ރައީސް އދ.އަތޮޅަށް ކުރައްވާ ދަތުރުފުޅެއްގައި ފުރާވަޑައިގެންފި

ރަށްރަށުގެ ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަށް ސިލްސިލާ ގޮތެއްގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރައްވަމުންދާ ދަތުރުފުޅުގެ ތެރެއިން އދ. އަތޮޅުގެ ރަށްތަކަށް ކުރައްވާ ދަތުރުފުޅެއްގައި ފުރާވަޑައިގެންފި އެވެ. 

ފާއިތުވި ހަފުތާގައި ރައީސްވަނީ އއ.އަތޮޅާއި ކ.،އަތޮޅުގެ ބައެއް ރަށްތަކަށް ދަތުރުކުރައްވައި އެ ދެ އަތޮޅުގެ އެކި ރަށްރަށުގެ ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއެކު ބައްދަލުވުންތަކެއް ބާއްވަވާފަ އެވެ. 

އަދި މި ދަތުރުފުޅުގައި އެ ރަށްތަކުގެ ރައްޔިތުންނާ ބައްދަލުކުރައްވައި ރައީސްވަނީ އެ ރަށްތަކުގައި އަންނަ އަހަރު ސަރުކާރުން ކުރިއަށްގެންދަން ނިންމާފައިވާ މަޝްރޫއުތަކުގެ ތަފުސީލުތައް ހިއްސާކުރައްވައި، ފާއިތުވި އަހަރު ސަރުކާރުން ކޮށްފަައިވާ މުހިއްމު މަސައްކަތްތަކަށް އަލިއަޅުއްވާލައްވައި ވާހަކަފުޅުދައްކަވާފަ އެވެ. 

މިއަދު ރައީސް އދ.އަތޮޅުގެ ރަށްތަކަށް ފައްޓަވާ ދެ ދުވަހުގެ ދަތުރުފުޅުގައި ތިން ރަށަކަށް އެމަނިކުފާނު ވަޑައިގަތުމަށް ހަމަޖެހިފައިވާކަމަށް ރައީސް އޮފީހުން ބުނެ އެވެ. އެއީ: 

މި ދަތުރުފުޅުގައި ފުރަތަމަ ވަޑައިގަތުމަށް ހަމަޖެހިފައިވަނީ އދ.ދަނގެއްޗަށެވެ. އެއަށްފަހު ބާކީ އޮތް ތިން ރަށަށް ވަޑައިގަންނަވާނެ އެވެ. 

މި ދަތުރުފުޅުތަކުގައި ރައީސް އަރިހުގައި ސަރުކާރުގެ ވަޒީރުންނާއި އިސް މަސްއޫލުވެރިން ހިމެނިވަޑައިގަންނަވާ މަތީ ފަންތީގެ ވަފުދެއް ބައިވެރިވެވަޑައިގަންނަވަ އެވެ. 

ކައުންސިލުތަކުން ރައީސުލްޖުމްހޫރިއްޔާގެ އަރިހަށް މާލެއަށް އައުމުގެ ބަދަލުގައި ރައީސް އަތޮޅުތަކަށް ވަޑައިގެން ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަކީ ރައީސް މުއިއްޒު ފައްޓަވާފައިވާ މަސައްކަތްޕުޅެކެވެ. 

ކައުންސިލުތަކުގެ އަޑުއައްސަވައިގެން ރަށްރަށަށް އެންމެ ބޮޑަށް ބޭނުންވެފައި ހުރި ކަންކަމަށް އިސްކަންދެއްވައިގެން ސަރުކާރުގެ މަސައްކަތްތައް ތަރުތީބުކުރެއްވުމަކީ ރައީސް މުއިއްޒުގެ މުހިއްމު ސިޔާސަތެކެވެ.