ސަރުކާރުގެ ލެޖިސްލޭޓިވް އެޖެންޑާގައި 213 ބިލު، މުޅިން އާ 78 ބިލެއް

ކުރިއަށް އޮތް ފަސް އަހަރަށް ސަރުކާރުން އެކުލަވައިލާފައިވާ ލެޖިސްލޭޓިވް އެޖެންޑާގައި 213 ބިލެއް ހުށަހަޅަން ހިމެނޭ ކަމަށާއި، އެއިން 78 ބިލަކީ މުޅިން އަލަށް ހުށަހަޅާ ބިލުކަމަށް ބަންޑާރަނައިބުގެ އޮފީހުން ބުނެފި އެވެ. 

ސަރުކާރުގެ ލެޖިސްލޭޓިވް އެޖެންޑާއާ ގުޅޭ މައުލޫމާތު ދިނުމަށް މިއަދު ބަންޑާރަނައިބުގެ އޮފީހުން ބޭއްވި ނޫސްވެރިންގެ ބައްދަލުވުމުގައި ބަންޑާރަނައިބު އަހްމަދު އުޝާމު ވިދާޅުވީ ކުރިއަށް އޮތް ފަސް އަހަރަށް އެކުލަވާލާފައިވާ ލެޖިސްލޭޓިވް އެޖެންޑާ މިއަދު ވަޒީރުންގެ މަޖިލީހަށް ހުށަހަޅައި އެ އެޖެންޑާއަށް މަޖިލީހުން ރުހުންދީފައިވާ ކަމަށެވެ. 

އުޝާމު ވިދާޅުވި ގޮތުގައި ލެޖިސްލޭޓިވް އެޖެންޑާގައި ހިމެނޭނީ މައިގަނޑު ގޮތެއްގައި ހަ ދާއިރާއެއްގެ ބިލުތަކެވެ. އެއީ: 

ލެޖިސްލޭޓިވް އެޖެންޑާގައި ހިމެނޭ ބިލުތަކުގެ ތެރޭގައި ދުސްތޫރީ އަދި ގާނޫނީ ކަންކަމާ ގުޅޭ 15 ބިލަކާއި ދައުލަތް ހިންގުމާ ގުޅުންހުރި 9 ބިލަކާއި، ހައްގުތަކާއި މިނިވަންކަމާ ގުޅުންހުރި 8 ބިލާއި، އިސްލާމްދީނާއި ގައުމިއްޔަތާ ގުޅުންހުރި 8 ބިލާއި، ގައުމީ ސަލާމަތާއި ހާރިޖީ ގުޅުންތަކާ ބެހޭ 15 ބިލާއި، ސިއްހަތާއި ދުޅަހެޔޮކަމާ ގުޅުންހުރި 11 ބިލެއް ހިމެނެ އެވެ. 

އޭގެ އިތުރަށް ކޮރަޕްޝަނާއި ކުށްކުރުން ހުއްޓުވުމާ ގުޅޭ 22 ބިލަކާއި އާއިލާއާ މުޖުތަމައާ ގުޅުންހުރި 20 ބިލަކާއި، ފައިސާއާއި މާލީ ކަަންކަމާ ގުޅުންހުރި 22 ބިލެއް ހިމެނެ އެވެ. އަދި ޒަމާނާ ނުގުޅޭތީ އުވައިލަން ނުވަތަ އިސްލާހުކރުަންޖެހޭ ގާނޫނުތަކާ ގުޅޭ 26 ބިލެއް ލެޖިސްލޭޓިވް އެޖެންޑާގައި ހިމެނެ އެވެ. އަދި ވިޔަފާރިއާއި އިގުތިސާދުގެ ދާއިރާގެ 22 ބިލެއް ހުށަހަޅަން ހިމެނިފައިވެ އެވެ. 

ވިހިވަނަ ރއްޔިތުންގެ މަޖިލީހުގެ ފުރަތަމަ ދައުރަށް ސަރުކާރުގެ ފަރާތުންވަނީ 37 ބިލެއް ހުށަހަޅާފަ އެވެ. އުޝާމު ވިދާޅުވި ގޮތުގައި އެ ބިލުތަކުގެ ތެރެއިން ތިން ބިލަކީ ލެޖިސްލޭޓިވް އެޖެންޑާގައި ހިމެނޭ ބިލުތަކެވެ.