ނޫސްވެރިންގެ އާދޭސް އަޑެއް ނޭހި | ބިލު ބޭރުކުރުމުގެ ވިސްނުމެއް ނެތް!

ނޫސްވެރިކަމުގައި އެތައް އަހަރެއް ހޭދަކުރައްވާފައިވާ، ރާއްޖޭގެ އެންމެ ތަޖުރިބާކާރު ނޫސްވެރިން އިއްޔެ އެއް އަޑަކުން ބުނަމުންދަނީ އެއް ވާހަކަ އެކެވެ.

ރައްޔިތުންގެ މަޖިލީހަށް ހުށަހަޅައިގެން މިހާރު ބަހުސް ކުރަމުންދާ ބިލަކީ، އިސްލާހު ކުރެވޭ ވަރަށް ވުރެން ވެސް ނުރައްކާތެރި ބިލެއް ކަމެވެ. ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިޔާތައް ބަންދުކުރެވޭ އެތައް މާއްދާއެއް ހިމަނައިގެން، މީޑިއާތައް ރެގިޔުލޭޓު ކުރުމުގެ ނަމުގައި އެ ބިލު އޮތީ "މަސްހުނި"ކޮށްފަ އެވެ.

ރާއްޖޭގެ ޑިމޮކްރެޓިކް ނިޒާމެއް ފެށުމުގެ ކުރިން އޮތް ހާލަތަށް ނޫސްވެރިކަން ސޮއްސައިލިޔަ ނުދޭން، އެ ބިލު އިސްލާހުކުރަން ނޫޅެ، އެ ބިލު މަޖިލީހުން ބޭރުކުރަން ރާއްޖޭގެ އެންމެ ސީނިއާ ނޫސްވެރިން އިއްޔެ ވަނީ މަޖިލީހުގެ މެމްބަރުންނަށް އާދޭހާ އެކު ގޮވާލައިފަ އެވެ.

ނަމަވެސް، މަޖިލިސް ޗުއްޓީގައި އޮއްވައި، މެމްބަރުން ނެރެ، އެ ބިލު އެޖެންޑާއަށް ލައިގެން، ދައުރުން ބޭރުގެ ޖަލްސާއެއްގައި މެމްބަރުން އެ ގެންދަވަނީ އެ ބިލަށް ބަހުސްކުރައްވަމުންނެވެ.

އާންމު އުސޫލުގެ މަތިން، ސަރުކާރާ ދެކޮޅު މެމްބަރުން ވަނީ އެ ބިލުގެ ނުރައްކާތެރިކަން މަޖިލީހުގެ ފުރިހަމަ އަޣުލަބިއްޔަތު އޮތް ވެރިކަންކުރާ ޕީއެންސީގެ މެމްބަރުންނަށް ވިސްނައި ދެވޭތޯ މަސައްކަތް ކުރައްވަމުންނެވެ.

"ދައުލަތުގެ މުއައްސަސާތަކުން ވައްކަން ކުރީމަ އެކަންތައް ހޯދާ ބަލައި މީޑިއާތަކުގައި ލިޔަން ތިބި ބޭފުޅުންގެ ހަތަރެސްފައި ބަންދުކޮށް ކަސްތޮޅު އަޅައި އެބޭފުޅުން ޖަލަށްލައި، އެބޭފުޅުންނަށް އަދަބު ދީ، ސަރުކާރު ނުރުހޭ ކޮންމެ މީޑިއާއެއް މާލީ ގޮތުން ދަތިކޮށް ޖެއްސުންކޮށް ބަންދުކޮށް ހުދުމުހުތާރު ވެރިކަމަކަށް ޖާގަ ދިނުމަށް ހުށަހަޅާފައި އޮތް ބިލެއް މިއީ އިއްޒަތްތެރި ރައީސް،" ވެލިދޫ ދާއިރާގެ އެމްޑީއޭ މެމްބަރު މުހައްމަދު އައްބާސް ވިދާޅުވި އެވެ. 

