ރައީސް ވިދާޅުވީ މުންޑޫއަށް ދިރުން ގެނެސްދެވިއްޖެ ކަމަށް

ކުރިން ހަނަފަސް ބިމެއްގެ ގޮތުގައި އޮތް ލ. މުންޑޫއަށް ދިރުން ގެނެސްދެއްވީ ރައީސް އިބްރާހިމް މުހައްމަދު ސޯލިހުގެ މި ދައުރުގައި ކަމަށް އެމަނިކުފާނު ވިދާޅުވެއްޖެ އެވެ.

ރިޔާސީ އިންތިހާބުގެ ތާއީދު ހޯއްދަވަން ރައީސް މިއަދު ހެނދުނު ވަނީ މުންޑޫއަށް ވަޑައިގެންފަ އެވެ. އާބާދީ ވަރަށް ކުޑަ މުންޑޫގެ ރައްޔިތުންނާ މުހާތަބުކުރައްވަމުން ރައީސް ވިދާޅުވީ 2018 ވަނަ އަހަރުގެ ރިޔާސީ އިންތިހާބުގެ ކެމްޕޭނަށް ވަޑައިގަތް އިރު އެރަށަކީ ހަނަފަސް ސަރަހާއެއްހެން އޮތް ތަނެއް ކަމަށެވެ.

ފަސް އަހަރު ފަހުން މިއަދު އެ ރަށަށް ވަޑައިގަތުމުން ވަރަށް ބޮޑު ކުރިއެރުންތައް ރަށަށަށް ލިބިފައިވާ މަންޒަރު ފެންނަމުންދާ ކަމަށް ރައީސް ވިދާޅުވި އެވެ. އޭގެ ތެރޭގައި ރައްޔިތުންނަށް ބޭނުންވާ އަސާސީ ހިދުމަތްތައް ފުރިހަމަކޮށްދެވިއްޖެކަން ފާހަގަކުރެއްވި އެވެ.

"އެދުވަހު އޮތީ ހަނަފަސް ރަށެއްގެ ގޮތުގަ. އެއްވެސް ދިރުމެއް ނެތް، ބަޔަކު ދިރިއުޅޭ މިތާ، އެކަމަކު ސަރުކާރަކުން ފޯރުކޮށްދެން ޖެހޭ އަސާސީ ހިދުމަތްތަކުން މަހުރޫމްވެފައި ތިބި ރައްޔިތުންތަކެއް އޭރު މިތާ ތިބީ،" ރައީސް ވިދާޅުވި އެވެ.

ރައީސް ވިދާޅުވީ ސަރުކާރުގެ ސިޔާސަތުތަކާ އެއްގޮތަށް ގިނަ ކަންތައްތަކެއް ރަށަށް ކޮށްދިނުމުން މިއަދު ފެންނަމުން މި ދަނީ ވަރަށް އުފާވެރި މަންޒަރެއް ކަމަށެވެ. މުންޑޫ އަކީ އާބާދީ ކިތަންމެ ކުޑަ ރަށަކަސް، ކުރިއަށް އޮތް ދައުރުގައި ވެސް ސަރުކާރުގެ ސިޔާސަތުތަކުގެ ތެރެއިން އެރަށަށް ބާކީކޮށް ނުލައްވާނެ ކަމަށް ރައީސް ވައުދުވެވަޑައިގަތެވެ.

ރައީސް ވަނީ ކުރިއަށް އޮތް ދައުރު މުންޑޫއަށް ވައުދުތަކެއް ވެވަޑައިގެންފަ އެވެ. 

ރައީސް ވިދާޅުވީ ކުޅުވަރު ކުޅޭ ދަނޑުތައް އެޅުމުން އެތަންތަން ހުޅުއްވައިދެއްވަމުން އެމަނިކުފާނު އެ ރަށަށް ވަޑައިގަންންވާނެ ކަމަށެވެ.

"ތިޔަ ބޭފުޅުންނަށް މި ވޭތުވެދިޔަ ފަސް އަހަރާ، އޭގެ ކުރީގެ ފަސް އަހަރާ ވަރަށް ރަގަޅަށް މިނާ ކިރާލެވޭނެ، ރައްޔިތުންނަށް ހިދުމަތް ކުރުމުގައި ކަންތައްތައް ކޮށްފައި ހުރީ ކިހިނެއްތޯ. މިއަދުވެސް އަޅުގަނޑުމެންގެ ވާދަވެރިން ބުނަމުން ދިޔައީ ހަމަ ކުރީގަ ދެއްކި ވާހަކަ. އެރަށަކަށް، އެބަޔަކަށް ސަރުކާރުން ކޮށްދެން ޖެހޭ ކަންތައްތައް ކޮށްދެން ޖެހޭނީ ކުޑަ ބޮޑުމިނެއް ބަލާފައޭ. އެއީއެއް ނޫން އަޅުގަނޑުމެންގެ ސިޔާސަތަކީ. އެކަން ވަރަށް ރަގަޅަށް މުންޑޫގެ ރައްޔިތުންނަށް އެނގިވަޑައިގަންނަވާނެ،" މުންޑޫގެ ރައްޔިތުންނާ މުހާތަބު ކުރައްވަމުން ރައީސް ވިދާޅުވި އެވެ.