ބަންގާޅުގެ އަންނައުން އެކްސްޕޯޓަރުން | "ރާއްޖެއިން އެކްސްޕޯޓުކުރުމުން ބޮޑު ފައިދާއެއް ލިބޭ"

ރާއްޖެ މެދުވެރިކޮށް އެއާ ފްރައިޓުކޮށްގެން ވައިގެ މަގުން މުދާ ޔޫރަޕަށް އެކްސްޕޯޓުކުރުމުން ކޮންމެ ކިލޯއަކުން ގާތްގަނޑަކަށް އެއް ޑޮލަރު ސަލާމަތްވާކަމަށް ބަންގުލަދޭޝުގެ އަންނައުނު އެކްސްޕޯޓުކުރާ ކުންފުނިތަކުން ބުނެފި އެވެ. 

ބަންގުލަދޭޝްގައި އެންމެ ފުޅާ ދާއިރާއެއްގައި ދައުރުކުރާ އިނގިރޭސި ނޫސްކަމަށްވާ "ދި ޑެއިލީ ސްޓާ"އިން ރިޕޯޓުކުރި ގޮތުގައި ކުރިއްސުރެެ ވައިގެ މަގުން މުދާ ޔޫރަޕަށް ބޭރުކުރަން ބޭނުންކުރަމުން އައި ބަނދަރުތައްކަމަށްވާ ދާކާއާއި ކަލްކަޓާއާއި ކޮލަމްބޯ އަދި ސިންގަޕޫރުގެ ވައިގެ ބަނދަރުތައް މިހާރު އެކަމަށް މާ އަގު ބޮޑުވެފައި ނުވަތަ ލަސްވެފައި އުދަގޫ ކަމަށް އެކްސްޕޯޓަރުން ބުނެ އެވެ. 

ބަންގާޅުގައި ދަރިވަރުން ކުރަން ފެށި މުޒާހަރާތަކުގެ ސަބަބުން ރެޑީމޭޑް އަންނައުނު ބޭރުކުރާ ކުންފުނިތަކަށް އެތަކެތި ބޭރުނުކުރެވި ބޮޑު ބެކްލޮގެއްވަނީ އުފެދިފަ އެވެ. އެއިރު މުދާ ބޭރުކުރުމުގެ އަގުތައް ބޮޑުވެ ކިލޯއެއް 6.30 ޑޮލަރާއި 6.50 ޑޮލަރާ ދެެމެދަށް އުފުލުމަށްފަހު މިހާރު 3.80 ޑޮލަރާއި 4.10 ޑޮލަރާ ދެމެދުގެ މިންވަރަކަށް އަގުތައް ތިރިވެފައިވާކަމަށް އެ ނޫހުން ރިޕޯޓުކޮށްފައިވެ އެވެ. 

އެ ދުވަސްވަރު ބަންގުލަދޭޝްގެ އެކްސްޕޯޓަރުންގެ ނަޒަރު ރާއްޖެއަށް ހުއްޓުނެވެ. އެ ނޫހަށް މައުލޫމާތު ދެއްވަމުން ބަންގުލަދޭޝް ފްރެއިޓް ފޯވަޑާސް އެސޯސިއޭޝަން (ބާފާ)ގެ ރައީސް ކަބީރް އަހްމަދު ވިދާޅުވީ އެހެން މަގުތަކުން މުދާ ބޭރުކުރުމުގެ އަގު ބޮޑުވެފައި އޮތް ދަނޑިވަޅެއްގައި ރާއްޖެ އެކްސްޕޯޓަރުންނަށް ފެނުނީ ތަބީއީ ގޮތަކަށް ކަމަށެވެ. 

