ޑޮލަރުގެ ކަޅު ބާޒާރަށް ލޮޅުން | ބޭރު ފައިސާގެ ވިޔަފާރިކުރުމުގެ ހުއްދަ ދޭ އުސޫލު ހަރުކަށިކޮށްފި

ބޭރު ފައިސާ ގަނެ ވިއްކުމަށް އެމްއެމްއޭއިން ލައިސެންސް ދޫކުރަމުން އއި އުސޫލަށް ބޮޑެތި ބަދަލުތަކެއް ގެނެސް ހުއްދަ ދޫކުރާ އުސޫލު ހަރުކަށިކޮށްފި އެވެ. 

1987 ވަނަަ އަހަރުން ފެށިގެން އަމަލުކުރަމުން އައި "މަނީ ޗޭންޖަރ ކަމުގެ ލައިސަންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންތައް ކުރަންވީ ގަވާއިދު" އުވައިލުމަށްފަހު މިއަދު މަރުކަޒީ ބޭންކުން އަމަލުކުރަން ފެށި "މަނީ ޗޭންޖިން ވިޔަފާރިއާ ބެހޭ ގަވާއިދު"ގެ ދަށުން ދެ ބާވަތެއްގެ މަނީ ޗޭންޖިން ލައިސެންސް ދޫކުރާނެ އެވެ. އެއީ: 

ފުރަތަމަ ބާވަތުގެ ލައިސެންސް ދޫކުރާނީ ކުންފުނީގެ ގާނޫނުގެ ދަށުން ހަމައެކަނި ފައިސާ ގަތުމާއި ވިއްކުމަށް ރަޖިސްޓަރީކޮށްފައިވާ ކުންފުނިތަކަށެވެ. އަދި އެ ކުންފުނިތަކުގެ ހަގީގީ ވެރިންނަށް ވާންޖެހޭނީ ދިވެހިންނެވެ. މާނައަކީ އެއިން ކުންފުންޏެއްގައި އެހެން ވިޔަފާރިއެއްގެ ހިއްސާ އޮތަސް އެ ވިޔަފާރީގެ މިލްކުވެރިންނަކީވެސް ދިވެހިންކަމަށްވާން ޖެހޭނެ އެވެ. އަދި އެ ވިޔަފާރީގައި ހަރަކާތްތެރިވާ މުވައްޒަފުންވެސް ދިވެހިންނަށްވާންޖެހޭނެ އެވެ. 

ފަސް އަހަރުގެ މުއްދަތަށް އެފަދަ ވިޔަފާރިތަކަށް ދޫކުރާ ލައިސެންސް ހޯދުމަށް ހުށަހަޅާއިރު އެޕްލިކޭޝަން ފީއެއްގެ ގޮތުގައި 20،000 ރުފިޔާ އަދި ލައިސަންސް ފީއެއްގެ ގޮތުގައި އަހަރަކު 24،000 ރުފިޔާ ދައްކަންޖެހޭނެ އެވެ. ޑިޕޮސިޓުގެ ގޮތުގައި 50،000 އެމެރިކާ ޑޮލަރު ބަހައްޓަންޖެހޭނެ އެވެ. 

މި ކެޓަގަރީގެ ވިޔަފާރިތަކަށް އެއް ފަހަރާ ކަސްޓަމަރަކަށް ނަގުދު ފައިސާއން ގިނަވެގެން މުއާމަލާތްކުރެވޭނީ 50،000 ރުފިިޔާ ނުވަތަ އެއާ އެއްވަރުގެ އަދަދަކަށް ބޭރު ފައިސާއިންކަމަށް ގަވާއިދުގައި ބަޔާންކޮށްފައިވެ އެވެ. އަދި އެ ފަރާތުން ކުރާ ބޭރު ފައިސާ ގަނެ ވިއްކުމުގެ ހުރިހާ މުއާމަލާތްތަކެއް މޮނީޓާ ކުރެވޭނެ އިލެކްޓްރޯނިކް ނިޒާމެއް ގާއިމުކުރަންޖެހޭނެ އެވެ. 

ބޭރު ފައިސާ ވިއްކަން އެކަނި ހުއްދަ ދޭނީ ޓޫރިޒަމް ރިސޯޓު ހިންގުމުގެ ހުއްދަ އޮންނަ ކުންފުނިތަކަށް އެކަންޏެވެ. އެ ދަރަޖައިގެ ހުއްދައަށް އެދޭއިރު ފީގެ ގޮތުގައި 1،300 ޑޮލަރު އަދި ލައިސެންސްގެ އަހަރީ ފީގެ ގޮތުގައި މަހަކު 1،800 ޑޮލަރު ދައްކަންޖެހޭނެ އެވެ. 

އެ ކުންފުނިތަކަށް ބޭރު ފައިސާ ވިއްކުމުގެ ވިޔަފާރިކުރެވޭނީ ބޭންކެއް މެދުވެރިކޮށް ކަމށާއި، އަދި އެއްވަނަ ދަރަޖައިގެ ހުއްދަ އޮތް ވިޔަފާރިއަކާއެކު ނަގުދު ފައިސާއިން މުއާމަލާތް ކުރެވިދާނެ ކަމށްވެސް ގަވާއިދުގައި ބުނެފައިވެ އެވެ. މި ކުންފުނިތަކުންވެސް ލައިސެންސް ހޯދުމަށް ހުށަހަޅާއިރު 50،000 ޑޮލަރުގެ ޑިޕޮސިޓެއް ބަހައްޓަންޖެހޭނެ އެވެ. 

ކުރިން ބޭރު ފައިސާގެ މުއާމަލާތް ކުރުމުގެ ހުއްދަ ދީފައިވާ ވިޔަފާރިތަކަށް، އައު އުސޫލުން ލައިސެންސް ހޯދަން ހުށަހަޅަން ދެ މަސް ދުވަސް ލިބޭނެ އެވެ. އެ މުހުލަތުގައި ލައިސެންސް އާކުރަން ހުށަނާޅައިފިނަމަ ލައިސެންސް ބާތިލުވާނެ އެވެ. ނަމަވެސް ލައިސެންސް ހޯދުމަށް އެ މުހުލަތުގައި ހުށަހަޅާ ވިޔަފާރިތަކަށް ލައިސެންސްއާމެދު އެމްއެމްއޭއިން ގޮތެއް ނިންމުމާ ހަމައަށް ވިޔަފާރި ކުރެވޭނެ އެވެ. 

އެމްއެމްއޭއިން މި ގެނައި ބަދަލާއެކު ރާއްޖޭގައި ބޭރު ފައިސާގެ މުއާމަލާތްކުރުމުގެ ހުއްދަ އޮންނަ ވިޔަފާރިތައް މަދުވާނެ ކަމަށް ބެލެވެ އެވެ. މިހާރު 210 ވިޔަފާރިއަކަށް އެމްއެމްއޭއިން އެ ހުއްދަ ދޫކޮށްފައިވެ އެވެ.