ޕީއެންސީގެ ސަރުކާރު ވެސް ވެރިކަމަށް އައީ، އޭރުގެ އިދިކޮޅުގައި އޮތް އިރު، މީޑިޔާގެ މިނިވަންކަމުގެ ފުރިހަމަ ބޭނުން ހިފައި، އޭރު އޮތް ސަރުކާރުން ހެދި ގޯސްތަކުގެ ވާހަކަތައް މީޑިޔާ މެދުވެރިކޮށް ރައްޔިތުންނާ ހަމައަށް ގެނެސްދީގެން ކަން އެ މެމްބަރުން ތަކުރާރުކޮށް ހަނދާންކޮށްދިނެވެ.

ނަމަވެސް، ނޫސްވެރިންގެ އާދޭސް ސަރުކާރު މެމްބަރުންގެ ކަންފަތާ ހަމައަކަށް ނުފޯރި އެވެ. 

މިއަދުގެ ޖަލްސާގެ ހެނދުނުގެ ދަންފަޅީގައި އެ ބިލަށް ވާހަކަ ދެއްކެވި ސަރުކާރަށް ނިސްބަތްވާ ހުރިހާ މެމްބަރުން ވެސް ވަނީ އެ ބިލަށް ތާއީދުކުރައްވައިފަ އެވެ.

އެ މެމްބަރުންނަށް އެ ބިލުން އެއްވެސް ގޯހެއް ނުފެނެ އެވެ. މީޑިޔާތަކުން ފަތުރާ "ދޮގު"ތައް ހުއްޓުވަން ނޫސްވެރިކަމުގެ މިނިވަންކަން އެކީ ހުއްޓުވަން ވެސް އެ މެމްބަރުން ތިބީ ތައްޔާރަށެވެ. 

އެ ބިލުގެ ބައެއް މާއްދާތަކާމެދު ކަންބޮޑުވުންފާޅު ކުރެއްވި ޕީއެންސީގެ މަދު މެމްބަރުންނަށް ވެސް އިސްލާހު ނުކުރެވޭ ފަދަ ނުރައްކަލެއް ނުފެނެ އެވެ. ވިދާޅުވަމުން ގެންދެވީ، މަޝްވަރާކޮށްގެން އެ މާއްދާތައް ކޮމިޓީ މަރުހަލާގައި އިސްލާހުކުރަންޖެހޭ ވާހަކަ އެވެ.

މަޖިލީހުގެ ގެލެރީ އާއި މަޖިލީހުގެ ބޭރުގައި އެތައް ނޫސްވެރިންނެއް ތިބެ ކުރަމުންދާ އާދޭސްތައް އަޑުނަހައި، ޕީއެންސީގެ މެމްބަރުންގެ ރޫހު ހުރީ އެ ބިލު ބަލައިގަތުމަށް ކަން ސާފެވެ. 

ބިލްގައިވާ ގޮތުން މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް، ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިއާ ރެގިއުލޭޓްކުރުމުގެ ގާނޫނީ ބާރުތަކެއް ސަރުކާރަށް ލިބެ އެވެ.

ބިލުގައި އޮތީ، މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށްފަހު އުފައްދާ އާ ކޮމިޝަންގައި ތިއްބަވާނީ ހަތް މެމްބަރުންނެވެ. އޭގެ ތެރެއިން މަޖިލީހުގެ ރުހުމާ އެކު ތިން މެމްބަރުން ކޮމިޝަނަށް އައްޔަންކުރުމުގެ ބާރު ރައީސަށް އޮތް ނަމަވެސް ބާކީ ހަތަރު މެންބަރުންނަކީ މީޑިއާތަކުން އިންތިހާބުކުރާ މެންބަރުންނެވެ. ކޮމިޝަންގެ ރައީސަކު ކަނޑަޅުއްވަނީ ބިލްގައިވާ ގޮތުން ރައީސެވެ.

ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭ ގޮތަށެވެ. ވަކިވަކި ނޫސްވެރިން 5،000-25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވެ އެވެ.

މިކަމާ މީޑިއާތަކުން ވަނީ ކަންބޮޑުވުން ފާޅުކޮށްފަ އެވެ. ނޫސްވެރިކަމާ ބެހޭ ބިލް މަޖިލީހަށް މިފަހަރު ވެސް ހުށަހެޅުއްވީ ތުޅާދޫ ދާއިރާގެ ޕީއެންސީގެ މެމްބަރު އަބްދުލްހަންނާނު އަބޫބަކުރެވެ. އެ ބިލު ހުށަހެޅުއްވި މަގްސަދަކީ ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުން ކަމަށް އޭގައިވެ އެވެ.