ހުޅުމާލޭ ފުލުހުންގެ ވެރިޔާ ދާއޫދު އެސިސްޓެންޓް ކޮމިޝަަނާގެ މަގާމަށް ޕްރޮމޯޓުކޮށްފި

ހުޅުމާލޭ ފުލުހުން ސްޓޭޝަނުގެ ވެރިޔާގެ މަގާމުގައި ހުންނެވި ސްޕްރިންޑެންޓް އޮފް ޕޮލިސް މުހައްމަދު ދާއޫދު އެސިސްޓެންޓު ކޮމިޝަނާ އޮފް ޕޮލިސްގެ ރޭންކަށް ޕްރޮމޯޓުކޮށްފި އެވެ. 

ދާއޫދު އެ މަގާމަށް ޕްރޮމޯޓުކުރައްވައި އޭނާއާ މަގާމު ހަވާލުކުރެއްވީ ދާހިލީ ސަލާމަތާއި ފަންނިއްޔާތާ ބެހޭ ވަޒީރު ކެޕްޓަން ރިޓަޔާޑް އަލީ އިހުސާނެވެ. 

ދާއޫދަކީ ފުލުހުންގެ އެކި ޑިޕާޓުމެންޓުގެ އެންމެ މަތީ ފަންތީގެ މަގާމުތައް އަދާކުރައްވާފައިވާ ފުލުހުންގެ ހިދުމަތުގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ އެ ދާއިރާގެ ތަޖުރިބާކާރު ބޭފުޅެކެވެ. 

އެގޮތުން އޭނާއަކީ ރޯޑް ޕޮލިސްގެ އެންމެ އިސްވެރިޔާގެ މަގާމާއި، ޑިޓެކްޓިވް އިންވެސްޓިގޭޝަން އޮފިސަރުގެ މަގާމާއި، ޑްރަގް އެންފޯސްމެންޓު ޑިޕާޓުމެންޓުގެ ޑެޕިއުޓީ ހެޑުގެ މަގާމު އަދާކުރައްވާފއިވާ ބޭފުޅެކެވެ. 

ދާއޫދަކީ ސުލޫކީ މައްސަލަތަކެއް ހުރިކަމަށް ބުނެ ފުލުހުންގެ މަގާމުން ވަކިކުރުމަށް ޕޮލިސް ބޯޑުން ނިންމި ބޭފުޅެކެވެ. ނަމަވެސް އޭނާއާއެކު އެ މަގާމުން ވަކިކުރުމަށް ނިންމި ބޭފުޅުން ބޯޑުގެ ނިންމުން ކޯޓަށް ހުށަހެޅުމުން ކޯޓުންވަނީ އެ ބޭފުޅުން ވަކިކުރުން ހުއްޓުވާފަ އެވެ. 

އެސިސްޓެންޓު ކޮމިޝަނާ އޮފް ޕޮލިސްއަކީ ފުލުހުންގެ މުއައްސަސާގެ ތެރެއިން އިދާރީ ގޮތުން ޕްރޮމޯޝަން ދެވޭ އެންމެ މަތީ ރޭންކެވެ. އޭގެ މަތީ ދެ ރޭންކުކަމަށްވާ ކޮމިޝަނާ އޮފް ޕޮލިސް އަދި ޑެޕިއުޓީ ކޮމިޝަނާ އޮފް ޕޮލިސް ރޭންކަށް ބޭފުޅުން އައްޔަންކުރައްވަނީ ރައީސުލްޖުމްހޫރިއްޔާ އެވެ.