ކަނޑުހުޅުދޫގައި ދެއަހަރުގެ ކުއްޖާ ރޭޕްކުރި މުނިކާފަ މަރުވެއްޖެ

ގއ. ކަނޑުހުޅުދޫގައި ދެ އަހަރުގެ ކުއްޖަކު ރޭޕްކުރި މައްސަލައިގައި ޖަލަށް ލާފައި ހުރި ކުއްޖާގެ މުނިކާފަ، އެރަށު އަންނާރުމާގޭ ހަސަން މޫސާ ދީދީ މަރުވެއްޖެ އެވެ.

ހުޅުމާލޭ ޖަލުގައި ހުކުމް ތަންފީޒުކުރަމުން ދިޔަ އުމުރުން 85 އަހަރުގެ ހަސަން މޫސާގެ ހަރަކާތެއް ނެތިގެން އެމަޖެންސީކޮށް ހުޅުމާލެ ހޮސްޕިޓަލަށް މިއަދު 9:55 ހާއިރު ގެންދިއުމުން ޑޮކްޓަރުން ބެލުމަށްފަހު ބުނެފައި ވަނީ އޭނާ ހިތް ހުއްޓިގެން މަރުވެފައިވާ ކަމަށެވެ.

ކަރެކްޝަނަލް ސާވިސް އިން މިއަދު ބުނެފައި ވަނީ އޭނާ ހުކުމް ތަންފީޒުކުރަމުން ދިޔަ ނަމަވެސް އޭނާއަކީ މުސްކުޅި ބަލީގެ ސަބަބުން އެއްގޮތަކަށް ވެސް ހިނގާ ބިނގާ ނޫޅެވޭ، އެނދުމަތިވެފައިވާ މީހެއް ކަމަށެވެ. އޭނާ މަރުވުމުން އެކަން ވަގުތުން އޭނާގެ އާއިލާއަށް އަންގާފައިވާ ކަމަށް ވެސް ބުންޏެވެ.

ދެ އަހަރުގެ ކުއްޖާ ރޭޕްކުރި މައްސަލައިގައި އޭނާ ހުރީ 25 އަހަރަށް ޖަލަށްލާފަ އެވެ. އެކުއްޖާއާ ބެހިގެން ކުއްޖާގެ ކާފަ، އިބްރާހީމް ދީދީ ވެސް ވަނީ އުމުރަށް ޖަލަށްލާފަ އެވެ. މިދިޔަ އަހަރުގެ ޖުލައި މަހުގެ ތެރޭގައި ދެ މީހުންގެ މައްޗަށް ކްރިމިނަލް ކޯޓުން އިއްވި ހުކުމުގައި ބުނެފައި ވަނީ ޖެނުވަރީ 17، 2020 ވަނަ ދުވަހުގެ ކުރިން ތަފާތު އެކި ދުވަސް މަތިން ކުއްޖާގެ ކާފަ އާއި މުނިކާފަ އެކުއްޖާއާ ބެހިފައިވާ ކަމަށެވެ.