ލަންކާގައި ހުރި ބައްޕަގެ މުދާ ދިނީ ދޮންމަންމައަށް، ސިޔާސީ ކޮށްގެން ފަތުރަނީ ދޮގު: ރައީސް
ރައީސްގެ ދޮންމަންމާފުޅާ ގުޅުވައިގެން އެމަނިކުފާނުގެ އިސްތަށިފުޅުގައި ބައެއް މީޑިޔާއިން އަޅުވާ ހުރިހާ ތުހުމަތެއް ރައީސްވަނީ ދޮގުކުރައްވާފަ އެވެ.
ބައްޕާފުޅު ޝައިޚު ހުސައިން އަބްދުއްރަހްމާނު އަވަހާރަވިއިރު އޭނާގެ ނަންފުޅުގައި ކަންކާގައި ހުރި ހުރިހާ މުދަލަކާއި ލަންކާ އެކައުންޓުތަކުގައި ހުރި ފައިސާވެސް ދެއްވީ ދޮންމަމާފުޅަށް ކަމަށާއި، އެކަން އޮޅުވާލައިގެން ފަތުރަމުންދަނީ ސިޔާސީ ގޮތުން ފަތުރާ ދޮގު ވާހަކަތަކެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު ދޮންމަންމާފުޅަކީ ލަންކާ ބޭކަނބަލެކެވެ. އޭނާއާމެދު ރައީސް ވަރަށް އިހާނަތިކޮށް ކަންކަން ކުރެއްވިކަމަށް ބުނެ އޮންލައިން ނޫހަކުން ޑޮކިއުމެންޓްރީއެއް ގެނައީ 2023 ވަނަ އަހަރުގެ ރިޔާސީ އިންތިހާބުގެ ތެރޭގަ އެވެ. އެ ޑޮކިއުމެންޓްރީގައި ދޮންމަންމާފުޅުގެ ބަސްދީގަތުމެއް ހިމަނައި ރައީސް އޭނާއަށް ދެއްވަންޖެހޭ ހައްގު ނުދެއްވާކަމުގެ ވާހަކަތައް ފަތުރާފައިވެ އެވެ.
އެ ވާހަކަތައް އަލުން ފެންމަތިވީ އެ ޑޮކިއުމެންޓްރީއަށް މީޑިއާ ކައުންސިލުގެ ނޫސްވެރިންގެ އެވޯޑުގެ ތަހުގީގީ ނޫސްވެރިކަމުގެ ދާއިރާއިން އެންމެ މޮޅު ވީޑިޔޯ/އޯޑިޔޯ އުފެއްދުމުގެ އެވޯޑު ލިބުމާ ގުޅިގެންނެވެ.
މިއަދު އެކަމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ރައީސް ފާހަގަކުރެއްވީ އެމަނިކުފާނަކީ މީހުންނާ ގުޅޭ ޒާތީ ވާހަކަތައް ދައްކަވާ ބޭފުޅެއް ނޫން ކަމެވެ. އަދި ހާއްސަކޮށް އާއިލީ ދިރިއުޅުމުގެ ކަންކަމުގެ ވާހަކަދެއްކެވުމަކީ ވަރަށް އުދަގޫ ކަމެއްގެ ގޮތުގައި ރައީސް ސިފަކުރެއްވި އެވެ.
އެހެންނަމަވެސް އެކަން އޮޅުވާލައިގެން އެމަނިކުފާނުގެ އިސްތަށިފުޅުގައި ބޮޑެތި ދޮގު ތުހުމަތުތަކެއް އަޅުވަމުންދާތީ އެކަމުގެ ހަގީގަތް ބަޔާންކޮށްދެއްވުމުގެ ގޮތުން ރައީސްވަނީ ކަން ހިނގި ގޮތުގެ ތަފުސީލު ވިދާޅުވެދެއްވާފަ އެވެ. އެގޮތުން ބައްޕާފުޅު އަވަހާރަވުމުން ތަރިކައިގެ ކަންކަން ކޯޓު މެދުވެރިކޮށް ކުރިއަށްގެންދެވި ގޮތް އެމަނިކުފާނު ވިދާޅުވެދެއްވި އެވެ.
ކޯޓު މެދުވެރިކޮށް މުދާ ބެހިއިރު ލަންކާގައި ހުރި ޝައިޚް ހުސައިން އަބްދުއްރަހުމާނުގެ ތިން ބިން އެ ބިންތަކުގައި ހަދާފައި ހުރި އިމާރާތްތަކާއެކު ދޮންމަންމާފުޅަށް ދެއްވި ކަމުގައި ވިދާޅުވި އެވެ. އެއިން ދެ ބިމެއްގައި އާމްދަނީ ލިބޭނެ ގޮތަށް ގެސްޓުހައުސް ހަދާފައިހުރިއިރު ތިންވަނަ ބިމުގައި ދިރިއުޅޭ ގޮތަށް ގެއެއް އަޅާފައި ހުރިކަން ރައީސް ހާމަކުރެއްވި އެވެ.
އޭގެ އިތުރަށް ރައީސްގެ ބައްޕާފުޅުގެ ނަމުގައި ލަންކާގައި ހުރި އެކައުންޓުތަކުގައި ހުރި ހުރިހާ ފައިސާއެއްވެސް ދޮންމަންމާފުޅަަށް ދެއްވުމުން، މާލޭގައި ހުރި ބައްޕަގެ މުދަލުން ހުވަފެތް އަންބަކަށް ލިބޭ ބައިކުޅަ ބައި ދޮންމަންމާފުޅު ރައީސަށް ދޫކޮށްލެއްވިކަމަށް ކޯޓުގައި ވިދާޅުވެފައިވާކަން ރައީސް ހާމަކުރެއްވި އެވެ.
"މިހާބޮޑަށް އޮޅުވާލާ އަގުވައްޓާލަން މިއީ ސިޔާސި ވިސްނުމެއްގައި ކުރާކަމެއް. ލަންކާގައި ހުރި ތިން ގޯއްޗާ ޢިމާރާތާ ހުރިހާ އެއްޗެއް ފައިސާއާއެކު އެހުރީ ދޮންމަންމައަށް ދީފައި. އިތުރަށް ކުރި އެއްވެސް ކަމެއްނޯންނާނެ. އަޅުގަނޑުގެ ބޮލުގައަޅުވަން ދައްކާ އެއްވެސް ވާހަކަތަކީ އަޅުގަނޑާ ގުޅިފައިވާ ވާހަކަތަކެއް ނޫން،" ދޮންމަންމާފުޅާ އަޅުވައިގެން ކުރާ ތުހުމަތުތައް ދޮގުކުރައްވައި ރައީސް ވިދާޅުވި އެވެ.
ކޮމެންޓް
Republic of Maldives