އެއް އަހަރު ތެރޭ މަސްވެރިކަމުގެ ސިނާއަތް ވަރުގަދަކުރުމުގެ ބިންގާތައް އެޅިއްޖެ: ޝިޔާމު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަމުގެ ފުރަތަމަ އަހަރުގެ ތެރޭގައ ރާއްޖޭގެ މަސްވެރިކަމުގެ ސިނާއަތް ވަރުގަދަކުރުމަށް ބޭނުންވާ ބިންގާތައް އަޅައި ނިމިފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެ އެވެ. 

ދައުލަތުގެ މީޑިޔާ ޕަބްލިކް ސާވިސް މީޑިޔާ (ޕީއެސްއެމް)އަށް ދެއްވި ބަސްދީގަތުމެއްގައި ޝިޔާމު ވިދާޅުވީ މަސްވެރިކަަމުގެ ސިނާއަތުގެ ތަރައްގީއަށް ކުރަންހުރި މަސައްކަތްތައް ބައިވަރު ކަމަށެވެ. ހަމައެކަނި އުމްރާނީ ވަސީލަތްތައް ތައްރަގީކުރުމުގެ ދާއިރާއިން ބެލި ނަމަވެސް ކުރަންޖެހިފައި ހުރި މަސައްކަތްތައް ގިނަގުނަކަން ޝިޔާމު ފާހަގަކުރެއްވި އެވެ. 

އެގޮތުން ރާއްޖޭގައި ސިނާއީ ގޮތެއްގައި މަސްވެރިކަމުގެ މަސައްކަތް ފެށުނީ ފެލިވަރުގައި މަސް ބަންދުކުރާ ކާރުހާނާއެއް ހުޅުވުނު ހިސާބުންކަން ފާހަގަކުރައްވަމުން މިނިސްޓަރު ވިދާޅުވީ ފެލިވަރުގެ މަސް ކާރުހާނާއަށް 47 އަހަަރުވީއިރު އަދިވެސް އެ ކާރުހާނާއިން ދުވާލެއްގެ މައްޗަށް ޕްރޮސެސްކުރެވެނީ އެންމެ 35 ޓަނު މަސްކަމަށެވެ. 

އެހެންކަމުން ރައީސް މުއިއްޒުގެ ވެރިކަމުގެ ފުރަތަމަ އަހަރުގައި ބޮޑު ސަމާލުކަމެއް ދިނީ މަސްވެރިކަމުގެ ސިނާއަތަށްޓަކައި ވަރުގަދަ ބިންގަލެއް އެޅުމަށް ކަމުގައި ޝިޔާމު ވިދާޅުވި އެވެ. އޭނާ ވިދާޅުވީ މާލީ ދަތިތަކާއެކުވެސް މަސްވެރިކަމުގެ ސިނާއަތް ކޮޅަށްޖެހުމަށްޓަކައި ރައީސް ގެންގުޅުއްވާ ތަސައްވުރު ތަންފީޒުކުރުމަށް މި އަހަރު މަގުފަހިކުރެވުނު ކަމަށެވެ. 

މިހާރު ރާއްޖޭގައި މަސް ރައްކާކުރުމުގެ ކެޕޭސިޓީގެ ގޮތުގައި ހުރީ 8،500 ޓަނުގެ މަސް ރައްކާކުރެވޭ ވަރުގެ ގާބިލުކަން ފާހަގަކުރައްވަމުން ޝިޔާމު ވިދާޅުވީ އެ ގޮންޖެހުމުން އަރައިގަތުމަށް މަސް ރައްކާކުރުމުގެ ގާބިލުކަން އިތުރުކުރުމަށް ރާއްޖޭގެ އެކި ކަންކޮޅުތަކުގައި މަސް ރައްކާކުރެވޭނެ ފެސިލިޓީތައް ގާއިމުކުރުމުގެ މަސައްކަތް މިހާރު ފެށިފައިވާ ކަމަށެވެ. އެގޮތުން ބައެއް ފެސިލިޓީތަކުގެ އަމަލީ މަސައްކަތް ފެށިފައިވާއިރު އަނެއް ބައި ފެސިލިޓީތަކުގެ މަސައްކަތްކުރުމަށް ބޭނުންވާ ފައިސާ ހަމަޖެހިފައިވާކަމަށް ޝިޔާމު ވިދާޅުވި އެވެ. 

"އަޅުގަނޑުމެން މިހާރު ރޭވިފައި ހުރި މަސައްކަތްތަކާއި ފައިސާ ލިބިފައިހުރި މަސައްކަތްތަކާއެކު 25،000 ޓަނަށް [ކޯލްޑް ސްޓޮރޭޖު ކެޕޭސިޓީ] އިތުރުކުރެވޭނެ. އެއީ މިހާރު އެ ކެޕޭސިޓީ ހުރި ވަރުގެ ތިން ގުނަ.،" ޝިޔާމު ވިދާޅުވި އެވެ. 

ޝިޔާމު ވިދާޅުވީ މަސް ރައްކާކުރެވޭނެ ނިޒާމުތައް ރަނގަޅަށް ނެތްކަމުގައިވާނަމަ، އަބަދުވެސް ޖެހޭނީ ތާޒާކޮށް މަސް ބޭރުކުރަން ކަމަށެވެ. މަހުގެ އަގު ކަނޑައެޅުމުގެ އެއްވެސް ބާރެއް ރާއްޖެއަށް ނޯންނަ ސަބަބަކީވެސް މަސް ރައްކާނުކުރެވި މަސްތައް ކިރުވުމާއެކު ބޭރުކުރަންޖެހުން ކަމަަށެވެ. 

މަސް ރައްކާކުރެވޭ މިންވަރުގެ އިތުރަށް މަސް ޕްރޮސެސްކުރުމުގެ ގާބިލުކުރުން އިތުރުކުރުމަކީވެސް މުހިއްމު ކަމެއް ކަމުގައި ޝިޔާމު ވިދާޅުވި އެވެ. މިހާރު މިފްކޯގައި މަސް ޕްރޮސެސްކުރެވެން ހުރީ ހަމައެކަނި ފެލިވަރުގައިކަން ފާހަގަކުރައްވައި ޝިޔާމު ވިދާޅުވީ ރައީސްގެ ވިސްނުންފުޅަކީ ދިވެހި މަސްވެރިން ބާނާ ހުރިހާ މަހެއް އަގު އެއްކޮށްގެން ރާއްޖެއިން ބޭރުކުރުން ކަމަށެވެ. 

މިގޮތަށް މަސްވެރިކަމަށް ކުރިމަތިވެފައި ހުރި އެކި މައްސަލަތަކަށް ދާއިމީ ހައްލުތަކެއް ހޯދުމަށް މި ސަރުކާރުން މަސައްކަތް ފަށާފައިވާކަމަށް ޝިޔާމު ވިދާޅުވި އެވެ.