ބަންގާޅުގެ އިންތިގާލީ ސަރުކާރު ވެރިކަމާ ހަވާލުވެ ކަންކަން ހަމަޖެހިލައި އިގުތިސާދީ ހަރަކާތްތައް ހިނގައިގަތުމާއެކު، ޑްރައި ކާގޯ ޑާކާ އެއާޕޯޓުން ބޭރުކުރަން އޮތް ޑިމާންޑު ބޮޑުތަނުން އުފުލުނެވެ. އެގޮތުން ކުރިން ދުވާލަކު 400 ޓަނާއި 450 ޓަނާ ދެމެދުގެ އަދަދަކަށް މުދާ ބޭރުކުރާ އެއާޕޯޓުން ދުވާލަކު 800 ޓަނާއި 900 ޓަނާ ދެމެދުގެ މިންވަރަކަށް ޑްރައި މުދާ ބޭރުކުރަން ފެށި އެވެ. 

ކަނޑުމަގުން ޗިޓަގޮންގް ބަނދަރުން މުދާ ބޭރުކުރަން ބަލައިލިއިރު ދަރިވަރުންގެ އިހުތިޖާޖުގައި އުފެދުނު ސިޔާސީ ހަމަނުޖެހުންތަކުގެ ކޮޅިގަނޑުގައި އެ ބަނދަރުވެސް އޮތީ ބަންދު ބޯޑު އަޅުވާފަ އެވެ. އެހެންކަމުން ވަރަށް އަވަހަށް ބޭރުކުރަންޖެހިފައި ހުރި މުދާތައް ބޭރުކުރާނެ އަވަސް މަގެއް ހޯދުން އެކްސްޕޯޓަރުންނަށް ލާޒިމުވި އެވެ. 

ދާކާގެ ހަޒްރަތު ޝާހްޖަލާލް އެއާޕޯޓުގެ އެކްސްޕޯޓަަރުންގެ އަތްފޯރާ ވަރަށްވުރެ މިހާރު ބޮޑެވެ. އެ އެއާޕޯޓުގެ ހިންގުމުގެ ހަރަދުތަކާއި ނަގާ ފީތަކާއި ހިންގުމުގައި ދިމާވާ ދަތިތަކުގެ ސަބަބުން އަގުތައް އުފުލެނީ އެވެ. އަދި އެ އެއާޕޯޓަށް ބޭނުންވާ އިކުއިޕްމެންޓު ނެތުމުގެ މައްސަލައަކީވެސް ބޮޑު މައްސަލައެކެވެ. ސްކޭންކުރާ މެޝިންތަކާއި، ގޮވާތަކެތި ދެނެގަންނަ ނިޒާމުތައް އެކަށީގެންވާ މިންވަރަށް އެ ވައިގެ ބަނދަރުގައި ނެތެވެ. އަދި އެންމެ ބޮޑު މައްސަލައަކީ ދާކާއިން ދަތުރުކުރާ ކަނެކްޓިން ފުލައިޓުތައް މަދުވުމެވެ. 

ބަންގާޅު އެކްސްޕޯޓަރުން ބުނާ ގޮތުގައި ދާކާ އެއާޕޯޓާ ހިލާފަށް ވެލާނާ އިންޓަނޭޝަނަލް އެއާޕޯޓުން މުދާ ބޭރުކުރަން ހޭދަވަނީ ކިލޯއަކަށް 3 ޑޮލަރާއި 3.50 ޑޮލަރާ ދެމެދުގެ އަދަދެކެވެ. އަދި މުދާ ބޭރުކުރެވޭ ދުވެލިވެސް ހަލުއިވެފައި އަވަހެވެ. 

ގައުމީ އެއާލައިން މޯލްޑިވިއަންއާއި ޔޫއެސް ބަންގްލާ އަދި ސްރީ ލަންކަަން އެއާލައިންސް މެދުވެރިކޮށް ރާއްޖެއަށް މުދާ ފޮނުވުމުގެ އިތުރަށް ކަނޑުމަގުން ދަތުރުކުރާ އުޅަނދުފަހަރުގައި ކޮލަމްބޯ މަގުންވެސް ރާއްޖެއަށް މުދާ ފޮނުވޭކަމަށް ކަބީރް އަހްމަދު ވިދާޅުވި އެވެ. އަދި އެއަށްފަހު ރާއްޖެއިން ޔޫރަޕަށް ދަތުރުކުރާ އެއާލައިންތަކުގެ ފުލައިޓުތަކުގައި ޔޫރަޕުގެ މަންޒިލުތަކަށް އެ މުދާ އެކްސްޕޯޓު ކުރެވެ އެވެ. 

