ރާއްޖެއަށް 1.2 މިލިއަން: އަމާޒު ހޯދަން ބާކީ ހަ ލައްކަ

މި އަހަރު 1.9 މިލިއަން ނުވަތަ ގާތްގަނޑަކަށް ދެ މިލިއަން ޓޫރިސްޓުން ގެނައުމަކީ ދިވެހި ސަރުކާރުގެ އަމާޒެކެވެ. އެ އަމާޒަށް ހިސާބު ޖަހައި ސަރުކާރުން މަސައްކަތް ކުރަމުން ދާއިރު މި އަހަރުގެ މިހާތަނަށް ބަލާނަމަ ރާއްޖެއަށް ޖުމްލަ އައިސްފައި ވަނީ 1.2 މިލިއަން މީހުނެވެ. މި އަދަދުން ބަލާނަމަ މި އަހަރުގެ ބާކީ އޮތް ދުވަސްތަކުގައި ރާއްޖެއަށް އެންމެ މަދުވެގެން ހަ ލައްކަ ޓޫރިސްޓުން ގެންނަން ޖެހޭނެ އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި މި އަހަރުގެ މިހާތަނަށް އައިސްފައި ވަނީ 1.2 މިލިއަން ޓޫރިސްޓުންނަކީ މިދިޔަ އަހަރު އައި 1.1 މިލިއަން މީހުނާ އަޅާބަލާނަމަ 14 ޕަސެންޓުގެ އިތުރު ވުމެކެވެ. މި އަދަދު ހަމަވެފައި ވަނީ މި އަހަރު އެވްރެޖްކޮށް 4،000 މީހުން އައިސްގެންނެވެ. ނަމަވެސް މިހާރުގެ ހިސާބުތަކުން ދައްކާ ގޮތުގައި ދުވާލަކު އަންނަ ޓޫރިސްޓުންގެ ނިސްބަތް ހުރީ 5,037 ގަ އެވެ. އެހެންވެ މި އިތުރުވުމާއެކު ޖުމްލަ ޓޫރިސްޓުންގެ އަދަދު އިތުރު ވެގެންދާނެ ކަމަށް ބެލެވެ އެވެ. 

މި އަހަރުގެ މިހާތަނަށް ރާއްޖެ އަންނަ ޓޫރިސްޓުންގެ ޑެއިލީ އެރައިވަލްސް ދަަށްނުވެ ހުރިނަމަވެސް ޓޫރިސްޓުން ރާއްޖޭގައި ހޭދަކުރާ މުއްދަތު ވަނީ ދަށްވެފަ އެވެ. މި އަހަރު ފެށުނުއިރު އެވްރެޖުކޮށް އަށް ދުވަހު ރާއްޖޭގައި ޓޫރިސްޓުން މަޑު ކުރެ އެވެ. ނަމަވެސް މިހާރު މި އަދަދު ވަނީ ހަތް ދުވަހަށް ދަށްވެފަ އެވެ.