މިހާތަނަށް ވަޑައިނުގެންނެވޭ ހުރިހާ ރަށަކަށް އަންނަ އަހަރު ރައީސް ވަޑައގަންނަވާނެ

ކައުންސިލުތަކާ ބައްދަލުކުރައްވަން ކުރެއްވި ދަތުރުފުޅުގައި ވަޑައިނުގެންނެވޭ ހުރިހާ ރަށަކަށް އަންނަ އަހަރު ވަޑައިގަންނަވާނެކަން ރައީސް މުއިއްޒު މިއަދު މަހިބަދޫގައިވަނީ އިއުލާނު ކުރައްވާފަ އެވެ.

ރައީސް ޑރ.މުހައްމަދު މުއިއްޒުގެ ދަތުރުފުޅެއްގެ ތެރެއިން، ފޮޓޯ: ރައީސް އޮފީސް

ރަށްރަށު ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަށް މި އަހަރު ތެރޭ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަތޮޅުތެރެއަށް ކުރެއްވި ދަތުރުފުޅުތަކުގައި ވަޑައިނުގެންނެވޭ ހުރިހާ ރަށްތަކަކަށް އަންނަ އަހަރު ވަޑައިގަންނަވާނެކަން އިއުލާނު ކުރައްވައިފި އެވެ. 

ކައުންސިލުތަކާ ބައްދަލުކުރެއްވުމަށް ކުރައްވާ ސިލްސިލާ ދަތުރުފުޅުގެ ތެރެއިން އދ.އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގައި މަހިބަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ކައުންސިލުތަކާ ބައްދަލުކުރައްވާ ގޮތަށް ހުރިހާ ރަށެއްގެ ރައްޔިތުންނާ ބައްދަލުކުރައްވަން ބޭނުންފުޅުވާ ކަމަށެވެ. 

އެމަނިކުފާނުގެ ދަތުރުފުޅުތައް މިހާރު އިންތިޒާމުވެފައި އޮންނަ ގޮތުން އެއްވެސް އަތޮޅެއްގެ ހުރިހާ ރަށަކަށް ވަޑައިނުގަންނަވަަ އެވެ. ދަތުރުފުޅުގައި ވަޑައިގަތުމަށް ހަމަޖެހިފައިވާ ރަށްތަކުގެ ތެރެއިން ރަށެއްގައި އެހެން ރަށްރަށުގެ ކައުންސިލުތަކާ ރައީސް ބައްދަލުކުރައްވަނީ އެވެ. 

ރައީސް ފާހަގަކުރެއްވި ގޮތުގައި މިހާރު އދ.އަތޮޅަށް ކުރައްވާ ދަތުރުފުޅުގައި އެ އަތޮޅު ރަށްތަކުގެ ކައުންސިލުތަކާ ބައްދަލުކުރެއްވުމުން، އެމަނިކުފާނަށް ބައްދަލުނުކުރެއްވި އޮންނާނީ މުޅި ރާއްޖެއިން އެންމެ ހަތަރު ކައުންސިލާ އެވެ. 

ކައުންސިލުތަކާ ބައްދަލުކުރެއްވުމުގެ ދަތުރުފުޅުތަކަށްފަހު ދެން އޮތީ އެ ދަތުރުފުޅުގައި އެމަނިކުފާނަށް ވަޑައިނުގެންނެވޭ ހުރިހާ ރަށަކަށް ވަޑައިގަތުމުގެ ދަތުރުފުޅު ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވީ އެ ދަތުރުފުޅު ކުރައްވާނީ އަހަރު ތެރެއަށް ބައްސަވާލައްވައިގެން އަހަރު ނިމުމުގެ ކުރިން ހުރިހާ ރަށަކަށް ވަޑައިގެންނެވޭ ގޮތަށް ކަމަށެވެ. 

އިތުރަށް ރައީސް ވިދާޅުވީ އެ ދަތުރުފުޅުގައި ހުރިހާ ރަށެއްގެ ރައްޔިތުންނާ ބައްދަލުކުރައްވާނެ ކަމަށެވެ. އެއިރުން ސީދާ ރައްޔިތުންގެ ފަރާތުން އެމަނިކުފާނަށް ކަންކަން އެނގިވަޑައިގަންނަވާނެ ކަމަަށާއި، ބޭނުންފުޅުވަނީ ސީދާ ރައްޔިތުންނާ ބައްދަލުކުރައްވައި ރައްޔިތުން ބޭނުންވާ ގޮތަށް ކަންކަން ކުރައްވަން ކަމަށް ރައީސް ވިދާޅުވި އެވެ. 

"އަޅުގަނޑު ދެން ކުރަން ނިންމާފައި އޮތީ އަޅުގަނޑު ނުދާ ހުރިހާ ރަށަކަށް ދިއުމުގެ ދަތުރުތައް. އެހެންވީމާ މިދާއިރާގެ ދެން ހުރި ރަށްތަކަށް، މިއަތޮޅުގައިވެސް ނުދެވި ހުރި ރަށްތަކަށް އަދި މުޅި ރާއްޖޭގައިވެސް ނުދެވި ހުރި ރަށްތަކަށް މުޅި އަހަރު ތެރެއަށް ބަހާލައިގެން މި އަންނަ އަހަރު ނިމުމުގެ ކުރިން ރާއްޖޭގެ ކޮންމެ ރަށަކަށް އަޅުގަނޑު ދާނަން،" ރައީސް ވިދާޅުވި އެވެ. 

"އެއިރުން ތިބޭފުޅުންގެ ފަރާތްޕުޅުން އަޅުގަނޑަށް ސީދާ ކަންކަން އެނގިގެންދާނެ އަަދި ތިބޭފުޅުންނަށް [ބޭނުންވާ] ކަންކަން ވިދާޅުވެވޭނެ. ސީދާ ރައްޔިތުން ބޭނުންވާ ގޮތަށް ކަންކަން ގެންދިއުމުގައި އަޅުގަނޑަށް ވަރަށް ފަސޭހަވެގެންދާނެ، ރައްޔިތުންނާ ސީދާ ބައްދަލުކޮށްގެން ކަންކަން ކުރުމުގެ ބޭނުމުގައި،" 

ރައީސް އިތުރަށް ވިދާޅުވީ ރާއްޖޭގެ ހުރިހާ ރަށަކަށް އަންނަ އަހަރުގެ ނިޔަލަށް ވަޑައިގަތުމަށްފަހު، 2027 ވަނަ އަހަރުވެސް ހުރިހާ ރަށަކަށް ވަޑައިގަންނަވަން ވިސްނަވާ ކަމަށެވެ. އެއީ ދައުރުގެ ތެރޭގައި ދެ ބުރަށް ހުރިހާ ރަށަކަށް ވަޑައިގަތުމަށް ވެވަޑައިގެންނެވި ވައުދުފުޅު ފުއްދެވުމަށް ކަމުގައި ރައީސް ވިދާޅުވި އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.