ރައީސްގެ ބޭފުޅުން ސިޔާސީ ވާހަކަތަކުގެ ތެރެއަށް ވައްދައިގެން ފަތުރަނީ ދޮގެއް: އަމީން

ވާޕު މަނާކުރައްވަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމެވީ އެމަނިކުފާނުގެ ދަރިކަލުން ވޭޕު ބޭނުންކުރައްވަނިކޮށް ފަޅާއަރައިގެންކަމަށް ބުނެ ޓްރާންސްޕޯޓު މިނިސްޓަރު މުހައްމަދު އަމީނާ ހަވާލާދީ މީސްމީޑިޔާގައި ފަތުރަމުންދާ ވާހަކައަކީ ކަނޑައެޅިގެން ދޮގެއްކަމަށް އަމީނު ވިދާޅުވެއްޖެ އެވެ.

ރިޔާސީ އިންތިހާބުގައި ރައީސްގެ ކެމްޕެއިން މެނޭޖަރުގެ މަގާމުވެސް އަދާކުރެއްވި އަމީނު މިފަދައިން ވިދާޅުވީ ވޭޕް މަނާކުރައްވަން ނިންމެވީ ރައީސްގެ ދަރިކަލުން ވޭޕު ބޭނުންކުރައްވާކަން ފަޅާއަރައިގެންކަމަށް އަމީނު ވިދާޅުވެފައިވާކަމަށް ބުނެ ހަސަން ކުރުސީ ނަމުގައި އެކްސްގައި ހަރަކާތްތެރިވާ އެކައުންޓަކުން ވާހަކަތަކެއް ފެތުރުމާ ގުޅިގެންނެވެ. 

ވޭޕް މަނާކުރުމުގެ ސިޔާސަަތަަށް އަމީނު ޖޯކު ޖެއްސެވިކަމަށްވެސް ކުރުސީ ބުނެފައިވެ އެވެ. އެ ވާހަކަތަކަށް ދެއްވި ރައްދުގައި އަމީނު ވިދާޅުވީ ވޭޕް މަނާކުރަން ނިންމުމަކީ ދިވެހި ޒުވާނުންނާއި އަންނާން އޮތް ޖީލުތަކުގެ ހައްގުގައި ސަރުކާރުން ނިންމި އެންމެ ޝަރަފުވެރި އެއް ނިންމުން ކަމަށެވެ. 

އަދި އެއީ ސިއްހީ ދާއިރާގެ މާހިރުން އެކަމަކަށް ވަކާލާތުކުރާތާ އެތައް ދުވަަހެއްވީ ކަމަކަށްވީ ނަމަވެސް މިހާތަނަށް ސިޔާސީ ލީޑަރުން އެ ނިންމުން ނިންމުމުގައި ފެއިލުވެފައިވާ ކަމަށެވެ. އަދި ހުރިހާ ދިވެހިންގެ މަސްލަހަތުގައި އެ ނިންމުން ނިންމުމުގެ ކެރުމާއި ހިތްވަރު ލިބިވަޑައިގަތީ ރައީސް މުއިއްޒަށް ކަމުގައިވެސް އޭނާ ވިދާޅުވި އެވެ. 

ކުރުސީ ފަތުރަމުންދާ ވާހަކައަކީ ޒައްރެއްގެ މިންވަރުގެ ހަގީގަތެއްވެސް ނެތް، މުޅިން ހަދަހަދައިގެން ދައްކާ ހިޔާލީ ވާހަކައެއްކަން ފާހަގަކުރައްވައި އަމީނު ވިދާޅުވީ ޒާތީ މުއާމަލާތްތަކުގައި އަދި ކެބިނެޓުގައިވެސް ވޭޕު މަނާކުރުމަށް އެންމެ ގަދައަށް ވަކާލާތުކުރެއްވި އެއް ބޭފުޅަކީ އޭނާ ކަމަށެވެ. 

ރައީސްގެ ބޭފުޅުންނަކީ މައުސޫމު ބައެއްކަން ފާހަގަކުރައްވައި އަމީނު ވިދާޅުވީ އެ ބޭފުޅުން ސިޔާސީ ވާހަކަތަކުގެ ތެރެއަށް ވެއްދުމަކީ ހަގީގަތުގައިވެސް ވަރަށް ލަދުވެތި ހުތުރު އަމަލެއް ކަމަށެވެ. އަދި އެފަދަ ދޮގު އަބުރަށް އަރައިގަންނަ، މައުސޫމު ކުޑަކުދިންނާއި އަންހެނުންނާއި ފިރިހެނުންނަށް އެތައް ގެއްލުމެއް ލިބޭ ވާހަކަތައް އެންމެންވެސް ކުށްވެރިކުރަންޖެހޭ ކަމަށް އަމީނު ވިދާޅުވި އެވެ.