އުފައްދަން މަސައްކަތް ކުރަނީ ދުނިޔޭގެ އެކި ގައުމުތަކަށް އުދުހި ޓޫރިސްޓުން ގެނެވޭ ވަރުގެ އެއާލައިން އެކެވެ.
ސަރުކާރުގެ ދެ ކުންފުނި ކަމަށްވާ އައިލެންޑް އޭވިއޭޝަނާއި ފަންޑު މެނޭޖުމަންޓް ކޯޕަރޭޝަން (އެފްއެމްއެމްސީ) ގުޅިގެން އިންޓަނޭޝަނަލް އެއާލައިނެއް ހަދަން އެމްއޯޔޫއެއް ހަދައިފި އެވެ.
އިކޮނޮމިކް މިނިސްޓްރީގައި މިއަދު ބޭއްވި ރަސްމިއްޔާތެއްގައި ފަންޑު މެނޭޖުމަންޓް ކޯޕަރޭޝަންގެ ފަރާތުން އެމްއޯޔޫގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހަސަން މަނިކު އެވެ. ގައުމީ އެއާލައިން މޯލްޑިވިއަން އުދުއްސާ އައިލެންޑް އޭވިއޭޝަންގެ ފަރާތުން ސޮއުކުރެއްވީ އެމްޑީ މުހައްމަދު މިހާދު އެވެ.
ފަންޑު މެނޭޖުމަންޓް ކޯޕަރޭޝަނުން ބުނި ގޮތުގައި މި އެމްއޯޔޫއާއެކު ދުނިޔޭގެ އެކި ގައުމުތަކާއި ރާއްޖެ ގުޅާލެވޭ ވަރުގެ އިންޓަނޭޝަނަލް އެއާލައިނެއް އުފެއްދުމުގެ މަސައްކަތް ފެށިގެންދާނެ ކަމަށެވެ. މި އެމްއޯޔޫގެ މަގުސަދަކީ އެއާލައިން އުފެއްދުމުގައި އައިލެންޑް އޭވިއޭޝަންގެ ތަޖުރިބާކާރުންނާއި މާހިރުންގެ ލަފާ ހޯދުން ކަމަށް އެ ފަންޑު މެނޭޖުމަންޓް ކުންފުނިން ބުނެފައިވެ އެވެ.
"މި އެމްއޯޔޫގެ މަގުސަދަކީ ރާއްޖޭގެ ޓޫރިޒަމްގެ ރީތިނަމާއި ދިވެހިންގެ މެހުމާންދާރީ ފެނިގެންދާފަދަ ބައިނަލްއަގުވާމި އެއާލައިނެއް އުފެއްދުން،" ފަންޑު މެނޭޖުމަންޓް ކުންފުނިން ބުނެފައިވެ އެވެ.
އެ ކުންފުނިން ބުނީ ބައިނަލްއަގުވާމީ އެއާލައިނެއް އުފެއްދުމުގެ މަގުސަދަކީ ނާޒުކު ދިވެހި ޓޫރިޒަމަށް ބޭނުންވާ ޓޫރިސްޓުން ގެނައުމެވެ. އަދި ޗައިނާ އާއި ރަޝިއާފަދަ މާކެޓުތަކުން ހުޅުވިގެންދާ ފުރުސަތުތަކުގެ ބޭނުން ހިފުން ކަމަށް އެ ކުންފުނިން ބުނެފައިވެ އެވެ.
ނަމަވެސް މި އެއާލައިން އުފައްދާނެ ތާރީހެއް ފަންޑު މެނޭޖުމަންޓް ކޯޕަރޭޝަނުން ބުނެފައެއް ނުވެ އެވެ.
ބައިނަލްއަގުވާމީ އެއާލައިނެއް އުފައްދަން ސޮއިކުރި ފަންޑު މެނޭޖުމަންޓް ކުންފުންޏަކީ ގިނަ މަޝްރޫއުތަކެއް ހިންގަމުން ގެންދާ ކުންފުންޏެކެވެ. އެ ކުންފުންޏަކީ ގިރާވަރުފަޅާއި އައްޑޫ ހަންކެޑެ މަޝްހޫރު މެނޭޖުކުރާ ކުންފުންޏެވެ. އަދި ގައުމީ އެއާލައިން މޯލްޑިވިއަންއަކީ ރާއްޖޭގެ އެތެރޭގެ އުދުހުންތައް އެންމެ ފުޅާކޮށް ކުރާ ކުންފުންޏެވެ. ނަމަވެސް ގައުމީ އެއާލައިންއަކީ މާލީ ގޮތުން ގެއްލުންވަމުންދާ ކުންފުންޏެކެވެ.