ޖަލަށް ޑްރަގް ވެއްދި ތިން އޮފިސަރުން އިއުތިރާފުގެ އެއްބަސްވުން ހަދައިފި

މާފުށީ ޖަލުގައި ތިބި ގައިދީންނަށް ފޯނާއި މަސްތުވާތަކެތި ހޯދައިދީ، ނަހަމަ ގޮތުގައި އެތައް ފައިސާއެއް ހޯދި މައްސަލާގައި ދައުވާ ކޮށްފައިވާ ފަސް އޮފިސަރުންގެ ތެރެއިން ތިން އޮފިސަރުން އިއުތިރާފުގެ އެއްބަސްވުން ހަދައިފި އެވެ.

މި މައްސަލައިގައި ޖުމްލަ 13 އޮފިސަރުން ހައްޔަރުކޮށްފައިވާއިރު މިހާތަނަށް ދައުވާ ކޮށްފައިވަނީ ފަސް އޮފިސަރުންނަށެވެ. އެއީ ރ. އުނގޫފާރު އައިވަރީހައުސް، ޖިނާހު އަބްދުއްރަހީމާއި ހދ. ނޭކުރެންދޫ ތަރާނާގެ، އަލީ ނާޒިމާއި ގއ. ވިލިނގިލި ކުއްޅަވައްގެ، މުހައްމަދު ފަތޫހު ފަތުހުﷲގެ އިތުރުން ކ. މާފުށި ބީޗްހައުސް، އަލީ ހިޝާމް އަދި ނ. ލަންދޫ ކާމިނީގެ، އަލީ އަސްފާގެވެ.

މި މީހުންގެ މައްޗަށް އުފުލާފައި ވަނީ ނުހައްގު މުއްސަނދިކަން ހޯދައި ލިބިގަތުމުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާ އެވެ. މީގެ ތެރެއިން ހިޝާމް އަދި ޖިނާހަށް މަނީ ލޯންޑަރިންގެ ދައުވާ ވެސް ވަނީ އުފުލާފަ އެވެ.

މި މައްސަލައިގެ ފުރަތަމަ އަޑުއެހުން މިއަދު ވަނީ ބާއްވާފަ އެވެ. މި އަޑުއެހުމުގައި މި ފަސް މީހުންގެ ތެރެއިން ނާޒިމް، ފަތޫހު އަދި އަލީ އަޝްފާގު އިއުތިރާފުގެ އެއްބަސްވުން ހަދާފައިވާ ކަމަށް ދައުލަތުން ވަނީ ބުނެފަ އެވެ. 

މި މައްސަލައާ ގުޅުންހުރި ލިޔެކިޔުންތައް ދައުވާ ލިބޭ ފަރާތްތަކަށް ލިބިފައި ނުވާތީ މިއަދު ދައުވާ އިއްވާފައެއް ނުވެ އެވެ. އެބައި ކުރިއަށް ގެންދާނީ ދެން އޮންނަ އަޑުއެހުމެއްގަ އެވެ.

އެކެއްގެ އެކައުންޓަށް މިދިޔަ އަހަރު 24 މިލިއަން ރުފިޔާ ވަނީ ޖަމާކޮށްފަ އެވެ. އަދި 18 މީހުންގެ އެކައުންޓަށް ޖުމްލަ 73 މިލިއަން ހަ ލައްކަ ރުފިޔާ ޖަމާވެފައިވެ އެވެ. މި އޮފިސަރުންގެ ތެރެއިން ހަ އޮފިސަރަކު މި އަހަރު ވަނީ ވަޒީފާ އިން ވަކިވެފަ އެވެ.

އެ މައްސަލާގައި 13 އޮފިސަރަކު ވަނީ ހައްޔަރުކޮށްފަ އެވެ. އޭގެ ތެރެއިން 11 މީހަކު، ޝަރީއަތް ނިމެންދެން ވަނީ ބަންދު ކޮށްފަ އެވެ. ފުލުހުން ވަނީ އެ މީހުންގެ ފޮޓޯއާ ވަނަވަރު އާންމުކޮށްފަ އެވެ.