ވިސްނުމަކީ އާބަން ސެންޓަރުތަކުގައި އެންމެ މަތީ ފަންތީގެ ހިދުމަތްތައް ގާއިމުކުރުން: ރައީސް

ސަރުކާރުގެ ވިސްނުމަކީ އާބަން ސެންޓަރުތަކުގެ ގޮތުގައި ތަރައްގީކުރަން ކަނޑައަޅާފައިވާ ހަތް ރަށުގައި މަތީ ފަންތީގެ ހިދުމަތްތައް ގާއިމުކުރުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ރާއްޖޭގެ އުތުރުގައި އިންޓަގްރޭޓެޑް ޑިވެލޮޕްމެންޓު ޒޯނުތަކުގެ ގޮތުގައި ދެ ސަރަހައްދު ތަރައްގީކުރުމުގެ އިތުރަށް އިތުރު ހަތް ރަށް އާބަން ސެންޓަރުގެ ގޮތުގައި ތަރައްގީކުރަން ސަރުކާރުން ކަނޑައަޅާފައިވެ އެވެ. ސަރަހައްދީ ތަރައްގީއަށް އިސްކަންދީގެން ހަތް އާބަން ސެންޓަރު ގާއިމުކުރެއްވުމަކީ ރައީސްގެ ރިޔާސީ ވައުދުފުޅެކެވެ. 

ރައީސްގެ ވައުދުފުޅާ އެއްގޮތަށް، އާބަން ސެންޓަރުތައް ގާއިމްކުރާ ރަށްތައް ހައުސިން މިނިސްޓްރީން ވަނީ އިއުލާނުކޮށްފަ އެވެ. އެއީ؛

އދ.އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން އެ އަތޮޅުގައި އާބަން ސެންޓަރެއްގެ ގޮތުގައި ތަރައްގީކުރަން ނިންމާފައިވާ މަހިބަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ އާބަން ސެންޓަރުގެ ގޮތުގައި ތަރައްގީ ކުރާ ރަށްތައް ސަރުކާރުން ކަނޑައެޅީ ވަރަށް ގިނަ ކަންކަމަށް ބެލުމަށްފަހު ކަމަށެވެ. 

އަދި ރައީސް ވިދާޅުވި ގޮތުގައި އާބަން ސެންޓަރުތަކުގެ ގޮތުގައި ކަނޑައަޅާފައިވާ ހަތް ރަށް ތަރައްގީކުރަނީ އެ ރަށްތަކުގައި އެންމެ މަތީ ފަންތީގެ ހުރިހާ ކަމެއް ގާއިމުކުރުމުގެ ކޮންސެޕްޓުގައި ނުވަތަ ވިސްނުމުގަ އެވެ. އަދި އެގޮތަށް މަތީ ފަންތީގެ ހިދުމަތްތައް ގާއިމުކުރެވިފައިވާ މަރުކަަޒުތަކެއް ތަރައްގީކުރުމަކީ ދިވެހިރާއްޖެ ދުރު ރާސްތާގައި ތަރައްގީކުރާނަމަ ކުރަންޖެހޭނެ ކަމެއް ކަމުގައިވެސް ރައީސް ވިދާޅުވި އެވެ. 

ތައުލީމީ، ސިއްހީ އަދި އެހެނިހެން އިޖުތިމާއީ ހިދުމަތްތައް އެންމެ ރަނގަޅު ފެންވަރުގައި ލިބޭ މަރުކަޒުތަކެއް ރާއްޖޭގެ ހުރިހާ ކަންކޮޅުތަކެއްގައި ގާއިމުކުރެވުމަކީ، އާބާދީއާއި ތަރައްގީ އެއްފަސްކުރުމުގެ ސިޔާސަތުގެ ތެރެއިން ރާއްޖެއަށް ދެމެހެއްޓެނެވި ތަރައްގީ ހާސިލުކުރެވޭނެ ގޮތް ކަމަށްވެސް އެމަނިކުފާނު ވިދާޅުވި އެވެ. 

"މި ހަތް އާބަން ސެންޓަރު މި ތަރައްގީކުރަނީ، މިތަންތަނުގައި އެންމެ މަތީ ފަންތީގެ ހުރިހާ ކަމެއް ގާއިމުކުރުމުގެ ކޮންސެޕްޓުގައި، ވިސްނުމުގައި. އެއީ ދުރުރާސްތާގެ ތަރައްގީއަށް ރާއްޖެ ބައްޓަންކުރާކަމަށްވާނަމަ ކުރަންޖެހޭ ކަމެއް ކަމުގައިވާތީ.،" ރައީސް ވިދާޅުވި އެވެ. 

"އެންމެ ރަނގަޅު ފެންވަރުގައި ހިދުމަތް ލިބޭ ސަރަހައްދުތަކެއް ރާއްޖޭގެ އެކި ކަންކޮޅުތަކުގައި ގާއިމުވެގެން ދިއުން ވެގެންދާނީ އާބާދީއާއި ތަރައްގީ އެއްފަސްކުރުމުގެ ސިޔާސަތުގެ ތެރެއިން ރާއްޖެއަށް ދެމެހެއްޓެނެވި ތަރައްގީ އަންނާނެ ކަންތައް ކަމުގަ. އެއީ ރާއްޖޭގެ ގުދުރަތީ ގޮތުން އޮތް ހަގީގަތްތަކަށް ބަލާއިރުވެސް ކްލައިމަޓް ޗޭންޖުން އަންނަ އެކި ކަންކަމަށް ބަލާއިރުވެސް އަދި އެހެން ހުރިހާ ގޮތަކުން ބަލާއިރު، އެންމެ މަތީ ފަންތީގައި ކޮންމެ ރައްޔިތުންނަށް ހިދުމަތް ދޭން ބަލާއިރު ރާއްޖޭގައި ސަރަހައްދުތަކެއް ތަރައްގީވާންޖެހޭ،" 

ރައީސް ފާހަގަކުރެއްވި ގޮތުގައި މިހާރު ކަނޑައަޅާފައި އޮތް ހަތް ރަށަކީ ރާއްޖޭގެ މުސްތަގުބަލަށްޓަކައި ކޮންމެހެން ތަރައްގީކުރަންޖެހޭ ހަތް ރަށެވެ. އެ ހަތް ރަށް ފިޔަވައި އެހެން ރަށްތައްވެސް ތަރައްގީކުރައްވާނެ ކަމުގައި ރައީސް ވިދާޅުވި އެވެ. 

ރައީސް ކުރިންވެސް ވިދާޅުވެފައިވަނީ އާބަން ސެންޓަރުތައް ތަރައްގީކޮށް އެ ރަށްތަކުން ހުރިހާ ދާއިރާއެއްގެ މަތީ ފަންތީގެ ހިދުމަތްތައް ގާއިމުކުރި ނަމަވެސް ކުދި ރަށްރަށް ބޭނުންވާ ތަރައްގީގެ މަސައްކަތްތައްވެސް އަންނަ އަހަރުން ފެށިގެން ކުރިއަށްދާނެ އެވެ. އަދި ތަރައްގީގެ މަސައްކަތް ކުރުމުގައި ކުދި ރަށްތައް އެއްފަރާތް ނުކުރައްވާނެ ކަމުގެ ޔަގީންކަން ރައީސް ދެއްވި އެވެ.