މިނިސްޓްރީތަކާއި ކުންފުނިތަކުން ކައުންސިލުތަކާ މުއާމަލާތްކުރާނެ ފޯކަލް ޕޮއިންޓުން ކަނޑައަޅަނީ

ސަރުކާރުގެ މިނިސްޓްރީތަކާއި ދައުލަތުގެ ކުންފުނިތަކުން ލޯކަލް ކައުންސިލުތަކާ މުއާމަލާތްކުރާނެ ފޯކަލް ޕޮއިންޓުންތަކެއް އައްޔަންކުރުމުގެ މަސައްކަތް ސަރުކާރުން ފަށައިފިއެވެ. 

މިނިސްޓަރ ފޯ ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް އާދަމް ޝަރީފު އުމަރު މިއަދު އެކްސްގައި ޝާއިއުކުރެއްވި ޕޯސްޓެއްގައި ވިދާޅުވެފައިވަނީ ކައުންސިލުތަކަށް ބޭނުންވާ މައުލޫމާތު ފަސޭހައިން އަވަހަށް ލިބޭނެ އިންތިޒާމު ހަމަޖައްސައި، ސަރުކާރުގެ އިދާރާތަކާއި ކުންފުނިތަކާއި ކައުންސިލުގެ ގުޅުން އިތުރަށް ބަދަހިކުރެވޭނެ ނިޒާމެއް ގާއިމުކުރުމުގެ މަސައްކަތްކުރަމުން އަންނަ ކަމަށެވެ. 

އެ ނިޒާމު ގާއިމުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން މިހާރު ކުރިއަށްދާ މަސައްކަތަކީ ސަރުކާރުގެ ކުންފުނިތަކާއި، ދައުލަތުގެ ކުންފުނިތަކުން ކައުންސިލުތަކާ މުއާމަލާތްކުރާނެ ވަކި ފޯކަލް ޕޮއިންޓުންތަކެއް އައްޔަންކުރުމުގެ މަސައްކަތްކުރަމުންދާ ކަމަށް މިނިސްޓަރު ވިދާޅުވިއެވެ. 

Council thakah beynunvaa mauloomaathu faseyhain avahah libeyne gothakah adhi gulhunthah ithurah harudhanaa kureveyne nizaameh qaaimu kurumattakai sarukaaruge vuzaaraathakaai kunfunithakun council thakaa muaamalaathu kuraane focal pointeh hamajessumuge masakkaiy midhanee kuramun.… pic.twitter.com/edDiApC8Cr

— Adam Shareef Umar (@Adamshareefz) June 6, 2024

ވަޒީރު ފާހަގަކުރެއްވި ގޮތުގައި މިނިސްޓަރީތަކާއި ކުންފުނިތަކުން ކައުންސިލުތަކާ މުއާމަލާތްކުރާނެ ހާއްސަ ފޯކަލް ޕޮއިންޓުން ކަނޑައެޅިގެން ދިއުމަކީ، އެކަމުގެ ސަބަބުން ސަރުކާރާއި ކައުންސިލުތަކާއި، ރައްޔިތުންގެ މެދުގައި ގުޅުން ބަދަހިވާނެ ކަމެކެވެ. 

އިތުރަށް އޭނާ ވިދާޅުވީ މިފަދައިން ކައުންސިލުތަކާ މުއާމަލާތްކުރާނެ ފޯކަލް ޕޮއިންޓުންތަކެއް މިނިސްޓްރީތަކާއި ކައުންސިލުތަކުގައި އައްޔަންކުރެވުމުން ކައުންސިލުތަކާއި ސަރުކާރުގެ ހިންގުމުގެ ދުވެލި ހަލުއިވާނެ ކަމަށެވެ. 

މިއީ ސަރުކާރުގެ އިދާރާތަކާއި ކުންފުނިތަކުން ކައުންސިލުތަކާ މުއާމަލާތްކުރާނެ ފޯކަލް ޕޮއިންޓުންތަކެއް ކަނޑައެޅި ކައުންސިލުތަކަށް މައުލޫމާތު ލިބޭނެ އަދި އެ އިދާރާތަކާއި ކުންފުނިތަކާއެކު މުވާސަލާތުކުރެވޭނެ މިފަދަ ނިޒާމެއް އެކަށެއެޅިގެންދާ ފުރަތަމަ ފަހަރެވެ.