މަޝްރޫއުތަކުގެ ތަފުސީލު ހުށަހަޅަންނުޖެހޭ ގޮތަށް ބަޖެޓު ފާސްކޮށްފި

މަޖިލީހުން މިއަދު ބަޖެޓު ފާސްކުރީ ބަޖެޓު ކޮމިޓީން ރިކޮމަންޑޭޝަންތަކުގެ ގޮތުގައި ހިމެނި މަޝްރޫއުތަކުގެ ތަފުސީލު ލިސްޓު ފޮނުވުންފަދަ ކަންކަން އުނިކުރުމަށްފަހު އެވެ.

ރައްޔިތުންގެ މަޖިލީހުގެ ޖަލްސާއެއްގެ ތެރެއިން، ފޮޓޯ: މަޖިލިސް

އަންނަ އަހަރަށް ލަފާކުރާ ދައުލަތުގެ ބަޖެޓު ދިރާސާކުރި ކޮމިޓީގެ ރިޕޯޓުގައި ފާހަގަކޮށްފައިވާ ރިކޮމެންޑޭޝަންތައް އުނިކުރުމަށްފަހު 2025 ވަނަ އަހަރުގެ ބަޖެޓު މިއަދު ރައްޔިތުންގެ މަޖިލީހުން ފާސްކޮށްފި އެވެ. 

ފާއިތުވި ބުދަދުވަހު މަޖިލީހުގެ ބަޖެޓު ކޮމިޓީން ފާސްކުރި 2025 ވަނަ އަހަރަށް ލަފާކުރާ ދައުލަތުގެ ބަޖެޓުގެ ބަޖެޓު ރިޕޯޓުގައި 12 ކަމެއް ކޮމިޓިގެ ރެކޮމެންޑޭޝަންތަކުގެ ގޮތުގައި ހިމަނާފައިވެ އެވެ. އޭގެ ތެރޭގައި ހަރަދު ކުޑަކުރުމަށް ސަރުކާރުން އަޅަން ނިންމާފައިވާ މުހިއްމު ފިޔަވަޅުތަކާއި އާމްދަނީ އިތުރުކުރުމަށް އަޅާ ފިޔަވަޅުތަކާ ގުޅޭ ގޮތުން ސަރުކާރުން ކުރަންޖެހޭނެކަމަށް ކޮމިޓީއަށް ފެންނަ މުހިއްމު ކަންކަން ހިމެނެ އެވެ.

ބަޖެޓުގައި ހިމަނާފައިވާ ޕީއެސްއައިޕީ މަޝްރޫއުތަކާ ގުޅިގެން ތިން ކަމެއް މަޖިލީހުގެ ކޮމިޓީންވަނީ ހުށަހަޅާފަ އެވެ. ފުރަތަމަ ކަމެއްގެ ގޮތުގައި ހުށަހަޅާފައިވަނީ އަންނަ އަހަރު އަމަލީ މަސައްކަތް ފެށުމަށް ނިންމާފައިވާ މަޝްރޫއުތަކާއި، އެ މަޝްރޫއުތައް ހިންގުމަށް ނިންމާފަައިވާ ރަށްތައް ބެހިފައިވާ ގޮތް އެނގޭނެ ލިސްޓެއް އަންނަ ފެބްރުއަރީ މަހުގެ ނިޔަލަށް މަޖިލީހަށް ހުށަހެޅުމެވެ.

އަދި މިހާރު ހަދާފައިވާ އެއްބަސްވުންތަކުގެ ތެރެއިިން ސޮއިކުރެވިފައިވާ ޕްރޮގުރާމުތަކުގެ ތެރެއިން ކުރިއަށްދާނެ މަޝްރޫއުތަކާއި، ކުރިއަށްނުގެންދެވޭނެ މަޝްރޫއުތައް އަދި އެ މަޝްރޫއުތައް ކުރިއަށްގެންދަން ނިންމާފައިވާ ރަށްތަލުގެ ތަފުސީލު އެނގޭނެ ލިސްޓެއް މާޗު މަހުގެ ނިޔަލަށް މަޖިލީހަށް ހުށަހެޅުމަށް އަންގަން ކޮމިޓީން ނިންމާފައިވެ އެވެ.

