ބަދަލުގެ ގޮތުގައި ދޫކުރި އެސެޓުތައް ނަގައި، ނުއަގުގައި ދޫކުރި އެސެޓުތަކުގެ ހަމަައަގު ހޯދަނީ
ބަދަލުގެ ގޮތުގައި ދޫކުރި އެސެޓުތަކުގެ އެއްބަސްވުންތައް ބާތިލުކޮށް، ނުއަގުގައި ކުރީ ސަރުކާރުތަކުން ދޫކުރި އެސެޓުތަކުގެ ހަމައަގު ދައުލަތަށް ހޯދޭނެ ގޮތްތަކެއް ފަހިކުރަން ސަރުކާރުން މަސަައްކަތް ކުރަމުންދާކަމަށް އުޝާމު ވިދާޅުވި އެވެ.
ކުރީ ސަރުކާރުން ބަދަލުގެ ގޮތުގައި ދޫކޮށްފައިވާ ހަރުމުދަލުގެ އެއްބަސްވުންތައް ބާތިލުކުރުމާއެކު، ނުއަގުގައި ދޫކޮށްފައިވާ އެސެޓުތަކުގެ ހައްގު އަގު ހޯދުމަށް ސަރުކާރުން މަސައްކަތް ކުރަމުންދާކަމަށް އެޓާނީ ޖެނެރަލް އަހްމަދު އުޝާމު ވިދާޅުވެއްޖެ އެވެ.
އިއްޔެ ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އުޝާމު ވިދާޅުވީ ކުރީ ސަރުކާރުން އެކުލަވައިލި ސެޓްލްމެންޓު ކޮމިޓީން ބަދަލު ދީފައިވާ ގިނަ މައްސަލަތަކުގައި ބަދަލުގެ ގޮތުގައި ދޫކޮށްފައިވަނީ ހަރު މުދާ ކަމަށެވެ. އެގޮތުން ރަށްތަކާއި ފަޅުތައް ދޫކޮށްފައިވާކަން އޭނާ ފާހަގަކުރެއްވި އެވެ. އަދި ދޫކޮށްފައިވާ އެސެޓުތަކުގެ އަގު އެއް ބިލިއަން ރުފިޔާއަށްވުރެ މަތިވާނެ ކަމުގައި ބަންޑާރަނައިބު ވިދާޅުވި އެވެ.
އެގޮތުން 11 ފަރާތަކަށް ބަދަލު ދީފައި ހުރިއިރު އެ ފަރާތްތަކަށް ގިނައިން ދޫކޮށްފައިވަނީ ފަޅާއި ރަށްތައްކަން ފާހަގަކުރައްވަމުން އުޝާމު ވިދާޅުވީ އެގޮތަށް އެ ވިޔަފާރިތަކާއި ފަރުދުންނަށް އެސެޓުތައް ދޫކޮށްފައިހުރީ ގާނޫނާ ހިލާފަށް ކަމުގައި ދެކެވަޑައިގަންނަވާ ކަމަށެވެ.
މިހާރު ސަރުކާރުން ކުރަމުންދާ މަސަައްކަތަކީ އެ އެސެޓުތައް ދޫކުރި ގޮތް ބަލަައި ގާނޫނީ އިޖުރާއާތުތަކުގެ ތެރެއިން އެ އެއްބަސްވުންތަައް ބާތިލުކުރެވޭނެ ގޮތްތައް ބެލުން ކަމަށެވެ. ގޯސްކޮށް ކޮށްފައިހުރި ހުރިހާ ކަމެއް ގާނޫނީ އިޖުރާއާތްތަކުގެ ތެރެއިން ބެއްލެވުމަށްފަހު، އެކަންކަން ބަދަލުކުރައްވާނެ ކަމުގެ ޔަގީންކަން އުޝާމު ދެއްވި އެވެ.
އެ މައްސަލާގައި ގޮތެއް ނިންމޭނެ ވަކި ތާރީހެއް ވިދާޅުވާން ދަތި ނަމަވެސް އަންނަ ނޮވެންބަރު މަހުގެ ނިޔަލަށް އެ މަސައްކަތުގައި ވަކި ގޮތެއް ކަނޑައަޅައި ނިންމައިލެވޭނެ ކަމުގައި އުޝާމު ވިދާޅުވި އެވެ.
އިތުރަށް އުޝާމު ވިދާޅުވީ ކުރީ ސަރުކާރުތަކުގައި ނުއަގުގައި ދޫކޮށްފަައިވާ އެސެޓުތައް ހޯދުމުގެ މަސައްކަތްވެސް މި ސަރުކާރުން ކުރަން ގަސްތުކުރާ ކަމަށެވެ. އެގޮތުން އެސެޓް ރިކަވަރީ ބިލެއް އެކުލަވައިލާ މަޖިލީހަށް ހުށަހެޅުމުގެ މަސައްކަަތް ކުރުމަށް ނިންމަވާފައިވާ ކަމަށާއި އެ ބިލުގެ މަސައްކަތް ކުރިއަށްދާ ކަމަށެވެ. މަޖިލީހުގެ އަންނަ އަހަރުގެ ފުރަތަމަ ދައުރަށް ބިލު ހުށަހެޅުއްވުމަށް މަސައްކަތްކުރައްވާނެ ކަމުގައި ވިދާޅުވި އެވެ.
ބަންޑާރަނައިބު ވިދާޅުވި ގޮތުގައި އެ މަސައްކަތް ނިންމައި އެސެޓް ރިކަވަރީ ބިލެއް އެކުލަވައިލެވުމުން ނުއަގުގައި ދޫކޮށްފައިހުރި އެސެޓުތަކުގެ އަސްލު އަގު ދައުލަތަށް ހޯދޭނެ އެވެ.
ކޮމެންޓް
Republic of Maldives