އިތުރަށް އަހްމަދު ވިދާޅުވީ އިންޑިޔާގެ ވައިގެ ބަނދަރުތަކުން މުދާ ބޭރުކުރާއިރު އެ ގައުމުގެ އުފެއްދުންތަކަށް ބޮޑަށް އިސްކަންދޭކަން ފާހަގަކުރެވިފައިވާ ކަމަަށެވެ. އަދި ބަންގާޅުގެ އުފެއްދުންތައް އިންޑިޔާގެ އުފެއްދުންތަކަށްވުރެ ބޭރުކުރުމުގައި ފަސްކުރުމަކީ އިންޑިޔާ ބަނދަރުތަކަށް ބަރޯސާވާން ބަންގާޅު އެކްސްޕޯޓަރުން ފަސްޖެހޭ ސަބަބެއްގެ ގޮތުގައި އަހްމަދު ފާހަގަކުރެއްވި އެވެ. 

އޭގެ އިތުރަށް އޭނާ ފާހަގަކުރެއްވީ އެއްގަމު މަގުން ބެނަޕޯލް މެދުވެރިކޮށް އިންޑިޔާއަށް މުދާ އެތެރެކުރުމަށްފަހު ކޮލްކަޓާ ނުވަތަ އެނޫންވެސް ވައިގެ ބަަނދަރަކުން ޔޫރަޕަށް އަންނައުނު ބޭރުކުރުމަށް ކުރަންޖެހޭ ހޭދައިގެ ބޮޑުކަމެވެ. ރާއްޖެއަށް މުދާ ފޮނުވުމަށްފަހު ވައިގެ މަަގުން ބޭރުކުރުމުގެ ހަރަދު ކުޑަކަމަށް އޭނާ ވިދާޅުވި އެވެ. 

ބަންގްލަދޭޝް ގާމަންޓް މެނިފެކްޗަރާސް އެންޑް އެކްސްޕޯޓާސް އެސޯސިއޭޝަނުގެ ކުރީގެ ރައީސް ފާރޫގީ ހަސަން "ދި ޑެއިލީ ސްޓާ"އާ ވާހަކަދައްކަވަމުން ވިދާޅުވީ ދާކާ އެއާޕޯޓުން ދަތުރުކުރާ ބައިނަލްއަގުވާމީ ފުލައިޓުތައް މަދުކަމުން އެ އެއާޕޯޓުން މުދާ ބޭރުކުރަން ދަތިކަމަށެވެ. އަދި އެ އެއާޕޯޓުގެ ހިދުމަތްތަކުގެ ފެންވަރު ދަށްވުމާއި އަގުބޮޑުވުމަކީވެސް ދާކާ އެއާޕޯޓުން މުދާ ބޭރުކުރަން އުދަގޫވާ ސަބަބެއްގެ ގޮތުގައި ފާރޫގީ ފާހަގަކުރެއްވި އެވެ. 

އޭނާ ފާހަަގަކުރެއްވި ގޮތުގައި ކޮލަމްބޯއާއި ސިންގަޕޫރއި މެލޭޝިޔާ އަދި އިންޑިޔާގެ ވައިގެ ބަނދަރުތަކުން ޝިޕްމެންޓުތައް ބޭރުކުރުމުގައި އެކްސްޕޯޓަރުންނަށް ހުރި ޕްރެޝަރުތައް ބައިވަރެވެ. މިފަދަ ކަންކަމާހުރެ ރާއްޖެއަކީ އެ ތަންތަނުގެ ބަދަލުގައި އެކްސްޕޯޓަށް ބޭނުންކުރަން ވަރަށް މުނާސަބު ބަދީލެއް (އަލްޓަނޭޓިވްއެއް) ކަމަށް އޭނާ ދެކެވަޑައިގަންނަވަ އެވެ.