އޭގެ އިތުރަށް އަހަރުގެ ކޮންމެ ކުއާޓާއެއްގައި ހިނގަމުންދާ މަޝްރޫއުތައް ކުރިއަށްދާ މިންވަރުގެ ތަފުސީލު އެނގޭނެ ރިޕޯޓެއް މަޖިލީހަށް ހުށަހެޅުމަށް ސަރުކާރަށް އަންގަން ކޮމިޓީންވަނީ ފާސްކޮށްފަ އެވެ. މި ހުށަހެޅުންތަކާއެކު ބަޖެޓު ފާސްވެއްޖެނަމަ މިއީ މިފަދަ ތަފުސީލުތަކެއް މަޖިލީހަށް ހުށަހަޅަން ސަރުކާރަށް އަންގާ ފުރަތަމަ ފަހަރެވެ. 

އިތުރު ރެކޮމެންޑޭޝަންތައް

  •  ސަރުކާރު ހިއްސާވާ ކުންފުނިތައް އިސްލާހުކުރުމުގެ މަސައްކަތް ކުރިއަށްދާ ގޮތުގެ ތާވަލެއް އެކުލަވައިލާ، ތާވަލާ އެއްގޮތަށް އަޅާ ފިޔަވަޅުތައް އެނގޭނެ ރިޕޯޓުތަކެއް ކޮންމެ ކުއާޓާއެއްގައި މަޖިލީހަށް ހުށަހެޅުން
  •  
  •  ޓެކްސް ނުދައްކާ ފަރާތްތަކާމެދު އަޅާ ފިޔަވަޅުތައް މުރާޖައާކުރުމާއި، ޓެކުހާ ބެހޭ ގާނޫނު އިސްލާހުކުރުން އަވަސްކޮށް އިސްލާހު އަވަހަށް ހުށަހެޅުން
  •  
  •  ޓެކްސް ދެއްކުމުގައި ލުއިދިނުމުގެ އުސޫލުތައް މުރާޖައާކޮށް އިސްލާހުކޮށް 2025 ގެ ދެވަނަ ކުއާޓާގެ ކުރިން މަޖިލީހަށް ހުށަހެޅުން
  •  
  •  ރިޓަޔަމެންޓު އުސޫލުތައް ހަރުދަނާކޮށް ކޮންމެ އުމުރެއްގައި ރިޓަޔާކުރެވޭ އުސޫލު ބަދަލުކުރުން

އިތުރަށް ސަބްސިޑީ ނިޒާމު އިސްލާހުކުރާއިރު ހިދުމަތުގެ އަގު އުފުލިޔަނުދިނުމަށްޓަކައި ކުންފުނިތަކުގެ އެފިޝިއަންސީ ރަނގަޅުކޮށް ހިންގުން ހަރުދަނާކުރުމުގެ ގޮތުން، އެ ނިޒާމު ތަންފީޒުކުރެވޭނެ ގޮތުގެ ތާވަލެއް އަހަރުގެ ފުރަތަމަ ކުއާޓާގއި އެކުލަވާލައި މަޖިލީހާ ހިއްސާކުރުމަށްވެސް ކޮމިޓީން ފާސްކުރި އެވެ.

