"ފައްޔާޒު ދެއްކެވި ވާހަކައަށްވުރެ ދެރަވަރު ވާހަކައެއް ޕާޓީއެއްގެ ޗެއާޕާސަނަކު ނުދައްކަވާނެ"

ޝިޔާމު ސިފަކުރެއްވި ގޮތުގައި ފައްޔާޒު ދެއްކެވި ވާހަކަފުޅަކީ ނުރައްކާތެރި ޖާނީ އުދުވާނެއް ހިންގުމަށް ގޮވައިލައްވައި ޓެރަރިޒަމް ހިތްވަރުދެއްވުމަށް ދެއްކެވި ވާހަކަފުޅެކެވެ.

ފިޝަރީސް މިނިސްޓަރު އަހުމަދު ޝިޔާމް

ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އަނިޔާވެރިވެ އެމަނިކުފާނުގެ ހަށިކޮޅަށް ގެއްލުން ދިނުމަށް ހިތްވަރު ލިބޭ ގޮތަށް އެމްޑީޕީގެ އެއްވުމެއްގައި އެ ޕާޓީގެ އާންމު މެންބަރަކު ދެއްކި ވާހަކަތައް ދިފާއުކުރައްވައި އެ ޕާޓީގެ ޗެއާޕާސަން ފައްޔާޒު އިސްމާއީލު ދެއްކެވި ވާހަކަފުޅަކީ ޕާޓީއެއްގެ ޗެއާޕާސަނަކު ދައްކަވާނެ އެންމެ ދެރަވަރު ވާހަކަކަމަށް ފިޝަރީޒް މިނިސްޓަރު އަހްމަދު ޝިޔާމު ވިދާޅުވެއްޖެ އެވެ. 

ކުޅުދުއްފުށި ސިޓީގައި އޮތް އެމްޑީޕީ ޖަލްސާއެއްގައި ރާއްޖޭގެ ފުރަތަމަ ރައީސުލްޖުމްހޫރިއްޔާ މުހައްމަދު އަމީނަށް ހަދައިލި ގޮތް ރައީސް މުއިއްޒަށްވެސް ހަދައިލަންޖެހިދާނެކަމަށް ދޭހަވާ ގޮތަކަށް އެމްޑީޕީގެ އާންމު މެންބަރަކު ދެއްކި ވާހަކައާމެދު ނޫސްވެރިން ފައްޔާޒާ ސުވާލުކުރި އެވެ. 

"ރައްޔިތުންނަށް ދެރަ ދިނީމާ މުހައްމަދު އަމީނަށް ހެދި ގޮތް ހަދަންޖެހޭނީ. އެހެން ކޮން ގޮތެއްތޯ ހަދާނީ؟ އެއީ ދިވެހިރާއްޖޭގެ ތާރީހު ދައްކާފައި އޮތް ހަގީގަތް.،" ފައްޔާޒު ވިދާޅުވި އެވެ. އޭނާ ވިދާޅުވި ގޮތުގައި ކުޅުދުއްފުށީ ޖަލްސާގައި ވާހަކަދެއްކެވި ބޭފުޅާ ރައީސް މުއިއްޒަށް ދެއްވީ ނަސޭހަތެކެވެ. އެއީ ރައީސް އަމީނަށް ވީ ގޮތް ވިޔަނުދޭން ދެއްވި ނަސޭހަތެއްގެ ގޮތުގައި ސިފަކުރައްވައި ފައްޔާޒުވަނީ އެ ވާހަކަ ދިފާއުކުރައްވާފަ އެވެ. 

ފައްޔާޒުގެ ވާހަކަފުޅަށް އިޝާރާތްކުރައްވައި ޝިޔާމު އެކްސްގައި ކުރެއްވި ޕޯސްޓެއްގައި ވިދާޅުވީ ފައްޔާޒުގެ އެ ވާހަކަފުޅަށްވުރެ ދެރަވަރު ވާހަކައެއް ސިޔާސީ ޕާޓީއެއްގެ ޗެއާޕާނުގެ މަގާމުގައ ހުންނަވާ ބޭފުޅަކަށް ނުދެއްކެވޭނެ ކަމަށެވެ. 

އަދި ފައްޔާޒުގެ ވާހަކަފުޅަކީ ސިިޔާސީ ވާހަކަފުޅެއް ކަމުގައި ދެކެވަޑައިނުގަންނަވާކަން ހާމަކުރައްވަމުން ޝިޔާމު ވިދާޅުވީ އެ ވާހަކަފުޅަކީ ވަރށް ސީރިއަސް އަދި އެހާމެ ނުރައްކާތެރި ޖާނީ އުދުވާނަކަށް ގޮވައިލެއްވި ގޮވައިލެއްވުމެއް ކަމުގަ އެވެ. 

އަދި އެފަދަ ނުރައްކާތެރި ވާހަކަތަކަށް "ދިވެހި މުޖުތަމައުގައި ޖާގަދެވިގެން ނުވާނެ" ކަމަށްވެސް ޝިޔާމު ވިދާޅުވި އެވެ. އެ ވާހަކައަކީ ސިޔާސީ ޕާޓީތަކު އަސާސްތަކާވެސް ހިލާފު ޓެރަރިޒަމަށް ހިތްވަރުދޭ ވާހަކަތަކެއްކަން ފާހަގަކުރައްވައި ޝިޔާމުވަނީ ފުލުހުން އެ ކަންކަން ތަހުގީގުކުރަން ގޮވާލައްވާފަ އެވެ. 

ފައްޔާޒުގެ ވާހަކައާ ގުޅިގެން މިއަދު މަޖިލީހަށް ކުއްލި މައްސަލައެއް ހުށަހެޅި އެވެ. އެ މައްސަލައަށް ބަހުސްކުރައްވަމުން ސަރުކާރު ހިންގާ ޕީއެންސީގެ މެންބަރުންވެސް ގޮވައިލެއްވީ ފައްޔާޒު ހައްޔަރުކޮށް މައްސަލަ ތަހުގީގުކުރުމަށެވެ. 

ގިނަ މެންބަރުން ވިދާޅުވި ގޮތުގައި އެމްޑީޕީން މަސައްކަތްކުރަނީ ގައުމުގެ ހަމަޖެހުން ނަގައިލާ މުޖުތަމައު ހަލަބޮލިކަމުގެ ތެރެއަށް ޣަރަގުކޮށްލުމަށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.