ބޯން މެރޯ ހެދުމަށް ފޮނުވި ކުދިންގެ ތެރެއިން ތިން ކުއްޖަކު އެއްކޮށް ފަސޭހަވެއްޖެ
މި އަހަރު ބޯންމެރޯ އޮޕަރޭޝަން ހެދުމަށް ފޮނުވި 14 ކުދިންގެ ތެރެއިން އެއް ކުއްޖަކު ނިޔާވެފައިވާއިރު ތިން ކުއްޖެއްގެ ފަރުވާ ފުރިހަމަވެފައިވެ އެވެ.
މި ސަރުކާރުން މި އަހަރު ތެރޭ ބޯން މެރޯ އޮޕަރޭޝަން ހެދުމަށް ބޭރަށް ފޮނުވި ކުދިންގެ ތެރެއިން ތިން ކުއްޖަކު މިހާރު މުޅިން ރަނގަޅުވެފައިވާކަމަށް ސަރުކާރުން ބުނެފި އެވެ.
ދައުލަތުގެ މީޑިޔާ ޕީއެސްއެމްގެ ޕްރޮގުރާމެއްގައި ވާހަކަދައްކަވަމުން މޯލްޑިވިއަން ބްލަޑް ސާވިސަސްގެ އެސޯސިއޭޓް ސްޕަޝަލިސްޓް ޕީޑިއަޓްރިކްސް ޑރ.އަހްމަދު އުމަރު ވިދާޅުވީ ޒަކާތު ފަންޑުގެ އެހީގައި ބޯން މެރޯ ހެދުމަށް މި އަހަރު ރާއްޖެއިން ބޭރަށް ފޮނުވަން ކަނޑައެޅި ހުރިހާ ކުދިން މިހާރު ފަރުވާ ހޯދުމަށް ފޮނުވާފަައިވާ ކަމަށެވެ.
އެގޮތުން މި އަހަރުގެ މިހާތަނަށް 14 ކުއްޖަކު ބޯންމެރޯ އޮޕަރޭޝަން ހެދުމަށް ރާއްޖެއިން ބޭރަށް ފޮނުވާފައިވާކަން ފާހަގަކުރައްވަމުން ޑރ.އުމަރު ވިދާޅުވީ އެ ކުދިންގެ ތެރެއިން ތިން ކުއްޖެއްގެ ފަރުވާ ފުރިހަމަވެ ތެލެސީމިއާއިން މުޅިން ފަސޭހަވެފައިވާ ކަމަށެވެ.
ފަރުވާ ފުރިހަމަކޮށް ތެލަސީމިއާއިން އެކީ ސަލާމަތްވި ކުދިން އަންނަ ދެ ހަފުތާ ތެރޭގައި އަނބުރާ ރާއްޖެ އައުމަށް ހަމަޖެހިފައިވާކަމުގައި ޑރ.އުމަރު ވިދާޅުވި އެވެ.
ބޯން މެރޯ ހެދުމަށް ބޭރަށް ފޮނުވި ކުދިންގެ ތެރެއިނ އެއް ކުއްޖަކު ފާއިތުވި ހަފުތާގައި ނިޔާވެފައިވެ އެވެ. ފަރުވާ ފުރިހަމަކުރި ތިން ކުދިންނާއި ނިޔާވި ކުއްޖާ ފިޔަވައި ބާކީ ތިބި ކުދިން އޮޕަރޭޝަނަށްފަހު ފުރިހަމަކުރަންޖެހޭ ފަރުވާގެ ކަންކަން ކުރަމުން އަންނަ ކަމަށް ޑރ.އުމަރު މައުލޫމާތު ދެއްވި އެވެ.
އަދި ބާކީ ތިބި ދިހަ ކުދިންގެ ފަރުވާގެ ކަންކަން ފުރިހަމަކުރުމަށްފަހު އަންނަ ނޮވެންބަރާއި ޑިސެންބަރު މަހުގެ ތެރޭގައި އަނބުރާ ރާއްޖެއަށް އަންނާނެ ކަމުގައިވެސް އޭނާ ވިދާޅުވި އެވެ.
އަންނަ އަހަރުވެސް ބޯންމެރޯ ފަރުވާއަށް ދިހަ ކުއްޖަކު ފޮނުވާނެ އެވެ. މިހާރު ކުރިއަށްދަނީ އަންނަ އަހަރު ފަރުވާއަށް ފޮނުވާނެ ކުދިން ކަނޑައެޅުމުގެ މަރުހަލާ އެވެ.
އެގޮތުން ބޯންމެރޯ ފަރުވާ ހޯދުމަށް އެދުނު ކުދިންގެ ތެރެއިން އެކަމަށް ސިއްހީ ގޮތުން ފުރިހަމަވާންޖެހޭ ކަންކަން ފުރިހަމަވާ ކުދިން ދެނެގަތުމަށް ހަދަންޖެހޭ ޓެސްޓުތައް މިހާރު ހަދަމުންދާ ކަމަށް ޑރ.އުމަރު ވިދާޅުވި އެވެ.
ތެލަސީމިއާ ބަލީގެ ކުދިންނަށް ބޯންމެރޯ ހަދައިދިނުމުގެ މަސައްކަތް ފެށީ ރައީސް އަބްދުﷲ ޔާމީނުގެ ވެރިކަމުގަ އެވެ. އެމްޑީޕީ ސަރުކާރުގައި އެކަން ހުއްޓާލާފައި އޮތުމަށްފަހު އަލުން އެ މަސައްކަތް ފެށީ ރައީސް ޑރ.މުހައްމަދު މުއިއްޒު ވެރިކަމާ ހަވާލުވެވަޑައިގެންނެވެ.
ކޮމެންޓް
Republic of Maldives