އޭސީސީގެ ބާރުތައް ރައީސްގެ އަތްޕުޅަށް ނަންގަވާ ވާހަކައަކީ އޮޅުވައިލުމެއް: ޕީއެންސީ މެންބަރުން
ޕީއެންސީ މެންބަރުން ފާހަގަކުރެއްވީ ހުށަހަޅާފައިވާ އިސްލާހުގެ ދަށުން ކޮމިޝަނުގެ ރައީސާއި ނައިބުރައީސް އައްޔަންކުރުމުގެ ބާރު މުތުލަގުކޮށް ރައީސުލްޖުމްހޫރިއްޔާއަށް ނުލިބޭ ކަމެވެ.
އެންޓި ކޮރަޕްޝަން ކޮމިޝަން (އޭސީސީ)ގެ ބާރުތައް ރައީސުލްޖުމްހޫރިއްޔާގެ އަތްޕުޅަށް ނަންގަވާކަމަށް ބުނެ އިދިކޮޅު އެމްޑީޕީން ދައްކަމުންދާ ވާހަކައަކީ އޮޅުވައިލުމަށް ދައްކަމުންދާ ވާހަކައެއްކަމަށް ޕީއެންސީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެންބަރުން ވިދާޅުވެއްޖެ އެވެ.
ސަރުކާރުގެ ފަރާތުން އެންޓި ކޮރަޕްޝަން ކޮމިޝަނުގެ ގާނޫނު އިސްލާހުކޮށް އެ ކޮމިޝަނުގެ ރައީސާއި ނައިބުރައީސަކީ ރައީސުލްޖުމްހޫރިއްޔާ މަޖިލީހަށް ނަން ފޮނުއްވައިގެން މަޖިލީހުން ރުހުން ލިބިގެން އައްޔަންކުރާ ބޭފުޅުންތަކެއްގެ ގޮތުގައި ހަމަޖެއްސުމަށް ހުށަހަޅާފައިވާ ބިލަށް ބަހުސްކުރައްވަމުން ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވީ މި އިސްލާހަކީ އިންސާފު ކަށަވަރުކޮށް ދެފުށް ފެންނަ ގޮތަކަށް ކަންކަން ގެންދިއުމަށް ގެނެވޭ އިސްލާހެއް ކަމަށެވެ.
އެގޮތުން އެ އިސްލާހުގެ ދަށުން ކޮމިޝަނުގެ ރައީސާއި ނައިބުރައީސް އައްޔަންކުރައްވާނީ ރައީސުލްޖުމްހޫރިއްޔާ ނޫންކަމަށާއި، ރައީސް ނަންފުޅު ފޮނުއްވުމުން ކޮމިޝަނުގެ ރައީސާއި ނައިބުރައީސް ކަމަށް އައްޔަންކުރާނެ ބޭފުޅުން ނިންމާނީ ރައްޔިތުންގެ މަޖިލީހުން ކަމަށްވެސް ޝުޖާ ވިދާޅުވ އެވެ.
އިތުރަށް ޝުޖާ ފާހަގަކުރެއްވީ މި އިސްލާހު ފާސްކުރި ނަމަވެސް މިހާރުވެސް ކޮމިޝަނުގެ ރައީސް އަދި ނައިބުރައީސްގެ މަގާމުގައި ތިއްބެވި ބޭފުޅުންގެ ދައުރު ހަމަވަންދެން އެ ބޭފުޅުން މަގާމުތަކުގައި ތިއްބަވާނެ ކަމުގައިވެސް އެ އިސްލާހުގައި ބުނެފައިވާ ކަމެވެ.
"އެހެންކަމުން އަޅުގަނޑު ގަބޫލުކުރަނީ ރައްޔިތުންގެ އިތުބާރު [އޭސީސީއަށް] ބޮޑަށް ހޯދުމަށްޓަކައި ކަމަށް މި އިސްލާހު ހުށަހެޅިގެން މިދިޔައީ،" ޝުޖާ ވިދާޅުވި އެވެ.
ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދުވެސް ފާހަގަކުރައްވާފައިވަނީ މިހާރު ހުށަހަޅާފައިވާ އިސްލާހުގައި ކޮމިޝަނުގެ ރައީސާއި ނައިބުރައީސް އައްޔަންކުރުމުގެ ބާރު ރައީސަށް މުތުލަގަށް ލިބެނީ ނޫން ކަމެވެ. ކުރިން މި ގާނޫނު އޮތް ގޮތުން ކޮމިޝަނުގެ ރައީސާއި ނައިބުރައީސުން އައްޔަންކުރުމުގައި ރައްޔިތުންގެ މަޖިލީހުގެ ދައުރެއްވެސް ނޯންނަކަން ފާހަގަކުރައްވައި އޭނާ ވިދާޅުވީ މިހާރު މަޖިލީހުގެ ދައުރެއް އޮތުމަކީ އެންމެ އިންސާފުވެރި ރަނގަޅު ގޮތް ކަމަށެވެ.
"މިހާރު މިއޮތީ ރައީސުލްޖުމްހޫރިއްޔާ ނަންތައް މަޖިލީހަށް ފޮނުވުމުން މަޖިލީހުން ފާސްކުރާ ބޭފުޅެއް ރައީސުލްޖުމްހޫރިއްޔާ އައްޔަންކުރައްވާ ގޮތަށް. އެހެންވީމާ އަޅުގަނޑު ދަންނަވާނީ ކުރިން އޮތް ގޮތަށްވުރެ ގާނޫނީ ފަންނުން ބަލައިލާއިރުވެސް މިހާރު އޮތް ގޮތް ރަނގަޅުކަމަށް.،" އަބްދުއްސައްތާރު ވިދާޅުވި އެވެ.
މަނަދޫ ދާއިރާގެ މެންބަރު ހުސްނީ މުބާރަކުވެސް ވިދާޅުވެފައިވަނީ ކޮމިޝަނުގެ ރައީސާއި ނައިބުރައީސްގެ މަގާމަށް މީހުން އައްޔަންކުރުމުގެ މުތުލަގު ބާރު ބިލުން ރައީސަށް ނުލިބޭ ކަމަށެވެ. އަދި ދުނިޔޭގެ އެހެން ގައުމުތަކުގައި ކަންކުރާ ގޮތަށް ބަލާއިރު، ސިންގަޕޫރާއި މެލޭޝިޔާއިން މިސާލު ނަންގަވަައި އެ ގައުމުތަކުގައި އެންޓި ކޮރަޕްޝަން ކޮމިޝަންތަކުގެ ރައީސުން ނަގަނީ އެ ގައުމުތަކުގެ ބޮޑުވަޒީރުންގެ ލަފާގެ މަތިންކަމަށް ހުސްނީ ވިދާޅުވި އެވެ.
ހުސްނީ ވިދާޅުވީ ކޮމިޝަނުގެ މެންބަރުންވެސް އައްޔަންކުރަނީ ރައީސް ނަންތަކެއް މަޖިލީހަށް ފޮނުއްވުމުން މަޖިލީހުން ކަމަށެވެ. އެހެންކަމުން އެގޮތަށް ކޮމިޝަންތަކުގެ ރައީސުންނާއި ނައިބުރައީސުން އައްޔަންކުރުމަކީ ކޮމިޝަނުގެ މުސްތަގިއްލުކަމާއި މިނިވަންކަން އިތުރަށް ހަރުދަނާވާނެ ކަމެއް ކަމަށެވެ.
ކޮމެންޓް
Republic of Maldives