މިއަދުން ފެށިގެން ހައުސިން މިނިސްޓްރީއާއި، އެންވަޔަރަމެންޓު މިނިސްޓްރީއާއި އެ މިނިސްޓްރީގެ ދަށުން ހިންގާ އީޕީއޭގެ އިތުރަށް ކޮންސްޓްރަކްޝަން މިނިސްޓްރީން ފޯރުކޮށްދެމުން އައި ހިދުމަތްތައް ދަރުބާރުގެއިން ލިބޭނެ އެވެ.
ފާއިތުވި ހަފުތާ ބުރާސްފަތި ދުވަހު މާލޭގައި ހިނގި އަލިފާނުގެ ހާދިސާގައި ރޯވެ އަނދައި ހުލިވި އިމާރާތުގައި ހިންގަމުން އައި ތިން މިނިސްޓްރީގެ މަސައްކަތް ދަރުބާރުގޭގައި ފަށައިފި އެވެ.
ބުރާސްފަތިދުވަހުގެ އަލިފާނުގެ ހާދިސާގައި ސުންނާފަތިވި އިމާރާތުގައި މިނިސްޓްރީ އޮފް ހައުސިންގެ އިތުރަށް ކޮންސްޓްރަކްޝަން މިނިސްޓްރީއާއި އެންވަޔަރަމެންޓު މިނިސްޓްރީ ހިންގަމުންދިޔަ އެވެ. އެ އިމާރާތުގެ އެންމެ ބުރިއެއް ފިޔަވައި ހުރިހާ ފަންގިފިލާއެއް އެ ހާދިސާގައި ވެއްޓިފައިވެ އެވެ.
އެ ހާދިސާގެ ސަބަބުން ބޭނުންނުކުރެވޭ މިންވަރަށް އެ އިމާރާތް ހަލާކުވުމާ ގުޅިގެން އެ މިނިސްޓްރީތަކުގެ މަސައްކަތް ވަގުތީ ގޮތުން ދަރުބާރުގެއަށް ބަދަލުކުރުމަށް ކުރަންޖެހޭ މަސައްކަތްތައް ހައުސިން ޑިވެލޮޕްމެންޓު ކޯޕަރޭޝަނާއި ސްޓެލްކޯގެ އިސްނެގުމަށް ވަރަށް ހަލުއިކޮށް ހަފުތާ ބަންދުގައި ކުރިއަށްގެންގޮސް ރޭވަނީ ނިންމާލާފަ އެވެ.
އެއާއެކު، މިއަދުން ފެށިގެން ހައުސިން މިނިސްޓްރީއާއި، އެންވަޔަރަމެންޓު މިނިސްޓްރީއާއި އެ މިނިސްޓްރީގެ ދަށުން ހިންގާ އެންވަޔަރަމެންޓު ޕްރޮޓެކްޝަން އެޖެންސީ (އީޕީއޭ)ގެ އިތުރަށް ކޮންސްޓްރަކްޝަން މިނިސްޓްރީން ފޯރުކޮށްދެމުން އައި ހިދުމަތްތައް ދަރުބާރުގެއިން ލިބޭނެ އެވެ.
ވަގުތީ ގޮތުން ދަރުބާރުގޭގައި މިނިސްޓްރީތަކުގެ ހިދުމަތްތައް ފަށާފައިވާއިރު އިއްޔެ އޮތް ނޫސްވެރިންގެ ބައްދަލުވުމެއްގައި މިނިސްޓަރުން ވިދާޅުވެފައިވަނީ އެ ވުޒާރާތަކުން އާންމުންނަށް ފޯރުކޮށްދެމުން އައި ހިދުމަތްތަކަށް އެއްވެސް ކަހަލަ ބުރުލެއް ނާރައި ހިދުމަތް ލިބެމުންދާނެ ކަމަށެވެ.
ބުރާސްފަތިދުވަހުގެ އަލިފާނުގެ ހާދިސާ ހިނގި ސަބަބެއް މިހާތަނަށް ސަރުކާރުން ހާމަނުކުރާއިރު އެ ހާދިސާ ތަހުގީގުކުރަން ފުލުހުންވަނީ ފަށާފަ އެވެ. އެގޮތުން އެ ސަރަހައްދުގައި އެވަގުތު ތިބި މީހުންގެ ބަޔާންތައް ނަގައި، އެ ސަރަހައްދުގައި ހުރި ސީސީޓީވީތަކުގެ ވީޑިޔޯ ފުޓޭޖުތައް އެނަލައިސްކުރަންވަނީ ފަށާފަ އެވެ.
ކޮމިޝަނާ އޮފް ޕޮލިސް އަލީ ޝުޖާވަނީ އެ ތަހުގީގުގައި ބޭރު ޓީމެއްގެ އެހީތެރިކަން ހޯދުމަށް ނިންމާފައިވާކަން އިއްޔެ އިއުލާނު ކުރައްވާފަ އެވެ.