ހައްދުންމަތިން ފެށި ގުދުރަތީ ރައުސުލްމާލު ވަޒަންކުރުމުގެ ޕްރޮގުރާމު މުޅި ރާއްޖެއަށް
ރާއްޖޭގެ ގުދުރަތީ ވަސީލަތްތަައް އަގުމަގު ކުރުމަކީ ކުރަންޖެހިފައިވާ ކަމެއްގެ ގޮތުގައި މިނިސްޓަރު ތާރިގު ފާހަގަކުރައްވާފައިވެ އެވެ.
ހައްދުންމަތީގެ ގުދުރަތީ މުއްސަނދިކަން ވަޒަންކުރުމަށް "އެންދެރި" ނަމުގައި ފެށި މަޝްރޫއު މުޅި ރާއްޖެއަށް ފުޅާކުރައްވާނެ ކަމަށް ތިމާވެއްޓާއި ހަކަތައާ ބެހޭ ވަޒީރު ތާރިގު އިބްރާހީމް ވިދާޅުވެއްޖެ އެވެ.
އެ މަޝްރޫއުގެ ދަށުން ދޭ ގްރާންޓުތައް ދިނުމަށް ލ.ފޮނަދޫގައި އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން ތާރިގު ވިދާޅުވީ ލ.އަތޮޅުގެ ގުދުރަތީ މުއްސަނދިކަން ވަޒަންކުރަން ފެށި "އެންދެރި" މަޝްރޫއު ނިމުމުން އެފަދައިން ގުދުރަތީ މުއްސަނދިކަން ވަޒަންކުރުމުގެ މަސައްކަތް މުޅި ރާއްޖެއަށް ފުޅާކުރައްވާނެ ކަމަށެވެ.
މިނިސްޓަރު ފާހަގަކުރެއްވި ގޮތުގައި ދުނިޔޭގެ އެހެނިހެން ގައުމުތަކުގައި އެ ގައުމުތަކުގައި ހުންނަ މުހިއްމު ގުދުރަތީ ވަސީލަތްތަކުގެ އަގު ވަޒަންކޮށް ދެނެގަންނަ ކަމަށެވެ. ނަމަވެސް ރާއްޖޭގެ މުހިއްމު ވަސީލަތްތަައް ކަމުގައިވާ ފަރުތަކާއި، ކުޅިފާޗަސްބިންތަކާއި މޫދުވިނައިގެ މާހައުލީ ނިޒާމުތަކުގެ މަގުކުރެވި އެތަންތަނުގެ އަގު ވަޒަންކުރެވިފައި ނެތްކަން މިނިސްޓަރު ފާހަގަކުރެއްވި އެވެ.
އެންދެރި މަޝްރޫއުގެ ދަށުން ހައްދުންމަތީގެ ގުދުރަތީ ވަސީލަތްތައް އަގުމަގުކުރުމުގެ މަސައްކަތްކުރަނީ އޮސްޓްރޭލިއާގެ ޔުނިވާސިޓީ އޮފް ނިއު ސައުތް ވޭލްސްއިންނެވެ. މި މަޝްރޫއުގެ ދަށުން ހައްދުންމަތީގައި ހުރި މުރަކަ ފަރުތަކާއި، މޫދު ވިނައާއި، ކުޅިފާޗަސްބިންތައް ހުރި މިންވަރާއި، އެތަންތަނުގެ ފެންވަރު ދެނެގަތުމަށް މި އަހަރު ތެރޭ ދިރާސާތަކެއް ހެދި އެވެ.
އަދި އެ ދިރާސާތަކުގެ ހޯދުނު ކަންކަން އާންމުކޮށް، އެކަންކަމާ ގުޅިގެން ދައުލަތުގެ އިދާރާތަކަށާއި މުއައްސަސާތަކަށް ފޯރުކޮށްދޭންޖެހޭ ތަމްރީނުތައް ފޯރުކޮށްދިނުމަށްޓަކއި ޔޫއެންއެސްޑަބްލިއުގެ ޓީމެއް އަންނަ ނޮވެންބަރު މަހު ރާއްޖެއަށް އައުމަށް ހަމަޖެހިފައިވާކަމަށް އެންވަޔަރަމެންޓު މިނިސްޓްރީން ބުނެ އެވެ.
ކޮމެންޓް
Republic of Maldives