ޝަރުތު ފުރިހަމަނުވާ ދުންފަތުގެ އިމްޕޯޓުތައް ނައްތައިލުމުގެ ހަރަދު ގެނައި މީހަކު ދޭންޖެހޭ ގޮތަށް ހަދައިފި

ރާއްޖެއަށް އެތެރެކުރާ ދުންފަތުގެ ބާވަތްތަކުގައި ފުރިހަމަވާންޖެހޭ ޝަރުތު ފުރިހަމަނުވާ ދުންފަތުގެ އުފެއްދުންތައް ނައްތައިލުމުގެ ހަރަދު އެ އުފެއްދުމެއް އެތެރެކުރި ބަޔަކު ދޭންޖެހޭ ގޮތަށް ގަވާއިދު ބަދަލުކޮށްފި އެވެ. 

ދުންފަތުގެ ބާވަތްތައް ޕެކެޓުކޮށް ޕޭބަލްކުރުމާ ބެހޭ ގަވާއިދަށް ގެނައި އިސްލާހުގައި ބަޔާންކޮށްފައިވަނީ އެތެރެކުރުމުގެ މަރުހަލާގައި ގަވާއިދާ ހިލާފަށް އެތެރެކުރާ ދުންފަތުގެ ބާވަތްތައް ނައްތައިލުމާއި، ގަވާއިދާ ހިލާފުވާ ފަރާތްތައް ޖޫރިމަނާކުރުމާއި، ޖޫރިމަނާ ފައިސާ ނުދައްކާނަމަ އެ ފައިސާ ހޯދުމުގެ މަސައްކަތްކުރާނީ މޯލްޑިވްސް ކަސްޓަމްސްއިން ކަމަށެވެ. 

އެތެރެކުރާ މަރުހަލާ ފިޔަވައި އެހެން މަރުހަލާއެއްގައި ގަވާއިދާ ހިލާފުވާ ފަރާތްތައް ޖޫރިމަނާކުރުމާއި ފައިސާ ނުދައްކާ ފަރާތްތަކުގެ އަތުން ފައިސާ ހޯދުމާއި އެތަކެތި ނައްތައިލުމުގެ މަސައްކަތްކުރާނީ އެޗްޕީއޭއިންކަމަށްވެސް ގަވާއިދުގައި ބުނެފައިވެ އެވެ. 

އަދި ކުރިއާ މެދުވެރިކޮށް އެތެރެކުރާ ދުންފަތުގެ ބާވަތްތައް ގަވާއިދަށް ނުފެތޭ ހާލަތުގައި އެތަކެތި ހިފަހައްޓައި އެތެރެކުރި ފަރާތެއް ޖޫރިމަނާކޮށް، ކަސްޓަމްސްގެ އާންމު ގަވާއިދުގެ ތެރެއިން އެތަކެތި ނައްތައިލަންވާނެ ކަމަށާއި، އެކަމަށް ހިނގާ ހަރަދު އެތަކެތި އެތެރެކުރި ފަރާތަކުން ކަސްޓަމްސައަށް ދައްކަންޖެހޭނެ ކަމަށްވެސް ބުނެފައިވެ އެވެ. 

އޭގެ އިތުރަށް މިފަދައިން ހިފަހައްޓާ ތަކެތި ކަސްޓަމްސްގެ ބެލުމުގެ ދަށުގައި ހުންނައިރު ހިނގާ ހަރަދުވެސް އެ ތަކެތި އެތެރެކުރި ފަރާތުން ދައްކަންވާނެ ކަމަށް ގަވާއިދުގައި ބަޔާންކުރެ އެވެ.