މަޖިލިސް މިއަދު | ހަތް ބިލެއް ފާސްކޮށްފި، މިރޭ ދައުރު ނިންމުމުގެ ޖަލްސާ

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ މުހިއްމު ހަތް ބިލެއް މިއަދު މަޖިލީހުން ފާސްކޮށް، މިރޭ ދައުރު ނިންމުމުގެ ޖަލްސާ ބާއްވާނެކަން މަޖިލީހުގެ ރިޔާސަތުން އިއުލާނުކޮށްފި އެވެ. 

މިއަދު އޮތް ޖަލްސާގައި ހަތް ބިލެއް ދިރާސާކުރުމަށްފަހު އެބިލުތައް ދިރާސާކުރި މަޖިލީހުގެ ކޮމިޓީތަކުން އެކުލަވައިލި ރިޕޯޓުތައް ތަޅުމަށް ހުށަހަޅާފައިވެ އެވެ. އަދި އެ ރިޕޯޓުުތައް ހުށަހެޅުމަށްފަހު މިއަދުގެ ޖަލްސާގައި އެ ބިލުތަކަށް ވޯޓަށް އަހާފައިވެ އެވެ. 

އިގުތިސާދީ ކަންކަމާ ގުޅޭ ބިލުތަކުގެ ތެރޭގަައި ފޮރިން އިންވެސްޓުމެންޓުގެ ބިލާއި، ވިޔަފާރި ރަޖިސްޓްރީކުރުމުގެ ގާނޫނަށް އިސްލާހު ގެނައުމުގެ ބިލުގެ އިތުރަށް ދިވެހިރާއްޖޭގެ މާލީ ސެކިއުރިޓީސްއާ ބެހޭ ގާނޫނު އިސްލާހު ކުރުމުގެ ބިލު ހިމެނެ އެވެ. މި ބިލުތަައް ދިރާސާކުރީ މަޖިލީހުގެ އިގުތިސާދީ ކޮމިޓީންނެވެ.

އޭގެ އިތުރަށް ސިއްހީ ހިދުމަތް ދިނުމުގެ ގާނޫނު އިސްލާހުކުރުމުގެ ބިލާއި ބިނާވެށި ޕްލޭންކުރުމާއި ހިންގުމުގެ ބިލާއި، ލާމަރުކަޒީ ގާނޫނަށް އިސްލާހު ގެނައުމުގެ ބިލާއި ގާނޫނީ ފަންނުގެ ގާނޫނަށް އިސްލާހު ގެނައުމުގެ ބިލު ދިރާސާ ކުރުމަށްފަހު އެ ބިލުތަކާ ގުޅޭ މަސައްކަތްކުރި ކޮމިޓީތަކުން އެކުލަވައިލި ރިޕޯޓުތައް މަޖިލީހުގެ ތަޅުމަށް ހުށަހަޅާނެ އެވެ.

މި ބިލުތަކުގެ ތެރެއިން ފޮރިން އިންވެސްޓުމެންޓު ބިލާއި ބިނާވެށި ޕްލޭންކުރުމުގެ ބިލަކީ ފާއިތުވި ދެތިން ހަފުތާ ތެރޭގައި މަޖިލީހަށް ހުށަހަޅާފައިވާ ބިލުތަކެވެ.

ސަރުކާރު ހިންގާ ޕީއެންސީގެ ބޮޑު އަޣުލަބިއްޔަތެއް އޮންނަ މަޖިލީހުން ބިލުތަކުގެ މަސައްކަތް ކުރަމުންދަނީ އެކަށީގެންވާ މިންވަރަށް ދިރާސާކުރާނެ ވަގުތު މެންބަރުންނަށް ނުދީކަމަށް އިދިކޮޅު އެމްޑީޕީގެ ޕާލިމަންޓަރީ ގުރޫޕުން ތުހުމަތުކޮށްފައިވެ އެވެ. 

މިއަދު ފާސްކުރި ހަތް ބިލުގެ ތެރެއިން ފަސް ބިލެއް ފާސްވެފައިވަނީ ވޯޓުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ. އިތުރު ދެ ބިލަކަށް ބައެއް މެންބަރުންވަނީ ފާސްކުރަން ފެނިވަޑައިނުގަންނަވާކަމަށް ވޯޓު ދެއްވާފަ އެވެ. 

މިއަދުގެ ޖަލްސާ ނިންމަވައިލައްވަމުން 20 ވަނަ މަޖިލީހުގެ ފުރަތަމަ ދައުރުގައި ކުރެވުނު މަސައްކަތްތަކުގެ ތަފުސީލު ޖަލްސާގެ ރިޔާސަތު ބެލެހެއްޓެވި މަޖިލީހުގެ ނައިބުރައީ އަހްމަދު ނާޒިމުވަނީ ވިދާޅުވެދެއްވާފަ އެވެ. 

އޭނާ ވިދާޅުވި ގޮތުގައި މި ދައުރުގައި މަޖިލީހަށް ހުށަހެޅުނީ 23 ބިލެކެވެ. އެއިން 12 ބިލެއް ކޮމިޓީ މަރުހަލާގައި މިހާރު އޮތްއިރު 11 ބިލެއްގެ މަސައްކަތް މަޖިލީހުން ނިންމާފައިވެ އެވެ. އަަދި 12 ސުވާލެއް ކުރަން ހުށަހެޅުނުއިރު އެ ހުރިހާ ސުވާލެއްވެސް ކުރެވި ޖަވާބު ދެވިފައިވާކަމަށް ނާޒިމު ވިދާޅުވި އެވެ.

ސަރުކާރުގެ ފަރާތުން ހުށަހެޅި ނުވަ މައްސަލައެއް އަދި މަޖިލީހުގެ ރިޔާސަތުގެ މޭޒުކޮޅުން ހުށަަހެޅި 13 މައްސަލައެއްގެ މަސައްކަތް ނިމިފައިވާއިރު، މަޖިލީހަށް ހުށަހެޅުނު މައްސަލަތަކުގެ ތެރެއިން 82.9 އިންސައްތަ މައްސަލައާ ގުޅޭ މަސައްކަތް މަޖިލީހުން ނިންމާފައިވެ އެވެ. 

ނާޒިމު ޖަލްސާ ނިންމަވައިލެއްވީ މަޖިލީހުގެ މި ދައުރުގެ ފަހު ޖަލްސާ މިރޭ އޮންނާނެކަން އިއުލާނުކުރައްވަމުންނެވެ. ބެލެވޭ ގޮތުގައި އެ ޖަލްސާގައި އޮންނާނީ ޕްރޮސެކިއުޓާ ޖެނެރަލްގެ މަގާމުގައި ހުންނެވި ހުސައިން ޝަމީމު އެ މަގާމުން ވަކިކުރުމެވެ.