ބޮޑެތި އަދަދުތަކުން ނޫސްވެރިން ޖޫރިމަނާ ކުރެވޭ ގޮތަށް ހުށަހެޅި ބިލާ މެދު ކަންބޮޑުވުން

މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް، ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިޔާ ރެގިއުލޭޓްކުރުމުގެ ގާނޫނީ ބާރު ލިބޭ ގޮތަށް ރައްޔިތުންގެ މަޖިލީހަށް ހުށަހެޅި އާ ބިލާ މެދު ބޮޑެތި ކަންބޮޑުވުންތައް ބަންޑުންވެއްޖެ އެވެ.

ނޫސްވެރިކަމާ ބެހޭ ބިލް މަޖިލީހަށް މިފަހަރު ވެސް ހުށަހެޅުއްވީ ތުޅާދޫ ދާއިރާގެ ޕީއެންސީގެ މެމްބަރު އަބްދުލްހަންނާނު އަބޫބަކުރެވެ. އެ ބިލު ހުށަހެޅުއްވި މަގްސަދަކީ، ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުން ކަމަށް އޭގައިވެ އެވެ.

އެ ބިލުގެ ފުރަތަމަ ކިޔުން އިއްވުމާއި އިބްތިދާއީ ބަހުސް މަޖިލީހުގެ މިއަދުގެ ޖަލްސާއަށް ތާވަލުކޮށްފައިވާއިރު، މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށްފަހު އުފައްދާ އާ ކޮމިޝަންގައި ތިއްބަވާނީ ހަތް މެމްބަރުންނެވެ. އޭގެ ތެރެއިން މަޖިލީހުގެ ރުހުމާ އެކު ތިން މެމްބަރުން ކޮމިޝަނަށް އައްޔަންކުރުމުގެ ބާރު ރައީސަށް އޮތް ނަމަވެސް ބާކީ ހަތަރު މެންބަރުންނަކީ މީޑިއާތަކުން އިންތިހާބުކުރާ މެންބަރުންނެވެ. ކޮމިޝަންގެ ރައީސަކު ކަނޑަޅުއްވަނީ ބިލްގައިވާ ގޮތުން ރައީސެވެ.

ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭ ގޮތަށެވެ. ވަކިވަކި ނޫސްވެރިން 5،000-25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވެ އެވެ.

އެ ބިލާ މެދު ކަންބޮޑުވުންފާޅު ކުރައްވައި، އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއީލް ވަނީ، މިއީ ރާއްޖޭގެ ނޫސްވެރިކަމުގެ މިނިވަންކަން ނިގުޅައިގަތުމަށް ސަރުކާރު ފަހަތުގައި އޮވެގެން އަނެއްކާވެސް ކުރަން އުޅޭ ކަމެއްގެ ގޮތުގައި ސިފަ ކުރައްވައިފަ އެވެ. 

ނޫސްވެރިކަމަކީ ޑިމޮކްރަސީގެ މައިބަދައިގެ ގޮތުގައި ސިފަކުރައްވައި، ފައްޔާޒް ވިދާޅުވީ މި ބިލުގެ ސަބަބުން މީޑިޔާތަކާއި ނޫސްވެރިންނަށް އޮތް ރައްކާތެރިކަން ނިގުޅައިގަނެ، ނޫސްވެރިކަން ރެގިއުލޭޓްކުރުމުގެ ބާރު ސީދާ ރައީސްގެ މުށުތެރެއަށް ގެންދެވޭ ކަމަށެވެ. 

"ތެދު ހާމަކޮށްގެން ނޫސްވެރިންނަށް އަދަބު ދިނުމުގެ މާޒީ އިޔާދަ ކުރެވިގެން ނުވާނެ،" ފައްޔާޒް ވިދާޅުވި އެވެ.

ރާއްޖޭގެ ނޫސްވެރިންގެ ޖަމިއްޔާ، އެމްޖޭއޭއިން ވެސް ވަނީ މި ބިލާ މެދު ކަންބޮޑުވުންފާޅުކޮށް، މި ބިލަށް މަޖިލީހުން ތާއީދުނުކުރުމަށް ގޮވާލައިފަ އެވެ.

އެމްޖޭއޭއިން ރޭ ނެރުނު ބަޔާނެއްގައި ބުނީ، އަބްދުލްހައްނާނު ކުރިން ހުށަހެޅުއްވި ބިލެކޭ އެއްފަދައިން، މި ބިލަކީ ރާއްޖޭގެ ނޫސްވެރިކަމާއި މީޑިއާގެ މިނިވަންކަން އެކީހެން ގެއްލިގެން ދާނޭ ބިލެއް ކަމަށް ދެކޭ ކަމަށެވެ. 

އަދި މި ބިލު ފަރުމާކޮށްފައި އޮތީ މީޑިއާތައް ރެގިއުލޭޓް ކުރުމުގެ ބޮޑެތި ބާރުތަކެއް ރައީސުލްޖުމްހޫރިއްޔާގެ މުށުތެރެއަށް ޖަމާކޮށް، މީޑިއާތައް ސަރުކާރުގެ ފުރިހަމަ ބާރުގެ ދަށަށް ގެނެސް، ނޫސްވެރިން ބިރުވެރިކަމެއްގެ ތެރޭގައި ބޭއްވުމުގެ ފަލްސަފާގައި ކަމަށް އެ ޖަމްއިއްޔާއިން ބުންޏެވެ.

"ނޫސްވެރިންނާއި މީޑިޔާތައް ކުށްވެރިވާ ގޮތަށް ހުރި މާއްދާތަކުގައި މާނަ ސާފުނުވާ، ނާޖާއިޒު މަންފާ ނެގޭނޭ ފަދަ ގިނަ އިބާރާތްތަކެއް އެ ބިލްގައި ހިމަނާފައިވާއިރު ނޫސްތައް ބަންދުކޮށް، ޖޫރިމަނާކޮށް ނޫސްވެރިންނަށް ބޮޑެތި އަދަބުތަކެއް ދޭން އެބިލުގައި ހިމަނާފައިވުމަކީ މި ޖަމްއިއްޔާއިން ދެކޮޅު ހަދާކަމެކެވެ. އަދި މިއީ މިނިވަން ނޫސްވެރިކަން އެކީ މަރާލުމެވެ،" އެމްޖޭއޭއިން ބުންޏެވެ.

"އެ ބިލް އަނބުރާ ގެންދިޔުމަށް އެންމެހާ ނޫސްވެރިންގެ ފަރާތުން ބިލް ހުށަހެޅި މެންބަރަށް މި ޖަމްއިއްޔާއިން ގޮވާލަމެވެ. އަދި މަޖިލީހުގެ މެޖޯރިޓީ ޕާޓީ އަދި ވެރިކަން ކުރާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ)އަށް ވެސް މި ޖަމްއިއްޔާއިން ގޮވާލަނީ އެ ބިލަށް ވޯޓް ނުދީ ބިލް ރައްޔިތުންގެ މަޖިލީހުން ބޭރުކޮށްލުމަށެވެ."