ދުވަހަކު ވެސް މީޑިއާ ކޮންޓްރޯލެއް ނުކުރާނަން، ބިލް އިސްލާހު ކުރަން އަންގައިފި

ރައީސް ޑރ. މުއިއްޒު ވިދާޅުވީ މީޑިއާތައް ކޮންޓްރޯލް ކުރުމަކީ އެމަނިކުފާނުގެ އެއްވެސް ޝައުގުވެރިކަމެއް ހުރި ކަމެއްނޫނެވެ. އަދި ރައީސްގެ ކޮންޓްރޯލް އޮންނަ ގޮތަށް ކޮމިޝަންގެ ރައީސް ނަގަން ބޭނުންފުޅެއް ނުވެ އެވެ.

ނޮޅިވަރަންފަރުގައި މިރޭ ވާހަކަ ދައްކަވަމުން ރައީސް ޑރ. މުއިއްޒު ވާހަކަ ދައްކަވަނީ -- ރައީސް އޮފީސް

ދުވަހަކު ވެސް މީޑިއާ ކޮންޓްރޯލް ކުރަން ބޭނުން ނުވާ ކަމަށާއި، މިހާރު ރައްޔިތުން މަޖިލީހުގައި އޮތް މީޑިއާތަކާ ބެހޭ ބިލް އިސްލާހު ކުރަން ޕީއެންސީ މެންބަރުންނަށް އަންގާފައިވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

ހދ.ގެ ރަށްރަށަށް ކުރައްވަމުން ގެންދަވާ ދަތުރުފުޅުގައި ނޮޅިވަރަންފަރުގައި މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޑރ. މުއިއްޒު ވިދާޅުވީ މީޑިއާތައް ކޮންޓްރޯލް ކުރުމަކީ އެ މަނިކުފާނުގެ އެއްވެސް ޝައުގުވެރިކަމެއް ހުރި ކަމެއް ނޫން އެލަން ދުވަހު ވެސް ނުކުރައްވާނެ ކަމަށެވެ. 

"އަޅުގަނޑު އެއްވެސް އިރަކުކުރިކަމެއް ވެސް ނޫން. ކުރާނެ ކަމެއްވެސް ނޫން. އެހެންނަމަވެސް ޒިންމާދާރުކަމާއެކު ހުރިހާ ފަރާތްތަކުން ވެސް އަމަލު ކުރަންވާނީ،" ރައީސް ވިދާޅުވި އެވެ. 

ރައީސް ވިދާޅުވީ މީޑިއާއާ ބެހޭ ބިލެއް މަޖިލީހަށް ހުށަހަޅާފައިވާ ކަމަށާއި، ނަމަވެސް ސަރުކާރު ހިންގާ ޕީއެންސީގެ މެންބަރުންނަށް އެ މަނިކުފާނުގެ އެއްވެސް ކޮންޓްރޯލެއް ލިބޭ ގޮތަށް އެ ބިލްގައި އޮންނަން ބޭނުން ނުވާކަން އަންގަވާފައިވާނެ ކަމަށެވެ. 

"އެ ބިލްގައި އެބައޮތް ރައީސް އައްޔަން ކުރާ މެންބަރެކޭ އެ ބިލް ގާނޫނަކަށް ވާނަމަ [ކޮމިޝަން] ގެ ރައީސްއަކަށް ހުންނާނީ. އެގޮތަކަށް އެކަމެއް ނުކުރާނަން. އަންގާފައިވާނެ އިސްލާހު ކުރާ މަރުހަލާއަކަށް ގޮސްފިނަމަ ކޮމިޝަންގެ ތެރޭން ހޮވާ މެންބަރެކޭ [މީޑިއާ ކޮމިޝަން] ގެ ރައީސްއަކަށް ވާންވާނީ. އަޅުގަނޑު ބޭނުމެއް ނޫން މީޑިއާއަށް ނުފޫޒުފޯރުވާ ބަޔަކަށްވާކަށް. މީޑިއާ ވާން ޖެހޭނީ މިނިވަންކަމާއެކު އޮޕަރޭޓް ކުރާ ބަޔަކަށް،" ރައީސް ވިދާޅުވި އެވެ. 

ބިލްގައި އޮތީ - މަޖިލީހުގައި މިހާރު އޮތް ބިލްގައިވާ ގޮތުން މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް، ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިއާ ރެގިއުލޭޓްކުރުމުގެ ގާނޫނީ ބާރުތަކެއް ސަރުކާރަށް ލިބެ އެވެ. 

ބިލުގައި އޮތީ، މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށްފަހު އުފައްދާ އާ ކޮމިޝަންގައި ތިއްބަވާނީ ހަތް މެމްބަރުންނެވެ. އޭގެ ތެރެއިން މަޖިލީހުގެ ރުހުމާ އެކު ތިން މެމްބަރުން ކޮމިޝަނަށް އައްޔަންކުރުމުގެ ބާރު ރައީސަށް އޮތް ނަމަވެސް ބާކީ ހަތަރު މެންބަރުންނަކީ މީޑިއާތަކުން އިންތިހާބުކުރާ މެންބަރުންނެވެ. ކޮމިޝަންގެ ރައީސަކު ކަނޑަޅުއްވަނީ ބިލްގައިވާ ގޮތުން ރައީސެވެ.

ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭ ގޮތަށެވެ. ވަކިވަކި ނޫސްވެރިން 5،000-25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވެ އެވެ.

މިކަމާ މީޑިއާތަކުން ވަނީ ކަންބޮޑުވުން ފާޅުކޮށްފަ އެވެ. ނޫސްވެރިކަމާ ބެހޭ ބިލް މަޖިލީހަށް މިފަހަރު ވެސް ހުށަހެޅުއްވީ ތުޅާދޫ ދާއިރާގެ ޕީއެންސީގެ މެމްބަރު އަބްދުލްހަންނާނު އަބޫބަކުރެވެ. އެ ބިލު ހުށަހެޅުއްވި މަގްސަދަކީ ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުން ކަމަށް އޭގައިވެ އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.