ޔާމީން ރަޝީދުގެ ކާޓޫނަކާއެކު މަގުތަކުގެ އަމާންކަމާ ގުޅޭ ގޮތުން ރައީސްގެ ވަރުގަދަ މެސެޖެއް

ދިވެހިރާއްޖޭގެ މަޝްހޫރު އެނިމޭޓަރު ޔާމީން ރަޝީދު ތައްޔާރުކޮށްފައިވާ ކުރު ކާޓޫނު ވީޑިއޯއެއް ހިއްސާކުރެއްވުމާއެކު މަގުތަކުގެ އަމާންކަމާއި ރައްކާތެރިކަން ކަށަވަރުކުރުމާ ގުޅޭ ގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު މުހިއްމު އިލްތިމާސެއް ރައްޔިތުންނަށް ރައްދު ކުރައްވައިފި އެވެ. 

އެކްސްގައި ރައީސް ޝާއިއުކުރެއްވި ޕޯސްޓުގެ ވީޑިޔޯގައި ފެންނަނީ ބައްޕަޔަކު އޭނާގެ ހަމައެކަނި ދަރިފުޅަށް ހަދިޔާއަކަށް ދިނުމަށް އަތުކުރީ ގަނޑިއެއް ހިފައިގެން ސައިކަލުގައި ދަނިކޮށް ބާރަށް ދުއްވާފައި އައި ކާރެއް ސައިކަލާ ފައްތަރުވާ ތަނެވެ. 

ކާރު ދުއްވައިން އިން މީހާ ކާރުން ނުކުމެގެން އައިސް ސައިކަލުން ވެއްޓިފައި އޮތް މީހާ ފުރޮޅާލައި ކާކުތޯ ބަލައިލުމުން އޭނާއަށް މަރުވެފައި އޮއްވައި ފެންނަނީ އޭނާގެ ބައްޕައެވެ. އެހިސާބުން ބައްޕަގެ ކިނބައިން މައާފަށް އެދި އޭނާ ރޮއެވެ. 

"Life is Precious, Drive Safely!"
Let us all put a concerted effort to make our roads safe for us! We may not get a second chance to make right what we do wrong with our own hands!

Thank you, Yamin Rasheed & cellmin Animation Studio, for this creation. pic.twitter.com/az1ILez6XH

— Dr Mohamed Muizzu (@MMuizzu) September 18, 2024

މި ކާޓޫނު ހިއްސާކުރައްވަމުން ރައީސް ލިޔުއްވާފައިވަނީ "ފުރާނައަކީ އަގުހުރި އެއްޗެއް، ރައްކާތެރިކޮށް ދުއްވާ،" އެ މެސެޖެވެ. އެއާއެކު އެންމެންގެ ކިބައިން އެމަަނިކުފާނު އެދިވަޑައިގަތީ އެންމެން ގުޅިގެން މަގުތަކަކީ އެންމެންނަށް ރައްކާތެރި ތަންތަން ކަމުގައި ހެދުމަށެވެ. 

އިތުރަށް ރައީސް ވިދާޅުވެފައިވަނީ އަމިއްލަ އަތްތަކުން ކުރާ ނުރަނގަޅު ކަންތައް، އަލުން ރަނގަޅުކުރަން ފުރުސަތެއް ނުލިބިދާނެ ކަމަށެވެ. 

ރައީސްވަނީ އެ ކާޓޫނު ތައްޔާރުކުރި ޔާމީން ރަޝީދަށާއި އޭނާގެ ސެލްމިން އެނިމޭޝަން ސްޓޫޑިއޯއަށް ހޭލުންތެރިކަން އިތުރުކުރުމަށް އެފަދަ މަސައްކަތެއް ކުރީތީ ޝުކުރު އަދާކުރައްވާފަ އެވެ. 

ޔާމީން ރަޝީދަކީ ގިނަ ބައެއްގެ މަގުބޫލުކަމާއި ސަމާލުކަން ހޯދި ދިވެހި އެނިމޭޓެޑް ސީރީސް ދޫނި ރާއްޖެ ސީރީސް އެކުލަވައިލައްވައި އުފެއްދެވި ބޭފުޅާ އެވެ. އޭނާއަކީ ރާއްޖޭގައި މިހާރު ހުންނެވި އެންމެ މަގުބޫލު އެނިމޭޓަރެވެ.