ޖަނަވަރީގައި 44،281 މުވައްޒިފުންގެ މުސާރަ ބޮޑު ކުރަނީ، 40 ޕަސެންޓް ބޮޑުވާނެ

ސަރުކާރުގެ މުވައްޒިފުންގެ މުސާރަ ބޮޑު ކުރުމަށް މިހާރު ކުރަމުންދާ މަސައްކަތާ އެެކު މިވަގުތު މުސާރަ ބޮޑުނުވެ ހުރި ހުރިހާ އިދާރާއެއްގެ މުވައްޒިފުންގެ މުސާރަ އަންނަ ޖަނަވަރީ މަހު ބޮޑުވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.

ރައީސް މިހެން ވިދާޅުވީ ބ. ތުޅާދޫގައި މިރޭ ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ސަރުކާރު މުވައްޒިފުންގެ ޕޭ ހާމަނައިޒޭޝަން މަސައްކަތުގެ ތެރެއިން ވަރަށް އަވަހަށް ސިފައިންނާއި ފުލުހުންނާއި ޖުޑީޝަރީ ހުރިހާ މުވައްޒިފުންގެ މުސާރަ ބޮޑުވާނެ ކަމަށެވެ. އަދި ކަސްޓަމާއި އިމިގްރޭޝަނާއި ކަރެކްޝަންގެ އިތުރުން ސިވިލްސާވިސްގައި ހިމެނޭ ހުރިހާ މުވައްޒިފުންގެ މުސާރައަށް ވެސް ޖަނަވަރީގައި ހެޔޮ ބަދަލު އަންނާނެ ކަމަށެވެ.

އެގޮތުން އިމާމުންނާއި މުދިމުންނާއި ކައުންސިލްތަކުގައި މަސައްކަތްކުރާ ސިވިލްސާވަންޓުންގެ މުސާރަ ބޮޑުވާނެ ކަމަށެވެ.

"އިރާދަކުރެއްވިއްޔާ އަޅުގަނޑުމެންގެ އަމާޒަކީ ދެން މިފާސްކުރާ ބަޖެޓާއެކީ އަންނަ ޖަނަވަރީ މަހުން ފެށިގެން މި ހުރިހާ ދާއިރާއެއްގައި މަސައްކަތް ކުރާ ހުރިހާ މުވައްޒިފުންގެ މުސާރައަށް ހެޔޮ ބަދަލެއް ގެނެވޭނެ،" ރައީސް ވިދާޅުވި އެވެ.

ރައީސް ވިދާޅުވީ ޖަނަވަރީގައި ގެންނަ ބަދަލާއެކު ބައެއް ދާއިރާތަކުން ވަރަށް ބޮޑު ކުރިއެރުން ލިބޭނެ ކަމަށެވެ. ބައެއް މިސާލުތައް ވެސް ރައީސް ވަނީ ހިއްސާ ކުރައްވާފައެވެ. ރައީސް ވިދާޅުވީ ފުލުހުންގެ ކޮންސްޓަބަލަކަށް މިހާރު ލިބެނީ 11،000 ރުފިޔާ ކަމަށާ ދެން ގެނެވޭ ބަދަލާއެކު 15،400 ރުފިޔާއަށް ބޮޑުވާނެ ކަމަށެވެ. ސިފައިންގެ ޕްރައިވެޓަށް މިހާރު ލިބޭ 11،500 ރުފިޔާ ގެނެވޭ ބަދަލާއެކު 16،100 ބޮޑުވާނެ ކަމަށާ ލޯކަލް ކައުންސިލްގައި 7،200 ލިބޭ މުވައްޒިފުންނަށް 10،500 ރުފިޔާ ދެން ލިބޭނެ ކަމަށެވެ.

މީގެ އިތުރުން ސިވިލްސާވިސްގެ މިނިސްޓްރީގެ ޑައިރެކްޓަރަކަށް މިހާރު ލިބޭ 16،000 ރުފިޔާ 23،200 އަށް ބަދަލުވާނެ ކަމަށާ ޗީފް އިންސްޕެކްޓަރެއްގެ މުސާރަ 34،300 ރުފިޔާ އިން 48،000 ރުފިޔާއަށް ބޮޑުވާނެ ކަމަށެވެ.

"އެވްރެޖްކޮށް ކޮންމެ މީހެއްގެ މުސާރައަށް 40 ޕަސެންޓް އިތުރުވެގެންދާނެ،"

ރައީސް ތަކުރާރުކޮށް ވިދާޅުވީ މިއީ ހަމަ ހުންނަވާފައި ދައްކަވާ ވާހަކަ އެއް ނޫން ކަމަށެވެ. މި ބަދަލާއެކު އާއިލާތަކަށް ހެޔޮ ބަދަލުތަކެއް އައިސް ފުއްދުންތެރި އާއިލާއަކަށް ވާނެ ކަމަށާ ހަމަޖެހިލައިގެން އާއިލާއާއެކު އުޅެވޭނެ ގޮތްތަކެއް ހޯދައިދެވޭނެ ކަމަށެވެ.

ރައީސް ވިދާޅުވި ގޮތުގައި ޖަނަވަރީގައި ގެނެވޭ ބަދަލާ އެކު 44،281 މީހުންގެ މުސާރައަށް ބަދަލު ގެނެވުނީ ކަމަށެވެ.