މި ދަތުރުފުޅުގައި އަބްދުއްރަހީމް އަރިހުގައި ވެރިކަންކުރާ ޕީއެންސީގެ ޕާލިމަންޓަރީ ގުރޫޕުގެ ތިން ޑެޕިއުޓީ ލީޑަރުން ބައިވެރިވެވަޑައިގަންނަވަ އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރަސްމީ ދަތުރުފުޅެއްގައި ޗައިނާއަށް ވަޑައިގަތުމަށް ރޭ ފުރާވަޑައިގެންފި އެވެ.
މަޖިލީހުގެ ރައީސްކަމާ ހަވާލުވެވަޑައިގަތުމަށްފަހު ކުރައްވާ ފުރަތަމަ ރަސްމީ ދަތުރުފުޅަކީ މިއަދުން ފެށިގެން އަންނަ ހުކުރުދުވަހުގެ ނިޔަލށް ޗައިނާގއި އޮންނަ ކުރިއަރަމުން އަންނަ ގައުމަތަކުގެ ގާނޫނު ހަދާ މަޖިލިސްތަކުގެ ސެމިނާއެއްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
މި ސެމިނާއަކީ އިންޓަ-ޕާލިމަންޓަރީ ޔޫނިއަނާއި ޗައިނާގެ ސަރުކާރު ގުޅިގެން ބާއްވާ ސެމިނާއެކެވެ. ސެމިނާގެ މައުޟޫއަކީ ދެމެހެއްޓެނެވި ތަރައްގީގެ ލަނޑުދަނޑިތަކެވެ.
މި ދަތުރުފުޅުގައި އަބްދުއްރަހީމް އަރިހުގައި ވެރިކަންކުރާ ޕީއެންސީގެ ޕާލިމަންޓަރީ ގުރޫޕުގެ ތިން ޑެޕިއުޓީ ލީޑަރުން ބައިވެރިވެވަޑައިގަންނަވަ އެވެ. އެއީ ހުޅުދޫ ދާއިރާގެ މެންބަރު މުހައްމަދު ޝާހިދާއި ބާރަށު ދާއިރާގެ މެންބަރު އިބްރާހީމް ޝުޖާއު އަދި ވިލިމާލޭ ދާއިރާގެ މެންބަރު މުހައްމަދު އިސްމާއީލެވެ.
އެ ބޭފުޅުންގެ އިތުރަށް މަޖިލީހުގެ ރައީސްގެ ބިއުރޯ ޗީފު ވިލިމާލޭ ދާއިރާގެ ކުރީގެ މަޖިލިސް މެންބަރު މުހައްމަދު ނިހާން ހުސައިން މަނިކުވެސް އެ ދަތުރުފުޅުގައި އަބްދުއްރަހީމްގެ އަރިހުގައި ވަޑައިގަންނަވ އެވެ.