ފާޑުކީ އެއްބަސްވުންތަކުގެ އަކުރަކަށް ފިއްޔަކަށް ބަދަލެއް ނުގެނޭ: ސޯލިހު

އިދިކޮޅުގައި ތިބިއިރު ޕީޕީއެމް/ޕީއެންސީ ކޯލިޝަނުން ފާޑުކީ އެއްވެސް އެއްބަސްވުމަކަށް މި ސަރުކާރުން އެއްވެސް ބަދަލެއް ގެނެސްފައިނުވާކަން ފާހަގަކުރައްވައި، މިހާރު ވެރިކަމުގައި ތިއްބެވި ބޭފުޅުން ވެރިކަމަށް ވަޑައިގަތީ ދޮގުވެރި ހީލަތްތެރި މަކަރުވެރި ރޭވުންތަަކެއްގެ ތެރެއިންކަމަށް ކުރީގެ ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ. 

އެމްޑީޕީން ކުޅުދުއްފުށީގައި މިއަދު ބޭއްވި "ލާމަރުކަޒީ ގުޅުން" މަހާސިންތާގައި ދެއްކެވި ވާހަކަފުޅުގައި ރައީސް ސޯލިހުވަނީ މި ސަރުކާރަށް ވަރަށް ބޮޑަށް ފާޑުވިދާޅުވެ ވެރިކަމަށް އައުމަށް މި ސަރުކާރުގެ ވެރިން ދެއްކެވި ވާހަކަފުޅުތަކަށް އަލިއަޅުއްވައިލައްވައި އެ ވާހަކަފުޅުތަކާމެދު ފުންކޮށް ވިސްނުމަށް އެދިވަޑައިގެންފަ އެވެ. 

އެގޮތުން ރައީސް ސޯލިހުވަނީ ކުރިން އިދިކޮޅުގައި ތިއްބަވައިގެން މިހާރު ވެރިކަމުގައި ތިއްބެވި ބޭފުޅުން ދެއްކެވި ބައެއް ވާހަކަފުޅުތަކަށް އަލިއަޅުއްވާލައްވާފަަ އެވެ. އަދި އެވާހަކަފުޅުތަކަކީ ދޮގުކަން މިހާރު ރައްޔިތުންނަށް ސާފުކޮށް ހާމަވަމުންދާކަމަށް އެމަނިކުފާނު ވިދާޅުވި އެވެ. 

"ދޮގު ހެދިކަން މިއަންނަނީ ހާމަވަމުން. އެބޭފުޅުން ވެރިކަމަށް ވަޑައިގަތީ ދޮގުވެރި މަކަރުވެރި ހީލަތްތެރި ރޭވުންތަކުން. އެބޭފުޅުން ވެރިކަމަށް އަންނަންވީ ވައުދުތަކަކީ ހިސާބު ކިތާބެއްގެ މައްޗަށް ބެލުމެއްތި ހެދި ވައުދުތަކެއްކަން މިދަނީ ހާމަވަމުން،" ސޯލިހު ވިދާޅުވި އެވެ. 

އިތުރަށް އެމަނިކުފާނު ވިދާޅުވީ އިންތިހާބު ކާމިޔާބުކުރުމަށްޓަކައި އަވައްޓެރި ގައުމުތަކާއި އެ ގައުމުތަކުގެ ވެރިންނާމެދު މިއަދުގެ ސަރުކާރުގައި ތިއްބެވި ބޭފުޅުން ނުދައްކަވާ ހަޑިމުޑުދާރު އެއްވެސް ވާހަކައެއް ނެތް ކަމަށެވެ. އަދި އެކަމުގެ ސަބަބުން ރާއްޖެއަށް ލިބުނު ގެއްލުން ގުނައި އަދަދުނުކުރެވޭކަން ފާހަގަކުރައްވަމުން ރައީސް ސޯލިހު ވިދާޅުވެފައިވަނީ ރާއްޖެއަށް އެންމެ ގިނައިން ފަތުރުވެރިން އައި ގައުމުން އައި މީހުންގެ އަދަދު 40 އިންސައްތަ މަދުވެއްޖެ ކަމަށެވެ. އަދި ދައުލަތަށް ލިބެން އޮތް އާމްދަނީގެ ތެރެއިން 3.2 ބިލިއަން ރުފިޔާ ނުލިބުނު ކަމަށްވެސް ކުރީގެ ރައީސް ވިދާޅުވި އެވެ. 

