ޖުލައި މަހުގެ ފަތުރުވެރިކަން | ފަތުރުވެރިންވީ ގިނަ، ބެޑްނައިޓުވެސް މައްޗަށް

ޖުލައި މަހު ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބި، ފަތުރުވެރިން އައި އަދަދާއި ރާއްޖޭގައި ފަތުރުވެރިން ހޭދަކުރި މުއްދަތުވެސް ނިމުނު އަހަރަށްވުރެ އިތުރުވެއްޖެ އެވެ. 

މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން މަހަކު އެއްފަހަރު އާންމުކުރާ އިގުތިސާދީ އަދާހަމަ ރިޕޯޓުގައި ބަޔާންކޮށްފއިވާ ގޮތުން ޖުލައި މަހުގައި އެކަނި 167،528 ފަތުރުވެރިން ރާއްޖެއަށް ޒިޔާރަތްކުރި އެވެ. އެއީ 2023 ވަނަ އަހަރުގެ ޖުލައި މަހާ އަޅާބަލާއިރު 15 އިންސައްތަ އިތުރު އަދަދެކެވެ. 

ރާއްޖެއަށް އައި ފަތުރުވެރިންގެ އަދަދު އިތުރުވުމާއެކު ބެޑްނައިޓުވެސް ފާއިތުވި އަހަރުގެ ޖުލައި މަހާ އަޅާބަލާއިރު މި އަހަރު އިތުރުވެފައިވެ އެވެ. އެގޮތުން ރިސޯޓުތަކުގެ ބެޑްނައިޓު ނިމުނު އަހަރަށްވުރެ މި އަހަރުގެ ޖުލައި މަހު އިތުރުވުމުގެ ސަބަބުން ބެޑްނައިޓު 16 އިންސައްތައިން އިތުރުވެފައިވެ އެވެ. 

ޖުލައި މަހު ރިސޯޓުތަކުގެ ބެޑްނައިޓުވަނީ 2023 ގެ ޖުލައި މަހާ އަޅާބަލާއިރު 26 އިންސައްތަ އިތުރުވެފަ އެވެ. ނަމަވެސް ގެސްޓުހައުސްތަކުގެ ބެޑްނައިޓުގެ އަދަދުވަނީ 16 އިންސައްތަ ދަށްވެފަ އެވެ. 

އެ މަހު ފަތުރުވެރިން އައި މިންވަރު އިތުރުވީ ރާއްޖެއަށް ފަތުރުވެރިން އެންމެ ގިނަައިން އަންނަ ބާޒަރުތައް ކަމުގަައިވާ ޔޫރަޕާއި ޗައިނާ އަދި ރަޝިޔާއިން އައި ފަތުރުވެރިންގެ އަދަދު ވަރަށް ބޮޑަށް އިތުރުވުމާ ގުޅިގެންކަން އެމްއެމްއޭގެ ރިޕޯޓުގައި ފާހަގަކޮށްފައިވެ އެވެ. 

ޖުލައި މަހު އެންމެ ގިނައިން ރާއްޖެއަށް ފަތުރުވެރިން ޒިޔާރަތްކުރި ގައުމުތަކަކީ ޗައިނާއާއި، ރަޝިޔާއާއި، އިނގިރޭސިވިލާތާއި ޖަރުމަނާއި އިންޑިޔާ އެވެ. 

ފަތުރުވެރިކަމުގެ ސިނާއަތުގެ ބެޑް ކެޕޭސިޓީއާއި އޮކިއުޕަންސީ ރޭޓު ނުވަތަ ލިބެންހުރި އެނދުގެ ތެރެއިން ފަތުރުވެރިން ބޭނުންކުރި އެނދުގެ އަދަދުވެސް ނިމުނު އަހަރުގެ ޖުލައި މަހާ އަޅާބަލާއިރު އިތުރުވެފައިވެ އެވެ. 

މި އަހަރުގެ ޖަނަވަރީން ޖުލައިގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 10 އިންސައްތަ އިތުރުވިއިރު އެ ފަތުރުވެރިން ރާއްޖޭގައި ހޭދަކުރި ބެޑްނައިޓު 7 އިންސައްތަ އިތުރުވެފައިވެ އެވެ.