އިޒްރޭލު ޕާސްޕޯޓުގެ މަސައްކަތް އަންނަ ފެބްރުއަރީއަށް ދަންމާލަނީ
އިސްރާއީލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް އަންނަ އަހަރުގެ ފެބްރުއަރީ މަހާ ހިސާބަށް ދަންމާލަން ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ) އިން ނިންމައިފި އެވެ.
މިދިޔަ މޭ މަހުގެ 30 ވަނަ ދުވަހު މި ބިލު މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމެވެ. އެ ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. މީކާއިލް ހުށަހެޅުއްވީ އިމިގްރޭޝަން ގާނޫނަށް އިސްލާހު ގެނައުމަށެވެ.
މި ބިލުގެ މަސައްކަތް ފެށުމަށް މިއަދު 241 ކޮމެޓީ ބައްދަލުވުމެއް ވަނީ ބާއްވާފަ އެވެ. މި ބައްދަލުވުމުގައި، ބިލުގެ މަސައްކަތް ނިންމާނެ ސުންގަޑިއެއް ވަނީ ކަނޑައަޅާފަ އެވެ.
ބިލުގެ މަސައްކަތް އަންނަ އަހަރުގެ ފެބްރުއަރީގެ ނިޔަލަށް ނިންމުމަށް ކޮމެޓީއަށް ހުށަހެޅުއްވީ ތުޅާދޫ ދާއިރާގެ މެންބަރު އަބްދުލްހަންނާނެވެ. އޭނާ ވިދާޅުވީ މިއީ ވަރަށް ހައްސާސް މައްސަލައަކަށްވާތީ ވަރަށް ގިނަ ފަރާތްތަކާ މަޝްވަރާ ކުރަން ތިބި ކަމަށް ގަބޫލު ކުރައްވާ ކަމަށެވެ. އަދި އަންނަ އަހަރަށް ލަފާ ކުރާ ބަޖެޓުގެ މަސައްކަތް ވެސް ކުރިއަށް އޮތް އިރު، އަންނަ މަހު މަޖިލީސް ޗުއްޓީއަށް ވެސް ދާނެކަން އޭނާ ފާހަގަކުރެއްވި އެވެ.
އަބްދުލްހަންނާންގެ ހުށަހެޅުން ކޮމެޓީން ފާސްކޮށްފައި ވަނީ ހުރިހާ މެންބަރުންގެ އިއްތިފާގުންނެވެ.
މި ބިލުގެ މަސައްކަތް ލަސްވެގެން މީކާއިލްގެ ފަރާތުން ވަނީ ސިޓީ ވެސް ފޮނުވާފަ އެވެ. މަޖިލީހަށް ކުއްލި މައްސަލައެއް ވެސް ހުށަހެޅުއްވި އެވެ. ނަމަވެސް މައްސަލަ ވަނީ ބޭރުކޮށްލާފަ އެވެ.
ކޮމެންޓް
Republic of Maldives