ޕާޓީ ބަދަލުކުރުމުން ގޮނޑި ގެއްލުމުގެ އިސްލާހަކީ ރައްޔިތުންނަށް ބާރު ދިނުން: އަބްދުއްރަހީމް

އަބްދުއްރަހީމް ވިދާޅުވި ގޮތުގައި މަޖިލީހަށް ވަކި ޕާޓީއެއްގެ ޓިކެޓުގައި އިންތިހާބުވެވަޑައިގަންނަވާ މެންބަރު ޕާޓީ ބަދަލުކުރުމުން އޭނާގެ މެންބަރުކަން ގެއްލޭ ގޮތަށް އޮތުމަކީ ރައްޔިތުންގެ އަތްމަތީގައި ބާރު ދެމި އޮންނަ ގޮތަށް ގެނެވުނު އިސްލާހެއް

މަޖިލީހުގެ ރިޔާސަތުގައި އަބްދުއްރަހީމް

ރައްޔިތުންގެ މަޖިލީހުގެ މެންބަރުން ވަކި ޕާޓީއަކުން އިންތިހާބުވެވަޑައިގަތުމަށްފަހު ޕާޓީ ބަދަލުކުރެއްވުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހަކީ ރައްޔިތުންނަށް ބާރުވެރިކަން ހޯދައިދޭ އިސްލާހެއްކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

މަަޖިލީހުގެ މި ދައުރު ނިންމައިލުމަށްފަހު މަޖިލިސް ޗުއްޓީއަކަށް ދިއުމާ ގުޅިގެން ޕީއެސްއެމްގެ ބާބު ޕްރޮގުރާމަށް ދެއްވި ބަސްދީގަތުމެއްގައި މަޖިލީހުގެ ރައީސް ވިދާޅުވީ މި ދައުރު މަޖިލީހުން ކުރެވުނު އެންމެ މުހިއްމު އަދި ބޮޑު މަސައްކަތަކީ ގާނޫނުއަސާސީއަށް ގެނެވުނު އިސްލާހުތައް ކަމަށެވެ. 

އަބްދުއްރަހީމް ވިދާޅުވީ ވިހިވަނަ މަޖިލީހުގެ ދެވަނަ ދައުރު ނިމިގެންދިޔައީ ވަރަށް މުހިއްމު މަސައްކަތްތަކެއް ކުރުމަށްފަހު ކަމަށެވެ. އަދި މި ދައުރުގައި ކުރެވުނު އެންމެ މުހިއްމު މަސައްކަތަކީ ގާނޫނުއަސާސީއަށް ގެނައި އިސްލާހުތައްކަން ފާހަގަކުރައްވައި އަބްދުއްރަހީމް ވިދާޅުވީ އެ އިސްލާހުތަކަކީ ރައްޔިތުންގެ އަތްމަތީގައި ރައްޔިތުންގެ ބާރުވެރިކަން ބޭއްވުމަށް ޖާގަ ހޯދައިދިން އިސްލާހުތަކެއް ކަމަށެވެ. 

އިތުރަށް އަބްދުއްރަހީމްް ވިދާޅުވީ ގާނޫނުއަސާސީއަށް ގެނެވުނު އިސްލާހުތަކާމެދު ހިތްޕުޅުހަމަޖެހިވަޑައިނުގެން ފާޑުވިދާޅުވާ ބޭފުޅުން ދައްކަވަނީ ގާނޫނުއަސާސީއަށް ގެނައި އިސްލާހުތަކުގެ ތެރެއިން އެންމެ އިސްލާހެއްގެ ވާހަކަ ކަމަަށެވެ. އެއީ މަޖިލީހުގެ މެންބަރުން ޕާޓީ ބަދަލުކުރެއްވުމުން ނުވަތަ މުސްތަަގިއްލު މެންބަރެއްގެ ގޮތުގައި ހޮވިވަޑައިގަތުމަށްފަހު ޕާޓީއަކާ ގުޅިވަޑައިގަންނަވާ މެންބަރުންގެ ގޮނޑި ގެއްލޭ ގޮތަށް ގެނައި އިސްލާހުކަން ފާހަގަކުރެއްވި އެވެ. 

