އެއް އަހަރުން 333 މިލިއަން ރުފިޔާގެ ޑްރަގު އަތުލައިގަނެފި

ފާއިތުވި އެއް އަހަރު ތެެރޭގައި 333 މިލިއަން ރުފިޔާގެ ޑްރަގު މަސްތުވާތަކެތީގެ މައްސަލަ ހައްލުކުރުމަށް ސަރުކާރުން ފަށާފައިވާ މަސައްކަތުގެ ތެރެއިން އަތުލައިގަނެވިއްޖެ އެވެ. 

ސަރުކާރަށް އަހަރެއް ފުރުމާ ގުޅިގެން ސަންގު ޓީވީއަށް ދެއްވި ބަސްދީގަތުމެއްގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވީ މި ސަރުކާރު ވެރިކަމަށް އައުމަށްފަހު މަސްތުވާތަކެތީގެ މައްސަލަ ހައްލުކުރުމަށް ސަމާލުކަން ދީގެން މަސައްކަތްތަކެއް ކުރި ކަމަށެވެ. 

އެގޮތުން ފުލުހުންނާއި ކަސްޓަމްސް އަދި ނޭޝަނަލް ޑްރަގް އެޖެންސީ ފަދަ އިދާރާތައް ހިމެނޭ ޓާސްކްފޯސްއެއް އެކުލަވައިލައިގެން ކުރެވުނު މަސައްކަތްތަކުގެ ތެރެއިން ބޮޑެތި ކާމިޔާބުތަކެއް ހޯދިފައިވާކަމަށް އިހުސާން ވިދާޅުވި އެވެ. 

މަސްތުވާތަކެތީގެ މައްސަލަ ހައްލުކުރުމަށް އިސްކަންދީގެން ކުރާ މަސައްކަތުގައި އޮތީ ދެ ބަޔަކަށް ސަމާލުކަން ދީގެން މަސައްކަތްކުރުމުގެ ވިސްނުމެއްކަން ހާމަކުރައްވައި މިނިސްޓަރު ވިދާޅުވީ ފުރަތަމަ އަމާޒަކީ ޑްރަގަށް އޮތް ޑިމާންޑު ކުޑަކުރުން ކަމަށެވެ. ދެވަނަަ އަމާޒަކީ ޑްރަގުގެ ސަޕްލައި މަދުކުރުން ކަމަށެވެ. 

އެ ދެ އަމާޒަށް ކުރެވުނު މަސައްކަތްތަކުގެ ތެރެއިން ޑްރަގް ސަޕްލައި މަދުކުރުމަށްޓަކައި ޑްރަގު ރާއްޖެއަށް އެތެރެވާ ދޮރާށިތަކުގެ ސަލާމަތީ ކަންކަން އިތުރަށް ހަރުދަނާކުރުމަށް މަސައްކަތްތަކެއް ކުރެވުނު ކަމުގައި އޭނާ ވިދާޅުވި އެވެ. އިހުސާން އިތުރަށް ވިދާޅުވީ ރާއްޖެ ތެރޭގައާއި މާލޭގައި ޑްރަގު އޮޕަރޭޝަންތައް އިތުރުކުރި ކަމަށެވެ. 

ޑްރަގުގެ އޮޕަރޭޝަންތައް ހިންގުމަށް ފުލުހުންގެ ޑްރަގް އެންފޯސްމެންޓު ޑިޕާޓުމެންޓު އިތުރަށް ހަރުދަނާކޮށް، އެތަނުގައި މަސައްކަތްކުރަން ފަސޭހަ މާހައުލެއް ގާއިމުކުރުމަށް ގެންނަންޖެހޭ ބަދަލުތައްވެސް ސަރުކާރުން ގެނެސްފައިވާ ކަމަށް އިހުސާން ވިދާޅުވި އެވެ. 

އަދި އިންޓެލިޖެންސް މައުލޫމާތު އިދާރާތަކުގެ މެދުގައި އިންޓެލިޖެންސް މައުލޫމާތު ހިއްސާކުރުން ފަސޭހަކުރުމަށްޓަކައި އެކަމަށް ހާއްސަ ވަކި ޓާސްކުފޯހެއް އެކުލަވައިލެވުނު ކަމުގައި އޭނާ ވިދާޅުވި އެވެ. 

އިހުސާން ވިދާޅުވީ މިގޮތަށް ކުރެވުނު މަސައްކަތްތަކުގެ ތެރެއިން 183 ކިލޯއަށްވުރެ ގިނަ ޑްރަގު އަތުލައިގަނެވިފައިވާ ކަމަށެވެ. އަދި 8،000 އަށްވުރެ ގިނަ ރާފުޅި ނުވަތަ ރާދަޅު އަތުލައިގަނެފައިވާ ކަމަށެވެ. އެހުރިހާ ތަކެއްޗެއްގެ މަގުމަތީ އަގު 333 މިލިއަން ރުފިޔާއަށްވުރެ މަތިވާނެ ކަމަށްވެސް އިހުސާން ވިދާޅުވި އެވެ. އަދި އެހައި ބައިވަރު މަސްތުވާތަކެތި އަތުލައިގަނެވުމަކީ މަސްތުވާތަކެތި މުޖުތަމައުގައި ދައުރުކުރާ މިންވަރު މަދުކުރަން އެޅުނު ރަނގަޅު ފިޔަވަޅެއްކަމަށްވެސް މިނިސްޓަރު ވިދާޅުވި އެވެ. 

"އަޅުގަނޑުމެންނަށް މި އަހަރުގެ މިހިސާބަށް އައިއިރު 183 ކިލޯއަށްވުރެ ގިނަ ޑްރަގްސް އިންޓަސެޕްޓު ކުރެވުނު. 8،400 އަށްވުރެ ގިނަ ރާފުޅި ނުވަތަ ދަޅު އިންޓަސެޕްޓު ކުރެވިފައިވޭ. ސްޓްރީޓު ވެލިއުއަށް ބަލާއިރު އަޅުގަނޑު ދަންނަވާނީ މި އެއްޗެހީގެ އަގު 333 މިލިއަން ރުފިޔާއަށްވުރެ މަތިވާނެ،" މިނިސްޓަރު ވިދާޅުވި އެވެ. 

"މިކުރެވުނު މަސައްކަތަށް މިއަދަދަށް ސްޓްރީޓު ވެލިއުގެ ޑްރަގް އިންޓަސެޕްޓުކުރެވުމަކީ މުޖުތަމައު ތެރޭގައި އޮތް މި ބޮޑު މައްސަލައިގެ ސަޕްލައި ސައިޑުން ކުރެވުނު ބޮޑު މަސައްކަތެއް.،"

އިހުސާން ފާހަގަކުރެއްވި ގޮތުގައި ސަރުކާރުން މި މަސައްކަތްކުރީ ގާނޫނީ ގޮންޖެހުންތަކާއެކު ކަމަށެވެ. ނަމަވެސް މިހާރު ފަރުމާކޮށްފައިހުރި ބިލުތައް ގާނޫނުތަކަށްވުމުން މިހާރު އަތްނުލެވި ހުރި ގިނަ މައްސަލަތަކެއްގައި އަތްލެވި ހައްލުތަކެއް ހޯދޭނެ ކަމުގައި ވިދާޅުވި އެވެ.