ނަސްރުގެ ދުވަސް ފާހަގަކުރުމުގެ ހަރަކާތްތައް ފަށައިފި، ހާއްސަ މައުރަޒު ހުޅުވައިފި

މިއަދު ފާހަގަކުރަމުންދާ ނަސްރުގެ ދުވަސް އިހުތިފާލުކުރުމުގެ ހަރަކާތްތައް ފަތިސްނަމާދުގެ ޖަމާއަތުން ފަށައިފި އެވެ. 

އިސްލާމީ މަރުކަޒުގައި މިއަދު އޮތް ފަތިސްނަމާދުގެ ޖަމާއަތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒާއި، ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފު އަދި ދިވެހިރާއްޖޭގެ އުއްތަމަފަނޑިޔާރު އަލްއުސްތާޛު މުއުތަސިމް އަދުނާނު ބައިވެރިވެވަޑައިގެންފައިވެ އެވެ. 

ފަތިސްނަމާދަށްފަހު އިސްލާމީ މަރުކަޒު ކައިރީ އޮންނަ މައިޒާނުގައި ނަސްރުގެ ދުވަހުގެ މުނާސަބަތުގައި ނަސްރުގެ ދުވަހުގެ ބިނާގައި ގައުމީ ދިދަ ބެހެއްޓުމުގެ ރަސްމިއްޔާތެއް ބާއްވާފައިވެ އެވެ. އެ ރަސްމިއްޔާތު ޝަރަފުވެރިކޮށްދެއްވީ ރައީސް މުއިއްޒެވެ. އެ ރަސްމިއްޔާތުގައި ނަސްރުގެ ދުވަހުގެ ޝަހީދުންގެ ހަނދާނުގައި ބަނޑީގެ ސަލާމެއް އަރުވާފައިވެ އެވެ. 

އެ ހަރަކާތަށްފަހު ރައީސްވަނީ ނަސްރުގެ ދުވަހުގެ މައުރަޒު ހުޅުވައިދެއްވާފަ އެވެ. އެ މައުރަޒު މިއަދުން ފެށިގެން އަންނަ ހޮނިހިރު ދުވަހާ ހަމއަށް އޮންނާނެ އެވެ. ކޮންމެ ދުވަހަކު ހެނދުނު 9 އިން މެންދުރު 12 އަށް އަދި މެންދުރު ފަހު 2 އިން ހަވީރު 6 އަށް އަދި ރޭގަނޑު 8 އިން 10 އަށް އާންމުންނަށް މައުރަޒު ހުޅުވާފައި ހުންނާނެ އެވެ. 

މި މައުރަޒުގައި 200 އަށްވުރެސް ގިނަ ޑިސްޕްލޭ ހުންނާނެ ކަމަށާއި، މި އަހަރުގެ މައުރަޒުގައި 3 ނޮވްނެބަރު 1988 ވަނ އަހަރު ސިފައިންގެ ދިފާއުކުރުމަށް ސިފައިން ބޭނުންކުރި ބައެއް ހަތިޔާރު ދައްކައިލަން ހުންނާނެ އެވެ. މީގެ ކުރިން ނަސްރުގެ ދުވަހުގެ މައުރަޒުގައި ހުންނަނީ ދުވަހާ ގުޅުންހުރި ފޮޓޯތަކެވެ.