"ރައީސް މުއިއްޒަށް ތާއީދު ކުރެވުނީތީ ވަރަށް ރިގްރެޓް ކުރަން"

ރިޔާސީ އިންތިހާބުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ތާއީދު ކުރެވުނީތީ ވަރަށް ބޮޑަށް ހިތާމަކުރާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޖަލުން މިނިވަންވެ ވަޑައިގަތުމަށް ފުރަތަމަ ފަަހަރަށް ޓީވީ ޕްރޮގުރާމަކަށް އަރާ ދިން އިންޓަވިއުއެއްގައި ރައީސް މުއިއްޒުއަށް ތާއީދު ކުރެވުނީތީ ހިތާމަކުރަންތޯ، ރާއްޖެޓިވީގެ ފަށާއިރު ޕްރޮގްރާމްގެ ޕްރެސެންޓަރު ސުވާލު ކުރުމުން ވިދާޅުވީ އެކަމަށް ވަރަށް ބޮޑަށް ހިތާމަ ކުރާ ކަމަށެވެ.

" އެބްސޮލިއުޓްލީ، ވަރަށް ބޮޑަށް ރިގްރެޓްކުރަން، މުއިއްޒު އަކީ އަޅުގަނޑުމެންގެ މުޑުވަކެއް، އަޅުގަނޑުމެން ރައްޔިތުންނަށް ދެއްކި ބޭފުޅެއް. އެކަމަކު މިހާރު މުއިއްޒު ވެރިކަމަށް ވަޑައިގެން ނިންމަވާ ނިންމެވުންތަކުގެ ސަބަބުން ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް ." އެ ސުވާލަށް ޖަވާބުދެއްވަމުން ވިދާޅުވިއެވެ.

އިދިކޮޅު ލީޑަރެއްގެ ގޮތުގައި މިހާރު ހަރަކާތްތެރިވަމުން އަންނަ ކުރީގެ ރައީސް ޔާމީން ވިދާޅުވީ ވެރިކަމާ ހަވާލުވެ ވަޑައިގެން މުއިއްޒު އަމަލު ކުރައްވާ ގޮތް ކަމު ނުދާ ކަމަށެވެ. އަދި ދޭސީކޮށް، ޣައިރު ޒިންމާދާރުކޮށް އަމަލުތައް ކުރާނެ ކަމާމެދު އުންމީދު ނުކުރައްވާ ކަމަށްވެސް ވިދާޅުވިއެވެ.

ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް. މި ހިނގާ ހުރިހާ ކަންތައްތަކަށް ބަލާއިރު ދިވެހިރާއްޖޭގެ ރައްޔިތުން ސާމްޕަލްއެއް ނަންގަވާ. މިވަގުތު 10 މީހުން ނެގިޔަސް، 10 މީހުންގެ ތެރެއިން 10 މީހުން ބުނާނެ ތިމަންނަމެން މިހާރު މިހިނގާ ސަރުކާރުން ކުރާ ކަންތައްތަކާއި ހިތްހަމައެއް ނުޖެހެއޭ، ހަރުގެ ޖަލްސާތަކުގަ އަޅުގަނޑު ފާޑު މިކިޔަނީކީ ރައީސް މުއިއްޒަކަށް ނޫން. ގައުމުގެ ކަންތައް ހިނގަމުންދާ ގޮތަށް." އެމަނިކުފާނު ވިދާޅުވިއެވެ.

ރައީސް ޔާމީން ވިދާޅުވީ ގައުމު މި ހާލަތު މިހާ ހިސާބަށް ވެއްޓި، ރާއްޖެ ހަލާކުވެގެން ދިއުމުގެ ހަގީގީ ޒިންމާ ނަގަންޖެހޭނީ އެމްޑީޕީ ސަރުކާރުން ކަމަށް ވިދާޅުވެ އެ ސަރުކާރަށްވެސް ވަރަށް ބޮޑަށް ފާޑުވިދާޅުވެފައެވެ.