އިތުރަށް އެއިރު އެމްޑީޕީއާއި އެއިރުގެ ސަރުކާރުގެ ވެރިންނާ ދެކޮޅަށް ދައްކަމުންއައި ބައެއް ވާހަކަތަކަށް އިޝާރަތްކުރައްވައި ރައީސް ސޯލިހު ވިދާޅުވީ އެއިރު ގައުމަށް ޣައްދާރުވެ މިނިވަންކަމާއި އިސްތިގުލާލު ގެއްލުވާލައި، ދީން ނައްތައިލަން އުޅޭކަމަށް ތުހުމަތުކުރި ނަމަވެސް އެއީ މުޅިން ދޮގުކަން މިއަދު ސާބިތުވަމުންދާ ކަމަށެވެ. 

އެގޮތުން ހދ.ހަނިމާދޫ އެއާޕޯޓު ތަރައްގީކުރަން ހެދި އެއްބަސްވުމުގެ ދަށުން އެތަނުގައި އިންޑިޔާ ސިފައިން ތިބިކަމަށާއި އެތަނުގައި އިންޑިޔާ މީހުން އާބާދުކުރަން އުޅޭކަމަށް ވިދާޅުވުމަށްފަހު މިހާރު އެ ބޭފުޅުން ވަޑައިގަންނަވަނީ އެތަނުގައި ތަރައްގީކުރި ރަންވޭއާ ހަވާލުވާން ކަމުގައި ސޯލހު ވިދާޅުވި އެވެ. 

އޭގެ އިތުރަށް ދިވެހި ސިފައިންގެ ބޭނުމަށް އުތުރުތިލަފަޅުގައި ހާބަރެއް ތަރައްގީކުރަން ފެށުމުން އެތަނުގައި އިންޑިޔާ ސިފައިން ތިބިކަމަށް ބުނި ނަމަވެސް މިއަދު އެތަނުގެ މަސައްކަތް އެއިރު ހަދާފައި އޮތް އެއްބަސްވުމުގެ އަކުރަކަށް ފިއްޔަކަށް ބަދަލެއް ނުގެނެސް ކުރިއަށް އެބަގެންދާކަމަށް ރައީސް ސޯލިހު ވިދާޅުވި އެވެ. 

"ރޯހިތު ހޯދަން އެރި މީހުން ތިބި ގޮތް ތިބޭފުޅުން ދެކެވަޑައިގަންނަވާނެ. އައިސިސްގެ ހަނގުރާމަވެރިންނަށްވުރެ ވަރުގަދަކޮށް ތިބީ. މިއަދު އެ އެގްރީމެންޓު އޮތް ގޮތަށް އެއްވެސް ބަދަލެއް ނުގެނެސް އެގެންދަނީ ކުރިއަށް. ކޮބައިތޯ އެ އޮޅުވައިލުން؟،" ސޯލިހު ސުވާލުކުރެއްވި އެވެ. 

އެ ހުރިހާ ވާހަކައެއް ވިދާޅުވުމަށްފަހު ރައީސް ސޯލިހު ވިދާޅުވީ މިއަދުގެ ސަރުކާރަށް ވޯޓުދިން ރައްޔިތުންނަށްވެސް ސާފުވާ ކަމަށެވެ. އަދި މިއަދު ސަރުކާރު އޮތީ "އުޑަށް ކުޅުޖެހީމާ" ވާނެ ގޮތްވެފައި ކަމަށްވެސް ސޯލިހު ވިދާޅުވި އެވެ.