އިންޑިޔާ ކަނޑުގައި ބައިނަލްއަގުވާމީ ނިޒާމު ނަގަހައްޓަން އެމެރިކާ ރާއްޖެ ގުޅުން މުހިއްމު: ރައީސް

އުސޫލުތަކާއި ގަވާއިދުތަކުގެ މައްޗަށް ބިނާވެފައިވާ ބައިނަލްއަގުވާމީ ނިޒާމު ނެގެހެއްޓުމަށް އެމެރިކާއާއި ރާއްޖޭގެ ގުޅުމަކީ މުހިއްމު ގުޅުމެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

އެމެރިކާގެ ޕްރިންސްޓަން ޔުނިވާސިޓީގައި ރޭ ދެއްވި ތަގުރީރުގައި ރައީސްވަނީ އެމެރިކާއާއި ރާއްޖޭގެ ގުޅުމަށް އަލިއަޅުވައިލައްވާފަ އެވެ. އެގޮތުން ރާއްޖެއަށް މިނިވަންކަން ލިބުނުތާ 56 ދުވަސް ފަހުން ރާއްޖެ އދއާ ގުޅުނުކަމަށާއި، 1965 ވަނަ އަަހަރުގެ އޮކްޓޯބަރުގައި އެމެރިކާގެ އެއިރުގެ ރައީސް ލިންޑަން ޖޯންސަން ރާއްޖެއަށް އެމެރިކާގެ ސަފީރެއް ކަނޑައެޅުއްވިކަމަށް ރައީސް ވިދާޅުވި އެވެ. 

ރައީސް ފާހަގަކުރެއްވީ ރާއްޖެއަށް މިނިވަންކަން ލިބުނުތާ އެހައި ކުރީ ކޮޅުގައި އެމެރިކާއިން ރާއްޖެއަށް ސަފީރަކު ކަނޑައެޅުމަކީ ދިވެހިރާއްޖެއަށް ވަރަށް މުހިއްމު ފިޔަވަޅެއް ކަމުގަ އެވެ. 

"އުސޫލުތަކުގެ މައްޗަށް ބިނާވެފައިވާ ބައިނަލްއަގުވާމީ ނިޒާމު އިންޑިޔާ ކަނޑުގައި ދެމެހެއްޓުމަށް، އެމެރިކާއާއި ދިވެހިރާއްޖޭގެ މެދުގައި އޮތް ގުޅުން ވަރަށް މުހިއްމު،" ރައީސް އިތުރަށް ވިދާޅުވި އެވެ. 

ދުނިޔޭގެ އެންމެ ކުޑަ ގައުމުތަކުގެ ތެރޭގައި ހިމެނޭ ގައުމަކާއި، ދުނިޔޭގެ އެންމެ ބޮޑު ބާރަކާ ދެމެދު ގުޅުން އޮތުމުގެ މުހިއްމުކަމާމެދު ބަޔަކު ސުވާލު އުފައްދަފާނެކަން ފާހަގަކުރައްވައި ރައީސް ވިދާޅުވެދެއްވީ ރާއްޖޭގެ އިސްތިރާޖީ މުހިއްމު ކަމެވެ. 

އެގޮތުން ބައިނަަލްއަގުވާމީ ބަލްކް ކާގޯ ދަތުރުތަކުގެ ތިން ބައިކުޅަ އެއްބައި ދަތުރުކުރަނީ އިންޑިޔާ ކަނޑުންކަމާއި، އޭޝިޔާއާއި ޔޫރަޕުގެ މެދުގައި ކުރެވޭ ވިޔަފާރީގެ 75 އިންސައްތަ ދަތުރުކުރަނީ އެ ކަނޑުންކަމަށާއި، ދުނިޔޭގައި ދުވާލަކު ބޭނުންކުރާ ތަލުގެ 50 އިންސައްތަ އިންޑިޔާ ކަނޑު ހުރަސްކުރާކަން ރައީސް ފާހަގަކުރެއްވި އެވެ. 

އެމަނިކުފާނު އިތުރަށް ވިދާޅުވީ އިންޑިޔާ ކަނޑުގެ މެދުގައި 90،000 އަކަކިލޯމީޓަރުގެ ސަރަހައްދަކަށް ފެތުރިފައިވާ ރާއްޖެ އޮންނައިރު، އެންމެ ގިނައިން އިންޑިޔާ ކަނޑުން ދަތުރުކުރާ މަގުތައް އޮންނަނީ ރާއްޖެ އެތެރެއިން ނުވަތަ ރާއްޖޭގެ މަތިން ކަމުގަ އެވެ. 

"އިންޑިޔާ ކަނޑުގައި ބާރުގެ ތިލަފަތްހަމަކަމާމެދު ބަހެއް ބުނަން ނުވަތަަ ނުފޫޒެއް އޮތުމަށް އެދޭ ކޮންމެ ބަޔަކަށްވެސް ރާއްޖެއަކީ ނުފޫޒު ފޯރުވަން ވަރަށް ޝައުގުވެރި ތަނެއް،" ރައީސް މުއިއްޒު ވިދާޅުވި އެވެ.

ރާއްޖޭގެ ސިޔާާދަތު އިތުރަށް ވަރުގަދަކޮށް ނެގެހެއްޓެވުމަށް ނިމުނު އަހަރުގެ ރިޔާސީ އިންތިހާބުގައި ވައުދުވެވަޑައިގަތީ ރާއްޖޭގެ އިސްތިރާޖީ މުހިއްމުކަން ވަރަށް ރަނގަޅަށް އެނގިވަޑައިގަންނަވާތީކަމަށް ރައީސް ވިދާޅުވި އެވެ. 

އިތުރަށް އެމަނިކުފާނު ވިދާޅުވީ ސިޔާދަތަށް އިހުތިރާމުކުރުމާއި، ދައުލަތްތަކުގެ މެދުގައި ސިޔާދަތީ ހަމަހަމަކަން އޮތުމަކީ ބައިނަލްއަގުވާމީ ނިޒާމު އެ މައްޗަށް ބިނާވާ އަސާސީ އަސްލުތައް ކަމަށާއި، އެއީ ގިނަ ދައުލަތްތައް ޝާމިލުވާ ނިޒާމު އޭގެ މަތީގައި ހިނގަމުންދާ އުސޫލުތައް ކަމަަށެވެ. 

އަދި ކުދި ޖަޒީރާ ގައުމުތަކުގައި ދިރުންހުރެ ތަނަވަސްވުމަކި މުޅި ދުނިޔެއަށް ނުހަނު ބޭނުންތެރި ކަމެއްގެ ގޮތުގއި ފާހަގަކުރައްވަމުން ރައީސް ވިދާޅުވީ އެ ގައުމުތަކުން ތަބީއީ ދުނިޔެއާއި ތިމާވެށީގެ ދިރުންތަކުގެ ނިޒާމުތަކާއެކު މަސައްކަތްކުރާ ގޮތް މުޅި ދުނިޔެއަށްވެސް މުހިއްމު ކަމަށެވެ.