ޓޫރިޒަމް ނެތް ސަރަހައްދުތަކަށް ގެންދިއުމުގެ ވިސްނުން އޮތީ މި ސަރުކާރުގަ

ސަރުކާރުން މިވަނީ އަނެއްކާވެސް ރިސޯޓު ހަދަން އާ ތިން ރަށް ނަރެފަ އެވެ. މިފަހަރު ރަށްތައް ނެރެފައިވަނީ ޓޫރިޒަމް ނެތް ސަރަހައްދުތަކަށެވެ. މިއީ މުޅިރާއްޖެއަށް ޓޫރިޒަމް ފުޅާ ކުރުމަށް ސަރުކާރުން ކުރަމުންދާ މަސައްކަތުގެ ދަށުން ނެރުނު އާ ރަށްތަކެވެ. 

މިފަހަރު ނެރުނު އާ ރަށްތަކާ ބެހޭ ގޮތުން ޓޫރިޒަމް މިނިސްޓަރު ޑރ. އަބްދުﷲ މައުސޫމް "މި" ނޫހަށް ވިދާޅުވީ ޓޫރިޒަމް ނެތް ސަރައްދުތަކަށް ޓޫރިޒަމް ފުޅާ ކުރުމުގެ ވިސްނުން ހުރީ މި ސަރުކާރުގައި ކަމަށެވެ. 

"ޓޫރިޒަމް ނެތް ސަރަހައްދުތަކަށް ޓޫރިޒަމް ގެންދިއުމުގެ ވިސްނުން ހުރީ މި ސަރުކާރުގަ. އަޅުގަނޑުމެންގެ ރަށްތައް މި ނެރެނީ އެންމެ ބޮޑަށް އެނދު ބޭނުންވާ ކްރިޓިކަލް ވޮލިއުމް ބޭނުންވާ ސަރަހައްދުތައް ބަލައިގެން،" މައުސޫމް ވިދާޅުވި އެވެ. 

ޓޫރިޒަމް މިނިސްޓްރީން މި ވިސްނުމުގައި އެންމެފަހުން ނެރެފައިވަނީ ތިލަދުންމަތީ އުތުރުބުރީ (ހއ) މެދަފުށީގެ އިތުރުން މިލަދުންމަޑުލު އުތުރުބުރީ (ށ) ނަލަންދޫ އާއި ކޮޅުމަޑުލު (ތ) ރުއްތިބިރަށެވެ. މި ރަށްތައް ނެރެފައިވަނީ މިހާރު ޓޫރިޒަމް އެންމެ މަދު ސަރަހައްދުތައް ބަލައިގެންނެވެ. 

 ޓޫރިޒަމްގެ ތަފާސް ހިސާބުތައް ދައްކާ ގޮތުގައި ރާއްޖޭގައި ޖުމްލަ 61,482 އެނދު ހުރިއިރު މީގެތެރޭން 41,713 އެނދަކީ ރިސޯޓުތަކުގައި ހުރި އެނދުތަކެވެ.  އެންމެ އެނދު މަދުން ހުރީ ތ. އަތޮޅާއި ށ. އަދި ހއ. ގަ އެވެ. 

އެހެންވެ ޓޫރިޒަމުން މީގެ ކުރީގައި މި ސަރަހައްދުތަކުގެ ޓޫރިޒަމް އިތުރު ރަށްތަކެއް ނެރެފައިވެ އެވެ. މިހާތަނަށް މި ސަރުކާރުން ނެރުނު ރަށްތަކުގެ ތެރޭން ރަށްތަކެއްގައި ރިސޯޓް ހަދަން އެވޯޑުކޮށްފައި ވެސް ވެ އެވެ. އަދި ރާއްޖޭގައި ނުހެދި ހުރި ރަށްތައް ހަދަން ބާރު އެޅުމުގެ ގޮތުން ޓޫރިޒަމް ގާނޫނަށް އިސްލާހު ގެނެސް ރަށްތައް ހަދަން ފެށޭނެ އިސްލާހުތަކެއްވެސް ގެނެސްފައިވެ އެވެ. 

މިނިސްޓަރު ޑރ. މައުސޫމް ވިދާޅުވީ އަލަށް ނެރޭ ރަށްތަކަށް ތަރުހީބު ރަނގަޅު ކަމަށާ ރަށްތައް އެވޯޑް ކުރި ފަރާތްތަކުން ރަަށްތައް ހެދުމުގެ މަސައްކަތް ވެސް ކުރަމުންދާ ކަމަށެވެ. 

"ރަށްތައް ލިބިފައިވާ ބައެއް އިންވެސްޓަރުންގެ ތެރޭގައި އެބަތިބި އާ ފަރާތްތައް. އެ ފަރާތްތަކުން ބޭންކްތަކުން ފައިނޭންސް ހޯދައިގެން ރަށްތައް ހެދުމުގެ މަސައްކަތް ކުރަމުންދަނީ،" މައުސޫމް ވިދާޅުވި އެވެ.