރުކުރަން ނޫސްވެރިން ގޮވައިލަމުން ދިޔައީ، އެ ބިލުގައި ނޫސްވެރިކަމަށާއި ހިޔާލުފާޅު ކުރުމުގެ މިނިވަންކަމަށް ނުރައްކާވާ އެތައް މާއްދާއެއް ހިމަނާފައިވާ ކަމަށް ބުނެ އެވެ.

ނަމަވެސް، މަޖިލިސް ޗުއްޓީގައި އޮއްވައި، ދައުރުން ބޭރުގައި ޖަލްސާއެއް ތާވަލުކޮށް އެ ބިލުގެ ބަހުސް ނިންމައިލީ، ގިނަ އަދަދެއްގެ ނޫސްވެރިން މަޖިލީހުގެ ގެލެރީ އާއި ބޭރުގައި އިހުތިޖާޖު ކުރަމުންދަނިކޮށެވެ.

އެ ބިލގެ ބަހުސްގެ ތެރެއިން ވެސް، އެ ބިލު ބޭރުކުރުމުގެ ވިސްނުމެއް ނެތް ކަން، މަޖިލީހުގެ ސާފު އަޣުލަބިއްޔަތު އޮތް ޕީއެންސީގެ މެމްބަރުންގެ ވާހަކަތަކުން ސާފުވި އެވެ. އެ މެމްބަރުން ވިދާޅުވީ، ރާއްޖޭގައި މިހާރު ސިޔާސީ ފިކުރުގައި ދޮގު ހަބަރު ފެތުރުން އާންމުވެފައިވާއިރު، އެފަދަ ކަންކަން ކުރާ މީޑިޔާތަކާ ދެކޮޅަށް ފިޔަވަޅު އެޅޭނެ ނިޒާމު ހަރުދަނާ ކުރަންޖެހޭ ކަމަށެވެ.

އަދި އެ ބިލާ މެދު ނޫސްވެރިންގެ ހުރި ކަންބޮޑުވުންތައް، ކޮމިޓީ މަރުހަލާގައި އިސްލާހުކުރުމުގެ ފުރުސަތު އޮންނާނެ ކަމަށް ވެސް ގިނަ މެމްބަރުން ވިދާޅުވި އެވެ.

އެއާ އެކު އެ ބިލު މަޖިލީހަށް ބަލައިގެންފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 49 މެމްބަރުންގެ އަޣުލަބިއްޔަތުންނެވެ. އެ ބިލު ބަލައިގަތުމާ ދެކޮޅަށް ވޯޓު ދެއްވީ 12 މެމްބަރެކެވެ.

އެ ބިލު ބަލައިގަތުމާއެކު، މަޖިލީހުގެ ރިޔާސަތުން ވަނީ އެ ބިލު ދިރާސާކުރުމަށް މަޖިލީހުގެ މިނިވަން މުއައްސަސާތަކާބެހޭ ކޮމިޓީއަށް ފޮނުވައިފަ އެވެ.

ބިލްގައިވާ ގޮތުން މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް، ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިއާ ރެގިއުލޭޓްކުރުމުގެ ގާނޫނީ ބާރުތަކެއް ސަރުކާރަށް ލިބެ އެވެ.

ބިލުގައި އޮތީ، މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށްފަހު އުފައްދާ އާ ކޮމިޝަންގައި ތިއްބަވާނީ ހަތް މެމްބަރުންނެވެ. އޭގެ ތެރެއިން މަޖިލީހުގެ ރުހުމާ އެކު ތިން މެމްބަރުން ކޮމިޝަނަށް އައްޔަންކުރުމުގެ ބާރު ރައީސަށް އޮތް ނަމަވެސް ބާކީ ހަތަރު މެންބަރުންނަކީ މީޑިއާތަކުން އިންތިހާބުކުރާ މެންބަރުންނެވެ. ކޮމިޝަންގެ ރައީސަކު ކަނޑަޅުއްވަނީ ބިލްގައިވާ ގޮތުން ރައީސެވެ.

ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭ ގޮތަށެވެ. ވަކިވަކި ނޫސްވެރިން 5،000-25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވެ އެވެ.