ދިވެހިރާއްޖޭގެ ސަަރަހައްދު އިތުރަށް ފުޅާކޮށް ސަރަހައްދަށް ބަދަލެއް ގެނެވޭނީ މަޖިލީހުގެ މެންބަރުންގެ ހަތަރު ބައިކުޅަ ތިން ބައިގެ އަޣުލަބިއްޔަތުން ފާސްކުރުމަށްފަހު ކަމުގައި ކަނޑައެޅި އިސްލާހާއި، މަޖިލީހުން ފާސްނުކޮށް ބޭރުގެ ސިފައިންނަށް ރާއްޖޭގައި ނުތިބެވޭ ގޮތަށް ގެނައި އިސްލާހަކީ މަޖިލީހުގެ މެންބަރުންނާ ގުޅޭ ގޮތުން ގާނޫނުއަސާސީއަށް ގެނައި އިސްލާހަށްވުރެ މާ މުހިއްމު އިސްލާހުތަކެއް ކަމުގައި އެމަނިކުފާނު ވިދާޅުވި އެވެ. 

ވެރިކަމުގެ ބާރުތައް ރައްޔިތުންގެ ކިނބައިން ފެށިގެން އަންނަކަަމާއި އެ ބާރުތައް ދެމިއޮންނާނީވެސް ރައްޔިތުންގެ ކިނބައިގައިކަމަށް ގާނޫނުއަސާސީގައި ބަޔާންކޮށްފައިވާކަން ފާހަގަކުރައްވަމުން އަބްދުއްރަހީމް ވިދާޅުވީ ރައްޔިތުން ވަކި ފިކުރެއްގައި އިންތިހާބުކުރެއްވި މެންބަރަކު ރައްޔިތުންގެ ބަހެއް ހޯދުމެއް ނެތި އެއްވެސް އުސޫލެއް ހަމައެއް ނެތި ރައްޔިތުން އެ ފިކުރެއްގެ މަތީގައި އޭނާ އިންތިހާބު ކުރި ފިކުރު ދޫކުރައްވަައި ވަޑައިގަތުމުން އޭނާގެ ގޮނޑި ގާނޫނުގައި ބަޔާންކުރާ ގޮތުގެ މަތިން ގެއްލޭ ގޮތަށް އިސްލާހުކުރުމަކީ ރަނގަޅު ކަމެއް ކަމަށެވެ. 

އަބްދުއްރަހީމް ވިދާޅުވި ގޮތުގައި މަޖިލީހުގެ މެންބަރު ވަކި ފިކުރެއްގެ މަތީގައި ރައްޔިތުން އިންތިހާބުކޮށްފައި ހުއްޓައި ރައްޔިތުންގެ ހިޔާލު ހޯދުމެއް ނެތި އެހެން ދިމާލަކަށް ދިއުމުން ގޮނޑި ގެއްލޭ ގޮތަށް ހެދުމަކީ ރައްޔިތުންގެ އަތްމަތީގައި އެ ރައްޔިތުންގެ ބާރު އޮތުން ކަމަށެވެ. 

"ރައްޔިތުން ނިކުމެ ވަކި ގޮތަކަށް ވަކި ފިކުރަކަށް ވަކި ވިސްނުމަކަށް ތާއީދުކޮށްގެން އިންތިހާބުކުރާ މެންބަރު، އެ ރައްޔިތުންގެ ހިޔާލު ހޯދުމަކާ ނުލައި، އެއްވެސް ކަހަލަ ހަމައެއް ނެތި އުސޫލެއް ނެތި، ރައްޔިތުން އިންތިހާބު ކުރި ޕާޓީ ނުވަތަ ފިކުރު ދޫކުރައްވައި އެހެން ދިމާލަަކަށް ވަޑައިގަތުމުން ގާނޫނުގައި އޮންނަ ގޮތުގެ މަތިން އޭނާގެ މެންބަރުކަން ގެއްލެނީ،" އަބްދުއްރަހީމް ވިދާޅުވި އެވެ. 

"އެހެންވީމާ ކިހިނެއްތޯ މިވީ؟ މިވީ ގޮތަކީ ރައްޔިތުންގެ ބާރު ރައްޔިތުންގެ އަތްމަތީގައި ދެމިއޮތީ.،" 17 ވަނަ މަޖިލީހުގައި ޑީއާރްޕީގެ ފިކުރުގައި އިންތިހާބުކުރި ބައެއް މެންބަރުން އަމިއްލަ ފައިދާއަށް ޕާޓީ ބަދަލުކުރެއްވުމުންވެސް މަޖިލީހުގެ ގޮނޑީގައި ތިއްބެވުނުކަން ފާހަގަކުރައްވަމުން އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ މަޖިލީހުގެ މެންބަރުން އިންތިހާބުކުރުމުން އިންތިހާބުކުރި ގޮތާ ހިލާފުވެ އެހެން ޕާޓީއަކަށް ބަދަލުވުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރުމަކީ ކޮންމެހެން ކުރަންޖެހޭ ކަމެއް ކަމަށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.