ހެލްތު މިނިސްޓްރީގެ އޮޑިޓު؛ 2021 ގެ ނިޔަލަށް 94 މިލިއަން ރުފިޔާ ބިލުތަކަށް ނުދައްކާ

ހެލްތު މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުން ހޯދާފައިވާ ހިދުމަތްތަކާއި މުދަލަށް ދައްކަންޖެހޭ ފައިސާގެ ތެރެއިން 94 މިލިއަން ރުފިޔާ 2021 ވަނަ އަހަރުގެ ނިޔަލަށް ނުދައްކައި ހުރިކަން އޮޑިޓު އޮފީހުން ހާމަކޮށްފި އެވެ. 

އޮޑިޓާ ޖެނެރަލްގެ އޮފީހުން އާންމުކޮށްފައިވާ ހެލްތު މިނިސްޓްރީގެ 2021 ވަނަ އަހަރުގެ އޮޑިޓު ރިޕޯޓުގައި ބުނެފައިވަނީ މިނިސްޓްރީގެ މާލީ ބަޔާންތަކާއެކު އިތުރު މައުލޫމާތުގެ ގޮތުގައި އެ މިނިސްޓަރީން ހުށަހެޅި މާލީ ޒިންމާތަކާ ބެހޭ ބަޔާނުގައި އެ މިނިސްޓްރީން ހޯދާފައިވާ މުދަލާއި ހިދުމަތްތަކާ ގުޅޭ ބިލުތަކުގެ ގޮތުގައި 93،989،559 ނުވަދިހަ ތިން މިލިއަން ނުވަލައްކަ އަށްޑިހަ ނުވަހާސް ފަސްސަތޭކަ ފަންސާސް ނުވަ) ރުފިޔާ ހުރި ކަމަށް  ބަޔާންކޮށްފައިވާ ކަމަށެވެ. 

މާލީ ޒިންމާތަކާ ބެހޭ ބަޔާނުގައި އެ އަދަދަށްވާ ބިލަށް މިނިސްޓްރީން އެ އަހަރުގެ ނިޔަލަށް ފައިސާ ނުދައްކައި ހުރިކަމަށް ބުނެފައި އޮތް ނަމަވެސް އެ ބިލުތަކުގެ ތަފުސީލު ހޯދުމަށް އޮޑިޓާ ޖެނެރަލްގެ އޮފީހުން އެދުމުން ތަފުސީލުތައް ދީފައިނުވާކަމަށް އޮޑިޓު އޮފީހުން ބުނެފައިވެ އެވެ. 

އޮޑިޓު ރިޕޯޓުގައި ބަޔާންކުރި ގޮތުގައި މިނިސްޓްރީން ދައްކަންޖެހިފައި ހުރި ބިލުތަކުގެ ތަފުސީލު ހިއްސާކުރުމަށް އެދުމުން އެ ތަފުސީލުތައް ހިއްސާނުކުރުމުގެ ސަބަބުން، މާލީ ޒިންމާގެ ބަޔާނުގައި މިނިސްޓްރީން ބުނެފައިވާ ނުދައްކަައި ހުރި ފައިސާގެ ޖުމްލަ އަދަދުގެ ސައްހަކަން ކަށަވަރުނުވެ އެވެ. 

އޮޑިޓު އޮފީހުން އިތުރަށް ފާހަގަކުރި ގޮތުގައި ހެލްތު މިނިސްޓްރީގެ ހަރުމުދަލުގެ ރަޖިސްޓްރީގައި އެ މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުގައި ހުރި ހުރިހާ ހަރުމުދަލެއްގެ ތަފުސީލުތައް ހިމަނާފައިނުވެ އެވެ. 

ނަތީޖާއެއްގެ ގޮތުން އޮފީސް ހިންގުމަށް ބޭނުންވާ ހަރުމުދަލުގެ އަގަކީ 481.1 މިލިއަން ރުފިޔާކަމަށް މިނިސްޓްރީން ބަޔާންކުރި ނަމަވެސް އެ އަދަދަކީ ސައްހަ އަދަދެއްކަން ކަށަވަރުކުރެވޭނެ ގޮތެއް ނެތް ކަމަށެވެ. 

އިތުރަށް އޮޑިޓު އޮފީހުން ފާހަގަކުރި ގޮތުގައި މިނިސްޓްރީގެ ދަށުން ހިންގަމުންދާ އިދާރާތަކުގެ ހަރުމުދާ ހަމައަށް ހުރިކަން މާލިއްޔަތު ގަވާއިދުގައި ލާޒިމުކޮށްފައި އޮންނަ ގޮތަށް އަހަރަކު އެއްފަހަރު އެ އިދާރާތަަކުން ކަށަވަރުކޮށްފައިނުވެ އެވެ. 

ބިނާކޮށް ނުނިމިހުރި ހަރުމުދަލުގެ އަގެއްގެ ގޮތުގައި މިނިސްޓްރީން 288 މިލިއަން ރުފިޔާ ފާހަގަކުރި ނަމަވެސް ތަރައްގީގެ މަޝްރޫއުތަކާ ގުޅުންހުރި ބިނާކޮށް ނުނިމޭ ހަރުމުދަލުގެ ތަފުސީލުތައް މިނިސްޓްރީން އޮޑިޓަރުންނާ ހިއްސާނުކުރެ އެވެ. ނަތީޖާއެއްގެ ގޮތުން މިނިސްޓްރީން ބުނާ އަދަދަކީ ސައްހަ އަދަދެއްކަން އޮޑިޓަށް ކަށަވަރުނުވެ އެވެ.