ރިސޯޓުތަކުގެ އެކުއިޒިޝަންގެ ގޮތުގައި ލިބުނު ފައިސާ އިތުރުވެ އާމްދަނީ %13 މައްޗަށް

ނޮވެންބަރު މަހު ދައުލަތަށް ލިބުނު އާމްދަނީ ފާއިތުވި އަހަރުގެ ނޮވެންބަރާ އަޅާބަލާއިރު %13 އިތުރުވެފައިވާކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ބުނެފި އެވެ. 

މީރާއިން ކޮންމެ މަހަކު އެއްފަހަރު އާންމުކުރާ ދައުލަތުގެ އާމްދަނީގެ ރިޕޯޓުގައި ބަޔާންކުރި ގޮތުން މީރާއަށް ފާއިތުވި ނޮވެންބަރުގައި 1.89 ބިލިއަން ރުފިޔާ ލިބުނެވެ. އަދި ޑޮލަރުން އާމްދަނީގެ ގޮތުގައި ނޮވެންބަރު 88.17 މިލިއަން ޑޮލަރު ލިބިފައިވެ އެވެ. 

މީރާއިން ބުނި ގޮތުގައި ނޮވެންބަަރު މަހު ލިބުނު އާމްދަނީ ވަނީ ފާއިތުވި އަހަރުގެ ނޮވެންބަރު މަހާ އަޅާބަލާއިރު 13.2 އިންސައްތަ އިތުރުވެފަ އެވެ. އަދި މި އަހަރު ނޮވެންބަރު މަހު ލިބޭނެ ކަމުގައި އަންދާޒަކުރި އަދަދަށްވުރެ ލިބުނު އާމްދަނީ 19.7 އިންސައްތަ އިތުރުކަމަށްވެސް މީރާއިން ބުނެ އެވެ. 

ނިމުނު އަހަރުގެ ނޮވެންބަރަށްވުރެ މި އަހަރު ލިބުނު އާަމްދަނީ އިތުރުވި މައިގަނޑު ސަބަބެއްގެ ގޮތުގައި މީރާއިން ފާހަގަކުރަނީ ފަތުރުވެރިކަމުގެ ދާއިރާއިން ރިސޯޓު ތަރައްގީކުރަން ދޫކުރި ބިންތަކުގެ އެކުއިޒިޝަން ކޯސްޓު އަދި ކޮންވާޝަން ފީގެ ގޮތުގައި ލިބުނު އާމްދަނީ އިތުރުވުމެވެ. 

އޭގެ އިތުރަށް ރިސޯޓުތަކުގެ ކުލީގެ މުއްދަތު އިތުރުކުރުމުގެ ފީގެ ގޮތުގައި ލިބުނު ފައިސާއާއި ޓީޖީއެސްޓީއާއި އެއާޕޯޓު ޓެކުހާއި ފީގެ ގޮތުގައި ލިބުނު އާމްދަނީވެސް ނޮވެންބަރު މަހުވަނީ އިތުރުވެފަ އެވެ. 

ޓީޖީއެސްޓީގެ ގޮތުގައި ލިބުނު އާމްދަނީ އިތުރުވުމުގެ އިތުރަށް އެކުއިޒިޝަން ކޯސްޓު އަދި ކޮންވާޝަން ފީގެ ގޮތުގައި ލިބުނު އާމްދަނީ އިތުރުވުމަކީ ނޮވެންބަރު މަހު ލިބޭނެކަމަށް އަންދާޒާކުރި މިންވަރަށްވުރެ ލިބުނު އާމްދަނީ އިތުރުވި ސަބަބުގެ ގޮތުގައި މީރާއިން ފާހަގަކުރި އެވެ. 

ރިސޯޓު ހެދުމަށް ދޫކުރި ރަށްތަކުގެ އެކުއިޒިޝަން ކޯސްޓު އަދި ކޮންވާޝަން ފީގެ ގޮތުގައި ނޮވެންބަރު މަހު 171.6 މިލިއަން ރުފިޔާ ލިބުނެވެ. އަދި ލީސް އެކްސްޓެންޝަން ފީ ނުވަތަ ރިސޯޓުގެ ކުލީގެ މުއްދަތު އިތުރުކުރުމުގެ ފީގެ ގޮތުގައި 76.6 މިލިއަން ރުފިޔާ ލިބުނެވެ. 

ނޮވެންބަރު މަހުގެ އާމްދަނީއާއެކު ޖުމްލަ މި އަހަރު ލިބުނު އާމްދަނީވަނީ 20.9 ބިލިއަން ރުފިޔާއަށް އަރާފަަ އެވެ. ޑޮލަރުން ލިބުނު އާމްދަނީއަކީ 735.8 މިލިއަން ޑޮލަރެވެ.