އެންމެ ބޭނުންވާ ސްޕީޑުގައި ބުރިޖުގެ މަސައްކަތް ކުރިއަށްނުދޭ: މުއްތަލިބު
މުހިއްމު ބައެއް މަސައްކަތްތައް ލަސްވަމުންދާ ސަބަބެއްކަމަށް އެފްކޯންސްއިން މޫސުމީ ސަބަބުތައް ފާހަގަކުރި ނަމަވެސް އެފަދަ ސަބަބަކާހުރެ އިތުރު މުއްދަތެއް ނުދެވޭނެކަން ކޮންޓްރެކްޓުގައި ފާހަގަކޮށްފައިވާކަމަށް ޑރ.މުއްތަލިބު ވިދާޅުވި އެވެ.
މާލެ ތިލަމާލޭ ބުރިޖުގެ މަސައްކަތް އެންމެ ބޭނުންވާ ސްޕީޑުގައި ކުރިއަށްނުދާކަމަށް ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބު ވިދާޅުވެއްޖެ އެވެ.
އިއްޔެ ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން މުއްތަލިބު ވިދާޅުވީ، ކަނޑުގައި ބުރިޖު އެޅުމުގެ މަސައްކަތް މީގެ ކުރިން މި މަސައްކަތްކުރާ އެފްކޮންސްއިން ކޮށްފައިނުވާތީ ތަޖުރިބާ ނެތުމުގެ މައްސަލަތަކެއް އެ ކުންފުންޏަށް ކުރިމަތިވެފައިވާތީ ސަޕްލިމަންޓަރީ ކޮންޓްރެކްޓެއް ހަދައި އިތުރު މުހުލަތު މަސައްކަތް ނިންމުމަށް އެ ކުންފުންޏަށް ދީފައިވާ ކަމަށެވެ.
ކުރީ ސަރުކާރުން ގާއިމުކުރި ސަޕްލިމަންޓްރީ ކޮންޓްރެކްޓުގެ ދަށުން 30 މަސްދުވަހުގެ މުއްދަތެއް މަސައްކަތް ނިންމުމަށް ދީފައިވާއިރު ކުރިން މަސައްކަތްކުރި ދުވެއްޔަށް ބަލާއިރު އެ މުއްދަތުގައި މަސައްކަތް ނިމޭނެކަމަށް އެއިރު ގަބޫލުކުރެވުނު ކަމުގައި މުއްތަލިބު ވިދާޅުވި އެވެ. އަދި އެ މުއްދަތުގައި މަސައްކަތް ނިމޭނެ ކަމުގެ ޔަގީންކަން އެއިރު ކޮންޓްރެކްޓަރުވެސް ދީފައި އޮތް ކަމަށެވެ.
ނަމަވެސް ކަނޑުގަދަވުން ފަދަ މޫސުމީ ބަދަލުތައް ފާހަގަކޮށް އެކަމަކީ ބަހަނާއެއްގެ ގޮތުގައި ދައްކައިގެން ކޮންޓްރެކްޓަރުގެ ފަރާތުން މަސައްކަތްތައް ލަސްވަމުންދާކަން ފާހަގަކުރެވިފައިވާކަމަށް މުއްތަލިބު ވިދާޅުވި އެވެ.
"އަޅުގަނޑު ފާހަގަކޮށްލަން ބޭނުންވޭ މޫސުމީ ގޮތުން މިއަންނަ ކަންތައްތަކާ ގުޅިގެން، ކަނޑުގަދަވުމާއި މިފަދަ ކަންކަމާ ގުޅުވައިގެން ބައެއްފަހަރު ސަބަަބު ދައްކައިގެން ކޮންޓްރެކްޓަރުގެ ފަރާތުން ލަސްވަމުންދާކަން،" މުއްތަލިބު ވިދާޅުވި އެވެ.
އެގޮތުން މުހިއްމު ބައެއް މަސައްކަތްތައް އެންމެ ބޭނުންވާ މިންވަރަށްވުރެ ލަސްވަމުންދާކަން ފާހަގަކުރައްވަމުން މުއްތަލިބު ވިދާޅުވީ ކަނޑު އަޑީގެ ޕައިލްޖެހުމުގެ މަސައްކަތަކީ އެގޮތަށް ލަސްވެފައިވާ ވަރަށް މުހިއްމު މަސައްކަތެއް ކަމަށެވެ. އަދި އެގޮތަށް މޫސުމީ ބަދަލުތައް ބަހަނާއެއްގެ ގޮތުގައި ދައްކައިގެން މަސައްކަތް ލަސްކުރެވިދާނެކަމަށް ސަރުކާރުން ގަބޫލުނުކުރާކަން ކޮންޓްރެކްޓަރަށް މިހާރު އަންގާފައިވާނެ ކަމުގައި މިނިސްޓަރު ވިދާޅުވި އެވެ.
އިތުރަށް މުއްތަލިބު ފާހަގަކުރެއްވީ ކޮންޓްރެކްޓަށް އިތުރުކޮށްފައިވާ 30 މަސްދުވަހުގެ މުހުލަތަކީ ސަރުކާރުން ހުށަހަޅައިގެން ދީފައިވާ މުހުލަތެއް ނޫން ކަމެވެ. އޭނާ ވިދާޅުވީ އެ މުހުލަތަކީ އެފްކޯންސްއިން ހުށަހަޅައި، އެ ހުށަހެޅި ހުށަހެޅުމަށް އެއްވެސް ބަދަލެއް ނުގެނެސް ދީފައި އޮތް މުއްދަތެއް ކަމަށެވެ.
އަދި ކަނޑުގަދަވުމާއި އެހެނިހެން ސަބަބުތަކާހުރެ އެއްވެސް މުއްދަތެއް އިތުރުނުކުރެވޭނެ ކަމުގައި އެއްބަސްވުމުގައި ބުނެފައިވާނެ ކަން ފާހަގަކުރައްވަމުން މުއްތަލިބު ވިދާޅުވީ ސަރުކާރުން މަސައްކަތްކުރަނީ ލަސްވަމުންދާ މަސައްކަތްތައް ޝެޑިއުލާ އެއްގޮތަށް ކުރިއަށްގެންގޮސް ކަނޑައަޅާފައިވާ ވަގުތަށް މަސައްކަތް ނިންމުމަށް ކަމަށެވެ.
ކޮމެންޓް
Republic of Maldives