ސަބްސިޑީ ނިޒާމަށް ގެންނަން ހުށަހަޅާފައި އިސްލާހުތައް ގެނައުމަށް ބޭނުންވާ މުހިއްމު މައުލޫމާތު އެއްކުރެވޭ ސާވޭއެއްކަމަށްވާ ގޭބީސީގެ އާމްދަނީއާއި ހަރަދުގެ ސާވޭ އެންމެ ފަހުން ހަދާފައިވަނީ 2019 ވަނަ އަހަރުގައިކަން ފާހަގަކޮށް ކޮމިޓީން ފާސްކުރީ، އެ ސިޔާސަތުތައް ތަންފީޒުކުރަން ބޭނުންވާ ހުރިހާ މައުލޫމާތެއް އެއްތަނަކުން ލިބޭނެ ނިޒާމެއް ގާއިމުކުރުން އަވަސްކުރުމަށާއި، އެކަމުގައި މެލޭޝިޔާގައި ބޭނުންކުރާ ސިސްޓަމް ނަމޫނާއަކަށް ބެލުމަށެވެ.

އޭގެ އިތުރަށް ބަޖެޓުން ހަރަދުކުރާ މިންވަރާއި ހަރަދުކުރާ ވަގުތު އެކަށައަޅާ ހަމަތަައް ބަޔާންކުރާ "އެޕްރޮޕްރިއޭޝަންް"" ގާނޫނެއް އެކުލަވައިލުމުގެ މަސައްކަތް އަވަސްކުރުމަށްވެސް ކޮމިޓީންވަނީ ސަރުކާރަށް ލަފާދިނުމަށް ފާސްކޮށްފަ އެވެ. 

ބަޖެޓު ރިޕޯޓުން މި ރިކޮމެންޑޭޝަންތައް އުނިކުރުމަށް ހުށަހެޅުއްވީ މަނަދޫ ދާއިރާގެ މެންބަރު ހުސްނީ މުބާރިކެވެ. ހުސްނީގެ ހުށަހެޅުއްވުމަށް ވިލިމާލޭ ދާއިރާގެ މެންބަރު މުހައްމަދު އިސްމާއީލު ތާއީދުކުރެއްވި އެވެ. ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 68 މެންބަރުންވަނީ އެ އިސްލާހު ފާސްކުރަން ވޯޓު ދެއްވާފަ އެވެ. 

އެއަށްފަހު ދައުލަތުގެ ބަޖެޓަށް މިއަދުވަނީ ވޯޓަށް އަހާފަ އެވެ. ބަޖެޓު ދިރާސާކުރި މަރުހަލާގައި މަޖިލީހުން ބަޖެޓަށް އެއްވެސް ބަދަލެއް ގެނެސްފައިނުވެ އެވެ. ބަޖެޓު ކޮމިޓީން ބަޖެޓު ފާސްކުރީ ސަރުކާރުން ހުށަހަޅާފައި އޮތް ގޮތަށެވެ. 

މަޖިލީހުގައި މިއަދު ނެގި ބަޖެޓުގެ ވޯޓުގައި ބައިވެރިވެވަޑައިގެންނެވި 81 މެންބަރުންގެ ތެރެއިން 70 މެންބަރުންގެ ވޯޓާއެކު 2025 ވަނަ އަހަރުގެ ބަޖެޓުވަނީ ފާސްކޮށްފަ އެވެ. ބަޖެޓު ފާސްކުރަން ނުފެންނަކަމަށް ވޯޓުދެއްވީ 11 މެންބަރުންނެވެ. 

މި ބަޖެޓަކީ 56 ބިލިއަން ރުފިޔާގެ ބަޖެޓެކެވެ. ބަޖެޓުގެ ޕީއެސްއައިޕީގެ ގޮތުގައި 12 ބިލިއަން ރުފިޔާ ކަނޑައަޅާފައިވެ އެވެ. އަންނަ އަހަރު ބަޖެޓުގެ ޖުމްލަ ޑެފިސިޓަކީ 9.4 ބިލިއަން ރުފިޔާ އެވެ. އަދި ދަރަނި އަދާކުރުމުގެ ހަރަދުތައް ނުހިމަނައި އާމްދަނީއާއި ހަރަދުގެ ފަރަގު ނުވަތަ ޕްރައިމަރީ ޑެފިސިޓުގެ ގޮތުގައި ލަފާކޮށްފައިވަނީ 3.9 ބިލިއަން ރުފިޔާ އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.