ޖަޕާނުގެ އެމްޕަރާ ދެއްވާ ޝަރަފެއް ކުރީގެ ސްޓޭޓު މިނިސްޓަރު ޚަލީލަށް

ރާއްޖޭގެ ހާރިޖީ ދާއިރާގައި ދިގު މުއްދަތަކަށް ހިދުމަތްކުރައްވާފައިވާ ތަޖުރިބާކާރު ޑިޕްލޮމެޓު ހާރިޖީވުޒާރާގެ ކުރީގެ ސްޓޭޓް މިނިސްޓު އަހްމަދު ހަލީލަށް ޖަޕާނުގެ އެމްޕަރާ ދެއްވާ ޝަރަފެއް އަރުވައިފި އެވެ. 

ޖަޕާނާ ގުޅުންހުރި ދާއިރާތަކުން ހިދުމަތްކުރާ ފަރާތްތަކަށް އެ ގައުމުގެ އެމްޕަރާގެ ނަމުގައި ދޭ އޯޑަރ އޮފް ދަ ރައިޒިން ސަންއަކީ 1875 ވަނަ އަހަރުން ފެށިގެން އެ ގައުމުގެ ސަރުކާރުން އެކި ދާއިރާތަކުން ހިދުމަތްކުރާ ފަރާތްތަކަށް ދެމުން އަންނަ ޝަރަފެކެވެ. 

އޯޑަ އޮފް ދަ ރައިޒިން ސަންގެ ހަ ދަރަޖައެއް ނުވަތަ ގިންތިއެއްގެ ޝަރަޖު ޖަޕާނުން ދެމުންދާއިރު ޚަލީލަށް އަރުވާފައިވަނީ އޯޑ އޮފް ދަ ރައިޒިން ސަން ގޯލްޑް އެންޑް ސިލްވާ ސްޓާ އެވެ. އެއީ އެ ޝަރަފުގެ ފަސްވަނަ ދަރަޖަ އެވެ. 

1982 ވަނަ އަހަރުން ފެށިގެން ފޮރިން މިނިސްޓްރީގެ އެކި މަގާމުތައް އަދާކުރައްވާފައިވާ ހަލީލުވަނީ ރާއްޖެއިން ބޭރުގެ އެކި ޑިޕްލޮމެޓިކް މިޝަންތަކުގައި ރާއްޖެ ތަމްސީލު ކުރައްވާފަ އެވެ. އެ މިޝަންތަކުގެ އެކި ފެންވަރުގެ މަގާމުތައް އޭނާ އަދާކުރެއްވި އެވެ. 

އެންމެ ފަހުން ހަލީލު ހުންނެވީ ފޮރިން މިނިސްޓްރީގެ ސްޓޭޓު މިނިސްޓަރު ކަމުގަ އެވެ. އަދި އެ މިނިސްޓްރީގެ ފޮރިން އެފެއާޒް ސެކްރެޓަރީކަމާއި، ޖަޕާނަށް ރާއްޖެއިން ކަނޑައަޅާފައި ހުންނަވާ ސަފީރުގެ މަގާމު އޭނާ އަދާކުރެއްވި އެވެ. އަދި އދ.ގަި ހުންނަވާ ދިވެހިރާއްޖޭގެ ދާއިމީ މަންދޫބުގެ މަގާމުވެސް ހަލީލު އަދާކުރެއްވި އެވެ. 

އޭގެ އިތުރަށް ލަންކާގައި ހުންނަ ދިވެހި އެމްބަސީގެ 3 ވަނަ ސެކްރެޓަރީ ކަމުގެ މަޤާމާއި، ޔޫ.އެން.ގައި ހުންނަ ރާއްޖޭގެ ޕަރމަނަންޓް މިޝަންގެ 3 ވަނަ ސެކްރެޓަރީ ކަމުގެ މަޤާމާއި، 2 ވަނަ ސެކްރެޓަރީ ކަމުގެ މަޤާމާއި، 1 ވަނަ ސެކްރެޓަރީ ކަމުގެ މަޤާމު ހިމެނެއެވެ. އަދި މިނިސްޓްރީ އޮފް ފޮރިން އެފެއާޒްގެ ޑެޕިއުޓީ ޑިރެކްޓަރ، އިންޓަރނޭޝަނަލް އެފެއާޒް ކަމުގެ މަޤާމާއި، ޑިރެކްޓަރ ކަމުގެ މަޤާމާއި، ޑެޕިއުޓީ ޑިރެކްޓަރ ޖެނެރަލް ކަމުގެ މަޤާމާއި، އެގްޒެކެޓިވް ޑިރެކްޓަރ ކަމުގެ މަގާމުވެސް ވަނީ ފުރުއްވާފައެވެ.

ހަލީލަށް މި ޝަރަފު ލިބިވަޑައިގަތުމާ ގުޅިގެން ކުރީގެ ފޮރިން މިނިސްޓަރު އަބްދުﷲ ޝާހިދުވަނީ ހަލީލަށް މަރުހަބާ ވިދާޅުވެފަ އެވެ. އޭނާ ފާހަގަކުރެއްވި ގޮތުގައި 42 އަހަރު ހާރިޖިއްޔާއަށް ހިދުމަތްކުރެއްވި ހަލީލަކީ ރާއްޖޭގައި އަދި މި ސަރަހައްދުގައިވެސް ތިއްބެވި އެންމެ ގަދަރުވެރި ޑިޕްލޮމެޓުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. 

އަދި ޖަޕާނާއި ރާއްޖޭގެ މެދުގައި އޮންނަ ގުޅުން ބަދަހިކުރެއްވުމުގައި ހަލީލު ދައްކަވާފައިވަނީ ވަރުގަދަ ނުގުނޑާ އަޒުމެއްކަމަށްވެސް ޝާހިދު ވިދާޅުވި އެވެ.