ރައީސްގެ ދަތުރުފުޅު ނިންމަވައިލެއްވުމަށްފަހު ރާއްޖެއަށް ވަޑައިގެންފި
އެމެރިކާއަށް ކުރެއްވި ދަތުރުފުޅުގައި އދގެ އާންމު މަޖިލީހުގެ ބައްދަލުވުމުގައި ތަގުރީރުކުރެއްވުމުގެ އިތުރަށް އދ.ގެ އެންމެ ބާރުގަދަ ގުނަވަަންކަމަށްވާ ސަލާމަތީ މަޖިލީހުގެ ބައްދަލުވުމުގައިވެސް އެމަނިކުފާނު ތަގުރީރު ކުރެއްވި އެވެ.
އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް އެމެރިކާއަށް ކުރެއްވި ދަތުރުފުޅު ނިންމަވައިލެއްވުމަށްފަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ރާއްޖެއަށް ވަޑައިގެންފި އެވެ.
އެމެރިކާއަށް ކުރެއްވި ދަތުރުފުޅުގައި އދގެ އާންމު މަޖިލީހުގެ ބައްދަލުވުމުގައި ތަގުރީރުކުރެއްވުމުގެ އިތުރަށް އދ.ގެ އެންމެ ބާރުގަދަ ގުނަވަަންކަމަށްވާ ސަލާމަތީ މަޖިލީހުގެ ބައްދަލުވުމުގައިވެސް އެމަނިކުފާނު ތަގުރީރު ކުރެއްވި އެވެ. އެއީ ދިވެހި ރައީސަކު އދގެ ސަލާމަތީ މަޖިލީހުގައި ދެއްވި ފުރަތަމަ ތަގުރީރެވެ.
އާންމު މަޖިލީހުގެ ހަވާސާގައި ކުރިއަށްގެންދިޔަ ބައެއް ހަރަކާތްތަކުގެ ކޯ-ޗެއާގެ ހައިސިއްޔަތުން ރިޔާސަތު ބަލަހައްޓަވައި ކުދި ޖަޒީރާ ގައުމުތަކަށް ކުރިމަތިވެފައިވާ ގޮންޖެހުންތަކާ ގުޅޭ ގޮތުން ރައީސްވަނީ ތަގުރީރު ކުރައްވާފަ އެވެ.
އަދި މި ދަތުރުފުޅުގައި އެމެރިކާގެ ނިއުޔޯކާއި އެ ސަރަހައްދުގެ ކައިރީގައި ދިރިއުޅޭ ދިވެހިންނާ ބައްދަލުކުރައްވައި އެމީހުންގެ ހާލުއަހުވާލު ރައީސް ބައްލަވާފައިވެ އެވެ.
އެމެރިކާގެ އެންމެ މަޝްހޫރު އެއް ޔުނިވަސިޓީކަމަށްވާ ޕްރިންސްޓަން ޔުނިވަސިޓީގެ ސްކޫލް އޮފް ޕަބްލިކް އެންޑް އިންޓަނޭޝަނަލް އެފެއާޒްގައި ރައީސް ތަގުރީރު ކުރައްވާފައިވެ އެވެ. އަދި ނިއުޔޯކުގައި ހުންނަ ގޫގުލްގެ އޮފީހަށް ޒިޔާރަތްކުރައްވައި އެ ކުންފުނީގެ އޮފިޝަލުންނާވެސް ރައީސް ބައްދަލުކުރެއްވި އެވެ.
މި ދަތުރުފުޅުގައި ފޮރިން މިނިސްޓަރު މޫސާ ޒަމީރާއި، އެންވަޔަރަމެންޓު މިނިސްޓަރު ތޯރިގު އިބްރާހީމް ހިމެނިވަޑައިގަންނަވާ މަތީ ފަންތީގެ ވަފުދެއް ރައީސްގެ އަރިހުގައި ބައިވެރިވެވަޑައިގެންފައިވެ އެވެ.
ކޮމެންޓް
Republic of Maldives