މަޖިލީހުގެ ރައީސް އަބްދުއްރަހީމް ރައީސް ނަޝީދާ ބައްދަލެއް ނުކުރަައްވާ

ރަައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ކުރީގެ ރައީސް މުހައްމަދު ނަޝީދާ މިއަދު ބައްދަލުކުރެއްވިކަމަށް އޮންލައިން ނޫހަކުން ރިޕޯޓުކުރި ހަބަރަކީ ކަނޑައެޅިގެން ދޮގެއްކަމަށް، މަޖިލީހުގެ ރައީސް ދިރިއުޅުއްވާ ގެކޮޅު މުރައިދޫގެ ޗީފް އޮފް ސްޓާފް އާދަމް ހަލީމް ވިދާޅުވެއްޖެ އެވެ. 

މި ހަބަރު ރިޕޯޓުކުރި ނޫހުން ބުނެފައިވަނީ ރައީސް ނަޝީދާއި އަބްދުއްރަހީމު ބައްދަލުކުރެއްވީ ކެނަރީގޭގައި ކަމަށެވެ. އަދި އެ ބައްދަލުވުން އޮތީ މިއަދު ހެނދުނު ކަމަށްވެސް އެ ނޫހުން ރިޕޯޓުކުރި އެވެ. 

"މިރާ"އަށް މައުލޫމާތު ދެއްވަމުން އާދަމް ހަލީމު ވިދާޅުވީ މަޖިލީހުގެ ރައީސް މިއަދު ހެނދުނު އެމަނިކުފާނު ދިރިއުޅުއްވާ ގެކޮޅުން ބޭރަށް ވަޑައިނުގަންނަވާ ކަމަށެވެ. އަދި އެ ގެކޮޅަށް ނަޝީދުވެސް ވަޑައިނުގަންނަވާ ކަމަށެވެ. އެހެންކަމުން މިއަދު ހެނދުނު ރައީސް ނަޝީދު ދިރިއުޅުއްވާ ގ.ކެނަރީގޭގައި ދެ ބޭފުޅުން ބައްދަލުކުރެއްވި ވާހަކައަކީ ކަނޑައެޅިގެން ދޮގެއްކަމުގައި އާދަމް ހަލީމު ވިދާޅުވި އެވެ. 

"މަޖިލީހުގެ ރައީސް ހުންނެވީ ގެކޮޅުގަ. ބޭރަށް ވަޑަައެެއް ނުގަންނަވާ. ރައީސް ނަޝީދު މިގެކޮޅަކަށް ވަޑައިނުގަންނަވާ. އެ ދެ ބޭފުޅުން ބައްދަލުކުރެއްވި ވާހަކައަކީ ކަނޑައެޅިގެން ދޮގެއް.،" އާދަމް ހަލީމް ވިދާޅުވި އެވެ. 

އަބްދުއްރަހީމް ނަޝީދާ ބައްދަލުކުރެއްވިކަމަށް މީޑިޔާގައި ހަބަރު ފެތުރިފައިވާއިރު، ރައީސް ނަޝީދު މިހާރު ދިރިއުޅުއްވަނީ ރާއްޖެއިން ބޭރުގަ އެވެ. ގާނާގައި ދިރިއުޅުއްވާ ނަޝީދު ދުވަސްކޮޅުކޮޅުން ރާއްޖެއަށް ވަޑައިގަންނަވަ އެވެ. މި ދުވަސްވަރު އެމަނިކުފާނު ހުންނެވީ ރާއްޖޭގަ އެވެ. 

މި ދުވަސްވަރު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހުންނެވީ އަމިއްލަފުޅު ދަތުރުފުޅެއްގައި އިނގިރޭސިވިލާތަށް ވަޑައިގެންނެވެ. ސިޔާސީ ކަންކަން ތަހުލީލުކުރައްވާ ބައެއް ބޭފުޅުން ދެކެވަޑައިގަންނަވާ ގޮތުގައި މިކަހަލަ ވާހަކަތައް ފެތުރުމުގެ މަގުސަދަކީ ރައީސް މުއިއްޒާއި މަޖިލީހުގެ ރައީސް އަބްދުއްރަހީމުގެ މެދުގައި އޮތް ބަދަހި ގުޅުން ހީނަރުކުރުމެވެ. 

އަބްދުއްރަހީމް ދާދިފަހުން ދެއްވި ބަސްދީގަތުމެއްގައި ވިދާޅުވި ގޮތުގައި ވެރިކަން ރައީސް މުއިއްޒަށް ލިބިވަޑައިގަތުމަށްފަހު ދެ ބޭފުޅުންގެ މެދުގައި އޮތް އިތުބާރުވަނީ ކުރިއަށްވުރެ ވަރުގަދަވެފަ އެވެ. އަދި އިހުނަށްވުރެ މިހާރު ދެ ބޭފުޅުންގެ ގުޅުން ބަދަހިކަން ފާހަގަކުރެއްވި އެވެ.